|
EBRUK 3'K'ARİS PERİ MEÇAPS
Ebru, çkini geografiaşi t’radi3ialuri xeşnoxvenepeşen ar teri ren. Kitre varna emus mengaperi op’ecanuri mat’erialepe oxmaruten, na ip’ecanen 3’k’arişi jin, doloxe muşis pucişi zafra na ik’atinen let’aşi çistepe o3’ap’inuten na gamulun mot’ifepe, 3’k’ariş jin na nişkvinen kart’alişa non3axuten na ixvenen ar xeşnoxvene ren. Ebru şeni uk’alemoni, ufurç’aloni, kart’alişi jin pukirişi sureti oxvenu” oqopinotti itkven. N3opulas var iguren, ust’a-çirağuri gzaten iguren. Ebru, perepek 3’k’ari k’ala na ikips ar harmonia ren.
Ebruşi tkvala şeni, mu asti uğun yado dido çkvaneri oxo3’onapape koren. Tkvala “ebru” şeni Oşkenduri Aziaşi nenapeşen ar teri na ren Çağatayuri nenaşi tkvala “ebre”şen moxtimeri ren yado na itkven tina, am tkvala şeni Farsuli tkvala “ebri”şen moxtimeri ren yado na tkumers megoşogorepeti koren. Namtini megoşogorepekti Çağatayuri “ebre” tkvala Farsulişa amaxtu do “ebri” oqopinot oxmarinuşa geiç’k’u ya tkumernan. Dido beciti var ren; ebruşi odude Çağatayist’ani varna Acemist’ani na ren do coxo muşiti Çağatayuri varna Farsuli na renşi. Beciti na ren mutxani, ebruşi mpuleri mist’ik’uri harmonia ren.
Epto meç’ireli na ren do amagi na dvaç’irs ebru, na yeçkindinen mot’ifişen arxvala ar fara surati na yizdinen xeşnoxvene ren. Ebruşi xeşnoxvene maartani farot mundes, so do mişk’elen na ixvenu var içkinen. 1595 tariğoni na ren irişen mcveşi ebrus Şebek Mehmed Efendişi coxo uğun. Ebruş xeşnoxveneşi maartani xena “Tertib-i Risale-i Ebri” coxoni ren. Edo 1608 tariğoni ren. Am svarak ebru oxvenuşi do ebruş moxvenepeşi çkinape meçaps. Şebek Mehmed Efendişk’ule irişen beciti meebrule, “Hatipuri ebru” st’ilisti coxo na meçu Mp’oluri Hatip Mehmed Efendi ren. Hat’t’ati na rt’u am moxvenek Meçeti Aiasofiaşi hatibobati qveet’u do şuri muşiti 1773 3’anas Ğormotişa meçeet’u.
Ebruşi xeşnoxvenek, andğaneri ndğas xolo şuri dolidginaps. Ati majura t’radi3ialuri xeşnoxvenepe steri, didi noğaluri skidalaşen na meç’irdun mitxanepeşa ağani p’ozit‘iuri gagnapape mogapaps.
|
TÜRKÇE
