|
OSTVATEN ME3XONT'UŞA GURİ VAR NUXONDUN!
Ostvaten me3xont’inu, sp’ort’menepeşi gamaxtimus na mogapan surat’işi meşveluten çkineri ar park’uris osurat’inu do emuşk’ule jinşen tudeşa gyulut’aşa irişen mendraşa ox3ont’inuşi k’aideşa mecineri ren. Jilentunaşi Avrop’aluri berepeşi sterapeşa o3’k’omiluten sp’ort’iş ç’eşidi oqopineri ren. Oraş doloxes ma3’k’omilepe muşi manz’ineren, xavesoni do p’rest'ijoni ar sp’ort’işi ç’eşidi iqoperen. Ostvaten me3xont’inu, Olimp’ik’uri Qinoraş Sterapeşi 1924 3’anas na ixvenu maartanişen doni i3’opxinen. Olimp’iat'epe do kianuri şamp’ionape, 90 do 120 met’roni t’ramplenepes i3’opxinen.
Ostvaten me3xont’inuşi normepes k’arari meçameri t’ramplenepe ixmarinen. Ostvaten me3xont’inuşi ar k’oçuri gecginalepeş t’ramplenişi ginz’enoba 90 varna 120 met’ro ren. Me3xont’inuşa ağani gyoç’k’inerepe şeni umosi ç’it’a t’ramplenepe ixmarinen. Grup’uri gecginalepes didi t’rampleni ixmarinen. K’arta grup’is otxo ma3xont’ine iqven. İri sp’ort’menis me3xont’inuşi jur hak’k’i uğun. Xut hakemik me3xont’inuşa gamaxtimuşen mtvironi let’aşa gextimuşa eçişakis point’i meçaps. İrişen didi do irişen ç’it’a point’epe gamiğinen. Ar k’uçxe 3’oxle, majura k’uçxe k’ap’ulas burgilepe mondrik’eri oqopinot okti mtvironi let’aşa na gyalen sp’ort’menik otxo point’i manz’ineri eç’opups. Am gextimuşa “Telemark’işi pozi3ia” itkven.
Ostvape mçxu, ginz’e do monk’a iqven. Balan3ia perpot oxvenu şeni ostvapeşi tude sum 3’ali xut’ula aqven. Me3xont’inuşi ostvapeşi mçireloba 11,5 sant’imet’ro ren. Ostvapeşi mçirelobak t’aronişa nuxondinu operpaps. Ostvapeşi ginz’enoba, mastvaleşi t’ani+80 sant’imet’ro oqopinot ixvenen. Ginz’e ostva mağaloba na mogapaps şeni ginz’enoba oxoşkvineri var ren. Xususi oqopinot xveneri dolokunepe do maçumalepe sp’ort’menepes dolokunu na dvaç’irnan malzemepe renan. Modvalupe mastvalepes 3’oxle nandruk’inan yado çiçku iqven do modvalupe arxvala 3’oxleşk’elen ostvaşa mek’ireli iqven.
Macginalek, ramp’aşi k’un3’ulişen dido surat’oni me3xont’uşk’ule havas ginz’e ogzalu şeni ixandeps. Havas rt’aşi ostvape artikartis p’araleli do jin k’ele arm3ika elakteri, xura 3’oxleşk’ele mendrik’eri, burgilepe gontxeri, xancalepe elasvareli do xuraşa men3axeri iqvasunon. Gextimu, elast’ik’uri ar xaliten rak’anişi okti burmeşen k’ap’et’i ar dodgituten, burgilepe mendrik’u do xancalepe gontxuten ixvenen. Gextimuşi svas oktişi oçodinuten mastvalek ar golaktoni manevraten dodgitun. Point’i niçinet’aşi me3xont’inuşi ginz’enoba do t’eknik’aşa artot i3’k’omilen.
|
TÜRKÇE
