|
BALAN3İAŞİ XEMAXVENCOBA: İXİŞİ SORFİ
Dido alt’ernat’ivi na uğun sp’ort’uli speros nanç’inerot eçidovit 3’ana 3’oxle keifoni do ek’onariti meç’ireli na ren ar sp’ort’i dibadu. İxi do solağani na ren iri svas na ixvenen am sp’ort’işi coxo, ixişi sorfi ren. Ginz’e ar pi3arişi jin solağanepe k’ala uoşkuroni na ixvenen am sp’ort’i, kianaşi dido zoğap’icepes irişen dido na iqoropinen sp’ort’epeşen ar teri oqopineri ren. Am sp’ort’i oxvenu şeni dido didi solağanepe var unon. Mara ixişi obaru dvaç’ironi ren. K’ap’et’i na bars ixik, pi3arişi jin na dgin k’oçi zoğaşi jin odansapaps. Sorfişi pi3arişa yextimu do umelurot yelkeni yonç’inuten ixi k’ala gestvinuşa geiç’k’inu k’oçis guri dido nopatkalapaps.
Kianaşi onç’eloni ar sp’ort’i na ren ixişi sorfi, sorfişi pi3arişa mek’ideri sum burmeloni ren. Antepe yelkenişi masari, yelkeni do gyak’nuşi çangali ren. Sorfişi pi3ari, 3’k’aris na inçviren k’onari subuka oqopinu şeni p’oliest’eri varna p’oliet’ileni steri ar malzemepeşen ixvenen do doloxe muşi silik’oniten yipşinen. Sorfişi pi3ari, jilenk’elen masorfes k’uçxe var gyastvas yado p’up’uzoni ixazirinen. K’ap’ulaşk’elenti 3’k’aris manişa idas yado up’up’uzoni ixvenen. Pi3arişi tude do pi3arişi oşkendas balan3ia oqopinuşa na nargen balan3iuri msva na nik’iden ar yank’i iqven. Sorfişi pi3aris 3’oxleşk’elen yelkenişi masari na amulun ar xut’ula uğun. Dido perişi oz’iramoni na iqven yelkenişi masariti oxmaru operpinu şeni dido elast’ik’uri ixvenen. Generaluot 5-6 m2 didilobas na ren yelkeni k’ap’et’i p’oliest’erişen ixvenen. Mjoraşi teşa do ladreşa nuxondinoni ren. Aluminiumişen na ixvenen gyak’nuşi çangali, gyastvinoni var iqvas yado k’auçuk’i men3axeri iqven. Çangalişi jur k’irk’oleri biga k’un3’uli mutepeşişen artikartişa mek’ireli ren. 3’k’arişk’ele muindrik’aşi, yelkeni yonç’inişa na nirgen tok’i çangaliş 3’oxle mek’ireli ren.
Zoğap’icişen otxoneçdovit-çxorooşi met’ro mendranobaşi k’arta svas sorfi ixvenen. Mara sorfi oxvenu şeni namtini k’aidepe do ak’3iape oxvenu beciti ren, am sp’ort’işi irişen beciti spero; sorfişi pi3arişa yextimuten umelurot yelkeni yonç’inu do ixişi meşveluten gestvinuşa oxandu ren. Mara antepe oxvenu şeni menceloni xanç’ali do k’uçxeşi adalepeşi mance oqopinu dvaç’irinen. Mara mamgurapalek, acami ar mamgures jur-sum ndğaş doloxe sorfi dido perpot agurenan ya zop’onan. Entepeşi toliten ar mamgurek gecgineri oqopinu şeni, sap’roni iqvasunon do dido ixandasunon. Aşoten oguruşi p’eriodis dido faras zoğaşa na dololapan mamgurepek nuxondineri iqvanşi gecgineri iqvernan ya tkumernan.
İxişi sorfis oguruşi ora do 3’ana var uğun mara oguruşi irişen k’ai gza ar sorfişi doguronişa oxtimu ren. Am sp’ort’i na imordinu terepes na ren doguronepeşi didopes let’as na iqven xususi ar sist’emaşi meşveluten 3’k’arişi jin steri na ixmarinen sorfişi mat’erialepe iqven. Antepeşi meşveluten oşoluşi şkurna un3’iruten sorfi igurinen. Mamgure k’ala na iqven mamgurepalek k’aidepe oguraps do na ixvenen çilatape astaxolo on3’uranaps. Aşoten ixiş sorfişi k’aidepe manişaburot igurinen.
|
TÜRKÇE
