|
LAZURİ-TURKULİ NENAPUNA
Turkialuri Lazepek, “Lazuri-Turkuli Nenapuna” coxo gedvaleri ar gamaçkvalas maartani fara Mirk’ani 1999 tariğis nages. İsmail Avci Bucaklişi do Hasan Uzunhasanoğluşi coxope na gez’in svara, Akyuz Yayincilik şk’elen gamiçkvinu. Redak’3ia na qu Osman Pizmaşi “Lazuris Masdarişi 3’oxlenmek’idape” coxoni st’at’iati svaras ç’areli ren. Svaraşi go3’otkvala, Ahmet Kirimik ç’areen.
Svaraşi go3’otkvalas Ahmet Kirimik, svaraşi maç’are oqopinot dido fara molaşinaps arxvala İsmail Avci Bucaklişişen. Xolo şukurişi burmes İsmail Avci Bucaklişik, mus na nuşvelu na tkumers k’oçepeşi oşkendas Hasan Uzunhasanoğluşi coxoti molaşinaps. Am xalik k’oçis svara mişk’elen iç’aru yado k’itxva ok’itxapaps. Svaraşi goçinapas; “Lazuri-Turkuli Nenapuna, doloxe muşis Lazuris na ren mteli tkvalape na uğun çodineri ar xanda var ren.” itkven mara, svaraşi muç’o ixazirinuşi burmes; “Lazuri-Turkuli Nenapuna arxvala mpalo do t’ek’nik’uri ar nenaşi xanda var ren do artneri orasti Lazepeşi skidalaşi k’ult’ura, kianaşa do nat’uraşa o3’k’omilu, skidalaşi ğirsepe do ocerupe na o3’iraps ar xanda ren.” ya otkuten ti-muşişen didi nenape ixmarinen. Am metkvalapeti svaraşi seriozulobaşa çkvaneri ar k’itxva meçapaps.
Svaraşi na iz’iren irişen beciti k’ualifik’a3ia, na nirgu odudepeşi burmes N. Marrik 1910 3’anas na xaziru “Lazuri Leksik’oni” coxoni xandaşen do majura svarapeşen molaşinu ren. Mara am odudepe dobağineri k’itxeri t’uk’onna, xemodvaleri ar svara oşkendaşa kogamulurt’u. “Laz Grammar” coxoni svaras na ixvenu steri, şiveşi k’onsep’t’işen svaras u3’ori molaşinu do dominant’uri oxmarinu do Lazuris na ren ubecitoni şivepeşi çkvanerobape svaras gedvalu, nena na ixvenen; “Lazuri ç’areli ar nena oqopinu, goç’k’ondinuten var nijilas yado nodgitinu do am speros na ixvenasunon majura xandapeşa temeli oxvenu” steri noğirape k’ala p’aradoksi uğun.
Svara am xali muşiten, “Lazuri-Turkuli/Turkuli-Lazuri Leksik’oni-Metin Erten” işi coxoten 2000 3’anas na gamiçkvinu majura svara steri, na molişinen iddialuri noğira oxizmet’uşen dido mendra ren. Ar nenaşi gurapa, radio, t’elevizia, gazeta do jurnalişi nena oqopinot oskedinu şeni leksik’oni dido beciti ren. Turkialuri Lazepes oşkendari nananena mutepeşi oskedinu şeni, xemodvaleri ar leksik’oni o3’ipxu dido dvaç’irnan. Varna Lazuris, kianaşen na goiç’k’ondinu do nijilinu majura nenapeşi iqbali aqvasunon.
Ok’vanduşi t’ilifonişi nomeri: 0216 349 43 15
|
TÜRKÇE
