|
OXORCA DOĞURU DO XOLO İSAĞU
Afrik’aşi Gaboni coxoni tereşen dido oint’eresoni do ek’oti oşkurinoni ar ambari momixtes. Dido k’ap’et’i do xeleberi ar oxorca ar ndğas oncire muşis uşuroni iz’iru. Edo ğureli na içkinu şeni, ocaxi muşik oxzabuneşi morgişa oxorcaşi oqonu şeni ambari meçu. Na moxtu ekimikti “eks”işi rap’ori na meçuşi, oxzabuneşi sanit’uri madulyepek morgişi qini dolabişi ar burmes eya naşkves.
Bedigoç’veri zavali oxorcak ekonaşi 18 saat’iş morgvali eşo dodgitu. Mara emuşk’ule xolo isağu. “Artoba” coxoni gazetik am oxorcaşi ambari mteli kianaşa ognapu. Nana noğaşi 400 k’ilomet’ro jilentuna-yulva k’eles na ren ar ç’it’a noğas na skidun oxorca maartani K’unduraşi seris “doğuru” yado içkinu.
Mara ç’umanişi cenazeşi seramonia şeni oxzabuneşi morgişa na moxtu ocaxis, sakvari oxva3’onu. Qini dolabişi burmes na dolocans xuraşi a3’ineri p’ozi3ia, entepek na naşkves steri var t’u . Xura geninuri p’ozi3ias rt’u do qinişi sebebiten t’irt’inapt’u. Aşopeten Oxorca şurgedgineri na rt’u, ocaxi muşis oxva3’onu do astaxolo ekimepeşa unk’apes.
Na moxtes ekimepes guişases. Edo mirak’ulurot na isağu oxorca nak’otxani ndğaş k’ule oxori muşişa guiktu. Oxorca na skidurt’u noğaşi belediyeşi reisi, garnizonişi k’omandani do ekonuri xalk’ik, oxorcaşi megapu şeni ar dido didi seramonia xazires. Oxorcaşi kimolik, “Manti ar çkva oçiluşa vixazirt’i, k’ismet’i var maqu. Mu p’at? Bolaki çkvaneri faraşa” ya tku.
|
TÜRKÇE
