DUDBUT'K'A

ŞURSAĞOBALONİ AR QİNORA ŞENİ ANŞİ K'AİDE

Xurape çkinik, qinoraşi sezonis na iqven qini t’aronepeşa oxvamç’k’inu şeni umosi energia xarcups. Dobağineri energia var miğut’anşi xura çkinişi nuxondinu isap’arinen do infek’3ia nak’limuşi albatobas manz’inen. Qinik xususurot purpuşi ak’ut’uri varna k’ronik’uri iri zabunobapes nuğinz’ups. Bronşit’i do ast’imi steri şursağobaşi p’roblemepe umosi dido iz’iren. Edo xolo k’ronik’ur dirkuşi do diabet’işi zabunepek, gurişi zabunepek, baypasi xveneri k’oçepek qini t’aronepeşen dido n3’irupan. Şursağobaloni ar qinora oskedinu şeni çkinerk’oçepek na gemiçinadupan anşi k’aide aşo ren:

1- Bak’lape dido ç’k’omit: Xomula lobia, noxut’i, mercumeği, barbunia steri k’ai ar p’rot’einişi odude na ren bak’lape, xor3i var ok’atutenti na iç’k’ominen ar oç’k’omaloni grup’i ren. Xarxaleri oqopinot zamzavatişi oç’k’omalepeşa do salat’apeşati ik’atinen. Bak’lapes dolonis jur-sum fara oç’k’omu dvaç’irs.

2- Grip’i şeni C şi vit’amini ixmarit: Xuraş nuxondinuşi osap’arinuten ti na gamimers grip’işen oçvalu do moşletinu şeni ask’ili, ç’iç’ami, mç’ita do jvari m3’k’ili p’ep’eri, rok’a, kivi, port’uk’ali, mandalina do limoni steri C vit’aminişi xampoba na uğun xili do zamzavati oç’k’omu dvaç’irs.

3- Nuxondinoba şeni zamzavati ç’k’omit: Xilepe do zamzavatepe, vit’amini do mineralişi odude do ant’iok’sidani ren. Xuraşen t’oksinepeşi gamağinus becitoba na aqven A, C, E şi vit’aminepeşi odude ren. Xususurot uçalon jvari, k’vint’eli, t’urunci, mç’ita do mori xili do zamzavatepes, nuxondinobaşi sist’ema şeni k’arta ndğas minimalurot xut-anş p’orsioni oç’k’omalu dvaç’irs.

4- K’ave var do ask’ili şvit: Qinoras çai, k’ave, k’ola, k’ak’ao steri k’afeini na uğun oşumonepe var do C şi vit’aminişi xampoba na uğun ask’ilişi çai; jvari çai, rezene, melisa, p’ap’at’ia do diç’k’icişi çai steri oraxat’oni do nuxondinuşi sist’ema na ok’ap’et’inaps xilişi çaepe oşumu dvaç’irs. 3’k’arişi oşumus becitoba meçit do 2,5-3 lit’re 3’k’ari şvit.

5- Lik’idi yaği ixmarit: Qinoraşi tutapes yağişi dido oxmarinuk omgvanuşa sebebi meçaps do xuraşi nuxondinuşi sist’emas negat’iuri oqopinot zarari meçamuten zabuni oqopinuşi risk’i monz’inaps do zabunobaşi p’eriodi oginz’anaps. Emuşeni tereşiyaği do margarinepe var, mara lik’idi yaği oxmarinu dvaç’irs.

6- Mjora do mjaşi noxvenepeşen mo dicert: Qinoraşi sezonis mjora, umosi ç’it’a na iz’iren şeni ult’ravioluri teepe k’ala t’k’ebis na isent’ezinen D şi vit’amini var iç’opinen. Xususurot qvili do k’ibirişi omordinu şeni beciti na ren k’alsiumi xuras oxmarinu do oşinaxu na ikips D şi vit’aminiş dvaç’iroba oçodinu şeni, mjoraşi teepeşen na domaç’irnan k’onari eç’opinu do mja, mjaşen noxvenepe do çxomi steri oç’k’omalape oç’k’omu unon.