|
SUFRA ÇKİNİŞA KAPÇİAK BEREKETİ MUMERS
Uçamzoğarepeşi sufras bereketi na mumers kapçiak didobaşi sebebiten meçxomepe oxelaps. Palamut’i do çinek’op’işi sezonişk’ule kapçiaşi sezoniti koguin3’k’u. Kapçia (Engraulis encrasicholus), Engraulidaeşi familiaşen xor3i muşi mo3’ondinuten na iç’k’omen ar çxomişi ç’eşidi ren. Xura muşi ginz’e do mç’ipe, jur k’eleşen morgvali ren. Tudeni çarbi var uğun, jileni çenge ginz’e uğun do k’ap’ula muşi uçalon 3aşperoni do tudeşk’ele xçelon peroni ren. Jur k’ele muşi cğat’aloni ren.
Uçazoğauri xalk’işi skidala k’ala na molişinen çxomi ren. Marmaraşi zoğasti iz’iren. Cogipeten skidunan do eçi sant’imet’oşakis irdenan. 3’anağani do Mirk’ani tutapeşi oşkendas oç’k’omale ogoru şeni zoğap’icepeşa nanç’enan. Ndğaleri 30-40 met’ro k’ut’alobas do seri zoğaşnunk’us inçvirnan. Ar 3’aneri iqvanşi moirdenan do 18°-20°C -oni 3’k’arepes, 25-60 met’ro k’ut’alobas do m3ika mcumoni 3’k’arepes imralenan do nanç’inerot 40.000 markvali gamiğapan. Otxo 3’ana k’onari skidunan.
Uçazoğaşi kapçias, Azak’işi do Uçazoğaşi yado jur ç’eşidi uğun. Azak’iş kapçiaşi çxvindi mk’ule do mçxu ren. Azak’işi zoğas imralenan do qinora golaçkvinu şeni omjore k’eleşa, Turketişi Oşkenoni do Yulva Uçazoğaşi t’erit’oriaşa gyulunan. İgrik’a tutaşi çodinasti oçildre k’eleşa ulunan. Uçazoğaşi kapçiati Oçildre-gyulva Uçazoğas imralen, qinora golaçkvinu şeni 3’ilva tutaşen K’undura tutaşakis T’rak’iaşi zoğap’icepeşa do Marmaraşk’ele ulunan. İgrik’aşi tutasti markvali gamağu şeni Uçazoğaşa guiktenan. Edo xolo Marmaraşi kapçia na itkven do arxvala Marmaras na gamulun, umosi mç’ipe do soti na var ulun ar kapçiaşi ç’eşiditi koren. Artneri kapçiaşi ç’eşidi Oçildre Egeşi zoğasti iz’iren. Am kapçiaşi k’ap’ulaşi peri umosi xçelon ren.
Kapçia, Yulva Uçazoğaş t’erit’oriaşi do Uçamzoğarepeş xalk’işi simboli do mutepeşi birabapes do anek’dot’epeşi tema ren. Kapçia, Uçazoğaşi oç’k’omes temeluri oç’k’omale do p’rot’einişi odude ren. Pasi muşi epi na ren şeni, dido xalk’işk’elen iç’k’ominen. Kapçiaşi izgara, get’ağana, ofurna, k’art’alişi kebabi, buxara, pilak’i, yaxni steri oç’k’omalepe ixvenen. Uça xor3oni çxomi na rentina buxara muşiti dido k’ai iqven. Monç’inoraşi tutapes uyağoni na ren şeni, izgara var do get’ağana varna buxara oxvenu nomskun. Qinoraşi tutapes na iç’opinen kapçiape oncumonuten işinaxen. Edo xolo fabrik’apes çxomişi yaği do mkiri oxvenu şeni ixmarinen.
|
TÜRKÇE
