DUDBUT'K'A

K'AP'ET'İ MEGABRE, K'AP'ET'İ MT'ERİ: VANİŞİ K'AT'U

Anatoliaşa mundes do namu gzaten na moxtu na var maçkinenan Vanişi k’at’us ar int’eresoni k’ualifik’a3ia uğun. Vanişi k’at’uk 3’k’aris onçviru dido qorops. 3’k’arişk’eleşa ulun na, keyfi oxvenu şeni ren, na dvaç’irs şeni var. Xususurot t’ibu do k’ut’ali na var ren 3’k’aris onçviru k’ai a3’onen. Vanişi k’at’uşi bundğape jur peroni ren. Am jur peronoba k’arak’t’erist’uri k’ualifik’a3ia muşi oqopinot içkinen. Muşi qucepe do k’udelişi gomorgvas uğun am çkvaneri perepe.

Vaniş k’at’uşi posti p’eci ren do muşi bundğapesti normaluri ginz’enoba uğun. Monç’inoras bundğape muşi iktiraps do em p’eriodis muşi bundğape im3ik’anen. Qinoraşi morgvalis ar mtvirişburti steri iqvenan. Vanişi k’at’upe mçxu renan. Vanişi k’at’upeş xuraşi monk’anoba biç’epes nanç’inerot sum k’ilo do xutoşi grami do 3’unapeşi monk’anobati jur k’ilo do ovrooşi grami iqven. Mutepeşi xura ginz’e do adeloni, qvilepe didi ren. Vanişi k’at’us uğun didi, mçire do gulişperi qucepe. Namtini Vanişi motali k’at’upes uğun nak’otxani uça lekepe, jur qucişi oşkendas. Vanişi k’at’upe ndura renan yado içkinen, mara aya ren Ankaraşi k’at’uşi k’ualifik’a3ia. Nduraloba oşişen juri varna sumi ren.

Vanişi k’at’u, muşi toli do bundğaşi sebebiten Ankaraşi k’at’u k’ala oxuiktinen.Vanişi k’at’uşi tolepe juriti cğat’a, juriti karva varna arti cğat’a arti karva iqven. Cğat’a mteloras turkuazuri cğat’a iqven do karvaşi peri çkvaneri tonepeten iz’iren. Ağandobaderi motalepeş tolepe brest’i iqven. Vanişi k’at’uşi tolepek dobadaşen eçdoxut ndğaşk’ule oçkvanerinus gyoç’k’aps do jurneç ndğaşk’uleti tolepeşi perepek mtini perepeşa guikten. Vanişi k’at’u k’arta 3’anas K’undura, Mirk’ani varna Mbulobaşi tutapeşen artis yeğindun. Am yeğindoba vit ndğa k’onari naqonen. Am p’eriodis jurşuroni iqven na, artneri 3’anas ar çkva var yeğindun. Jurşuronabaş p’eriodi sumeneçdojur ndğa k’onari ren. Jurşuronobaşi maartani tuta golaxtaşi korba muşi dvabaren. Edo ar faras otxo motali dorinaps.

K’at’upek generalurot mance mutepeşis var, mara na skidunan svalepes gagepan do na skidunan svalepe var goktirapan. Mara Vanişi k’at’uk ağani sva muşis astaxolo oxvamç’k’en do muşi mcveşi sva var gorups. Vanişi k’at’us oqoropinu dido k’ai a3’onen do artneri gzaten coğap’i meçaps. Jurşuronobaşi p’eriodis, umosi dido qoropa dvaç’iren. Ti-muşi na qorops mitxanepeşi p’odiaşa yulun. Xe na gelusumers mitxanişi xes şak’aten gak’ibins do loskups. Edo gemiyavups. Emus oç’k’omale na meçaps mitxanişi k’uçxepes nasven şukuri oxvenu şeni. Çeçmeşa oxtimu unont’aşi nek’naş 3’oxle go3’odgitun do mağali xonariten omiyavute mance muşişa ambari meçaps. Nek’na gun3’k’an ya unon, mara nek’na gon3’k’uşi miti var ren na muk gon3’k’ips. Vanişi k’at’u çkva k’at’upe do mance muşi k’ala ok’oambaru şeni çkvaneri xonarepeten miyavups. Emuk na gamiğaps mtel xonarepes çkvadoçkva oxo3’onapape uğun. Vanişi k’at’u ar susi do mtugi do bobonç’vape na ç’opups ocağuri megabre oqopinot işinen. Xassasuri gagnapaşi organepe uğun. M3’k’upisti k’aixeşa az’iren. M3’k’ili ç’angepe, lasireli k’ibirepe do at’let’ik’uri xura uğun. Muşi k’uçxeş k’itepeşi jin uxonarelot alen. Megabreşi megabre; mt’erişi mt’eri ren.



                                                                                                                                                              TÜRKÇE