|
ROMANİA DO BULGARİA AVROP'ALURİ İQU
Romania do Bulgariak, mutepeşi Avrop’aş ofi3ialuri mak’ature oqopinu havai fişeğepe ostoluten xvames. Romania do Bulgariaşi ok’atuten Avrop’aş Lik’ateşi mak’ature terepeşi k’oro3xala 27 işa manz’inu. Didopek Romania do Bulgariaş ok’atinuşa, P’olonia do çxoro tereşi Avrop’aş Lik’ateşi mak’aturobaşa k’abuli na ixvenu 2004 3’anas na iqu didi omçiranuş p’rosesişi ar burme oqopinot o3’k’ernan. Am çodinaşi xalk’aşk’ule Avrop’aş Lik’ate, ağani mak’atureş ak’atuşa ginz’e orapes nk’ileri iqvasunon ya itkven. 2000 3’anas Avrop’aş Lik’ateşi et’udepeşa na gyoç’k’u Romania do Bulgariak, et’udepe jur 3’ana 3’oxle oçodineret’u.
Romania do Bulgaria şeni, p’roblemepe lik’ateşa mak’aturobaşk’uleti çodineri var ren. Ağani mak’aturepek artot meç’ireli ndğalepe z’irasunonan. 16 3’ana 3’oxle so3ialist’uri sist’emaşen na gamaxtes do p’iasas ek’onomiaşa amaxtimu şeni na ixandeps aya jur dobadonak, xususurot çodinaşi 3’anapes beciti dulyape qves. Mara jur tereşi irişen didi p’roblemapeşen ar teri na ren unizamoba k’ala obodinus, a3’işakis dido beciti mutxanepe var axvenes. Agronomiaşi sek’t’oris do adalet’uri sist’emasti st’ruk't’uruli p’roblemape naqonops.
Romania do Bulgariak lik’ateşi mak’aturoba xelebaten xvames mara dobadonamşine mutepeşis iptineri orapes mak’aturobaşi na nişvenen fursat’epeşi didope var nak’aasunon. 3’oxlenurot moxtasneri nak’otxani 3’anas, Gyulvaluri Avrop’aş terepeşi didopes oxandinuşi hak’k’i var aqvasunonan. Yani oxoşkveri goxtimu aya jur tereşi dobadonamşinepe şeni namtini orapeten imk’ulanasunon. Aya jur tereşen namtini oç’k’omaleş eç’opinuti, emniet’i do şursağobaşi sebebepeten imemnuinasunon. Mak’ature oqopinuşk’uleti unizamoba k’ala obodinuşi temas Avrop’aş Komisiaşi k’ont’rolis iqvasunonan. Unizamoba k’ala obodinus dobağineri k’onari dulya var qvesna jur teresti, lik’ateşi umorderi agronomiaşi sek’t’ori omordinu, nunç’işobaşi sist’emape do gomorgvaşi p’olit’ik’as mxuci meçamu şeni vaadi na ixvenu 50 milyar euroni fonis dork’inuşi risk’i uğunan.
Turkia, Xirvat’ia do lik’ateşa ok’atinu na unon Balk’anuri majura terepe, emi umosi dido oxandu emiti na içven Avrop’aşi dudk’anoni eşo osağinu oçvu şeni ik’azi xveneri renan. Map’olit’ik’epeşi toliten omçiranuşi p’eriodi, st’abiloba do k’aoba k’ont’inent’işi k’artaxoloşa meçamuten Avrop’aşi Lik’ateş ist’oriaşi irişen gecgineri p’olit’ik’a iqu. Mara a3’i, ma3xunepeşi gverdişen didopek omçiranu şeni dido iqu yado isimadepan.
Ar k’ele Romania do Bulgaria ofi3ialurot lik’ateşi mak’ature iqven do majura k’eleti Germaniak lik’ateşi p’erioduri dudmaxvencoba Finlandiaşen go3’umers do Sloveniakti oşkendari geç’areli na ren euro oxmaruşa gyoç’k’aps. Slovenia, 2004 3’anas lik’ateşa na ak’atu 10 mak’atureşen euro na ixmarasunon maartani tere iqven. Avrop’as artneri geç’areli oxmaruşa 1 3’anağani 1999 tariğis 11 tereşi ok’atuten geiç’k’ineret’u. Avrop’aş K’omisiak na golaxtu tutas na gamoçkvu ar goşogoras; inflat’ioni monz’inasen yado derdi meçaps mara euro na ixmarinen terepeşi xalk’ik generalurot artneri geç’areli oxmaruşen memnuni na ren oxoi3’onu.
|
TÜRKÇE
