|
MP'OLİŞİ T'RAFİK'İ RAİLONİ SİST'EMAK OÇODİNASUNON
Çkinerk’oçepek, Mp’olişi t’rafik’i arxvala railoni sist’emak oçodinaps yado artnerot isimadepan. Mp’oliş t’rafik’işi k’arta ndğas omonz’inuten na var nixonditen ar xalişi doloxe oqopinu, railoni sist’emaşi p’rojepes manişaloba mogapinu. 2011 3’anas Mp’olis na ren railoni sist’emaşi ginz’enoba jurneçdovit k’ilomet’roşen juroşdojurneçdovit k’ilomet’roşa manz’inasunon. 2011 3’anaşi çodinas, na ip’rojelinu railoni sist’emape içodaşi Mp’olişi nunç’işobaşi p’roblema didopeten içodinasunon. Gebzeşen Beylikduzuşa çkar t’rafik’işi narği un3’iruten do ar bilet’iten igzalinasunon. Aşoten Mp’olis Avrop’aşi beciti metropeşen ar teri aqvasunon.
K’arta ndğas nanç’inerot anşoşidojurneç mot’oroni mankanak t’rafik’işa na ak’aten Mp’olis, andğa na ren 1,6 milyoni avt’omobilişi k’oro3xala 2010 3’anas 2,2 milyonişa manz’inasunon yado isimadinen. 2007 3’anas sumeneç k’ilomet’ro k’onari metroşi mosa şeni ihale oxvenuten ok’iduşa geiç’k’inu ip’laninen. Xolo sumeneç k’ilomet’ro ginz’enobas banlioti t’ramvaişa goktiruten railoni sist’emaşa int’egra3ia oxvenu ip’laninen. 2008 3’anasti jurneçdoxut k’ilomet’roni railoni sist’emaşi ok’iduşa geiç’k’inasunon. 2012 3’anas juroşdojurneçdovit k’ilomet’roşen ginz’e railoni sist’emaş mosaşi omancinu inoğirinen. A3’işakis na ip’rojelinu do ok’iduşa na geiç’k’inu railoni sist’emaş mosapeşi mtelixolo ğirsi, nanç’inerot şkvitmilyaridoşkvitoşdojurneçdoxutmilyoni dolari ren.
Et’udi muşi na ixvenen Beşiktaş-Sariyer, Uskudar-Beykoz, Kadikoy-Bostancişi t’ramvai steri p’rojepeşi finansmani iz’irinu do ixvenu na 2023 3’anaşakis juroşdojurneçdovit k’ilomet’ro nom3xuten ginz’enoba xutoşi k’ilomet’roşa nunç’işasunon. Aşoten ar Mp’olurik limcişi orapes Yenibosna-İncirlişi t’rafik’is na xarcasunon nanç’inerot jurneç dek’ik’oni ora, ndğaşi iroras anşi dek’ik’eşa dvark’inasunon. Varna ç’umanişi orapes jur saat’i na golulun xincişen mek’axtimoni Kadikoy-Kuçukçekmeceşi magzaloba jurneçdoar dek’ik’e iqvasunon. Am p’eriodis sist’emaşa ağani magzalobape do sk’elepeten na imçiranasunon noğaloni zoğaşi nunç’işobasti int’egra3iaten, noğarepeş nunç’işobaşi alt’ernat’ivepe umosi manz’inasunon.
2012 3’anas na ip’rojelinu railoni sist’emaş mosapeşi oçodinuten Mp’olurepeşi nunç’işobaşi derdi, oşis sumeneçdovit nisp’et’iten içodinasunon yado imendinen. 2011 3’anas zoğaşi otirulobati railoni sist’emepeşa int’egra3ia ixvenuşk’ule Mp’olurepeşa ar k’eleşen majuranişa dido raxat’obaten nunç’işasunonan yado xeironi ambari niçinen. Mara nunç’işobaşi derdi k’ala t’rafik’işi derdi artikartis var oxoktimu dvaç’irs do avt’omobilişi oxmarinu var dvark’inu na t’rafik’işi menz’gipoba var içodasunon yado molişinapinen. Yani 2011 Mp’oliş t’rafik’işi z’irapa aşo iqven albat: Avt’omobili na ixmarnanpe t’rafik’işi menz’gipoba k’ala ibodenant’aşi, t’renis na gexedunanpe na idasunonan k’eleşa ora muşis nunç’işasunonan.
|
TÜRKÇE
