DUDBUT'K'A

VAT'İK'ANİŞİ, RUMURİ P'AT'RİKXANA K'ALA EK'UMENOBAŞİ FLORT'İ

K’at’olik’epeşi religiuri go3’oncğoneri do Vat’ik’aniş Oxen3aleşi P’rezident’i na ren 16. Benedik’tusi, Turkia na muik’itxu masumani Pap’a iqu. 1967 3’anas Pap’a 6. Paulik do 1979 3’anasti 2. Jean Paulik Turkiaşa moxteret’u. Pap’aşi Turkiaşa moxtimuşi noğira şeni, K’at’olik’uri Ek’lesia do Ortodoksuri Ek’lesia k’ala dialogi monz’inu do Krist’ianepeş oşkendas artoba oqopinu ren ya itku.

Turkiaşi P’rezident’işi ofi3ialuri mok’itxe oqopinot Ankaraşa na moxtu Pap’a 16. Benedik’tusis, haerop’ortis Dudnaziri Erdoğanik nagu. Ankaras irişen 3’oxle Anitk’abiri na muik’itxu Pap’ak, ok’ule P’rezident’i Sezeri, Dudnazirişi Manuşvale Şahini do Dianet’işi Dudmaxvence Bardakoğlu k’ala ik’ont’akt’u. Pap’ak mok’itxaşi majurani ndğas İzmiris Nana Mariamişi Oxorişa idu. İzmirişen Mp’olişa na golaxtu 16. Benedik’tusik, masumani ndğas Rumuri P’at’rikxanas Aziz Andreasişi yortuşa ak’atu. P’at’rik’i Bart’elemeosi k’ala oşkendari dek’lara3ia gamiçkvinu do ek’lesiapeşi oşkendas k’oop’era3ia ik’vandinu. Mp’olis Aiasofiaşi muzeumi do Sultanahmetişi meçeti na goxtu Pap’a 16. Benedik’tusik, mok’itxaşi çodinaşi ndğas Saint Espritişi K’at’edralis na i3’opxinu ayinişa ak’atuşk’ule Vat’ik’anişa uk’uniktu.

Vat’ik’anişen na ixvenu oxo3’onapaşi toliten, Pap’apek a3’işakis Turkiaşa na qves mteli moxtimuşi noğira şeni, P’at’rik’xana mok’itxu yani K’at’olik’epe do Ortodoksepeşi k’ont’akt’oba omordinu ren ya itku. Ok’rebule muşi Mp’olis na ren Ortodoksuri Ek’lesia k’ala ok’rebule muşi Romas na ren K’at’olik’uri Ek’lesiaşi 1054 3’anas artikarti aforozi oxvenuten na gyoç’k’u uk’ont’akt’obaşi 1964 3’anas oçodinuten, Vat’ik’ani k’ala Fenerişi Rumuri P’at’rik’xanaşi oşkendas mok’itxupe kogyoç’k’u. Pap’a 16. Benedik’tusi do Fenerişi Rumuri P’at’rik’i Bart’elemeosi, Krist’ianepes dido na onç’elnan ar dek’lara3ia ognapes. Dek’lara3ias Krist’ianepe artobaşa icoxinu, Muslimani do majura religiaşi xalk’epeşati mo3’qvaşi do k’op’era3iaşi mesaji niçinu. Amuş 3’oxle Turkiaşa na moxtu çkar Pap’ak Muslimanepe do Krist’ianepeşa mutu ğarğala do coxina var qu na tkves çkinerk’oçepek, dek’lara3ias 3iviliza3iapeşi aliansobaşen molaşinu dido beciti ren yado noqones.

Mosk’ovaşi Ortodoksuri Ek’lesiak, Fenerişi Rumuri P’at’rik’xanaşi (Mp’olişi Ortodoksuri Ek’lesia) ek’umenoba k’abuli var ikips. K’omunist’uri sist’emaşi p’eriodis St’alinik, Mosk’ovaşi Ortodoksuri Ek’lesias çkar xe var nusveret’u, ar balan3ia oqopinot Mp’olişi Ortodoksuri Ek’lesia gyocginu unt’eret’u. Muşeni do, mcveşi orapeşen doni Mp’olişi P’at’rik’xanaşa Amerik’aşi Ok’ont’aleri Oxen3aleşk’elen mxuci niçinen. Amerik’aşi Ok’ont’aleri Oxen3alek am gzaten, doloxe muşis na skidun do kianas namtini terepes na renan Ortodoksepe Fenerişi P’at’rik’xanaşi xeten oktalu noğiraps. Am noğiratenti, Fenerişi P’at’rik’xana ek’umenoba oqopinot viçinop ya otkuten Pap’aşa mteli menceli muşiten mxuci meçaps.

Na guişinasunon steri Pap’ak, Germaniaşi noğa Regensburgis na qu ğarğala muşis; "Muhammedik, namu ağanoba muğu, emuk na muğupeşi doloxe arxvala p’at’inobape do k’oçinoburi na var renanpe iz’iren, Muslimanoba k’iliciten oçinapuşi geçinadu steri." yado nenapeten uoncğoroni ğarğaleret’u. Am nenapeşk’ule Pap’ak, "Krist’ianobas Ğormoti do nosi k’ala ar k’ont’akt’i ren mara Muslimanobas Ğormoti do ç’k’ua k’ala umeç’k’vidoni ar k’ont’akt’i var ren, Muslimanepeşi cihadi nosoni do Ğormotoni var ren." yado ti muşişen didi nenape tkveret’u.