|
ÇAİ MAGVERDALEPES VAR NİÇİNEN!
Turketuri K'olxepeşi çaiş dixapeş mancepeşi miti skanik, a3’i çai mutepeşi o3'ilapu şeni magverdalepes va meçapan.
Jur 3'anaşen doni Turketişi çaişi p'olit'ik'apeşi ar m3ika iqvas na ti om3'uranute, çaişi mancepeşi osimadu mutepeşiti kagiktiru. 3'oxleni orapes k'urbetis na xen, çaişi o3'iluşi orapes oput'e mutepeşişa na va malen, çai o3'ilu şeni bere-bari va na xolosoni çkva k'oçi na var uqonun Turketişi K'olxepek, çai mutepeşişi o3'ilapu şeni magverdobacepe gorupt’es do namtinepekti oput'e mutepeşis na uğut'es oxorepe mutepeşisti aşo mitxanepe doxunapapt'es. Aşo ğarboni namtini çais mancepekti namtini orapes aşo çaişi dixape muşi gamaçaptes çkvaşi xalk'epes.
Edo aşopeten na moxtu xark'epe k'ala ti namtini orapes p’roblemepe aqvet'es. 3o3ialuri balan3iapeti kak'uixvet'u, K'olxur nenape na ğarğalaps k'oçepeti dixape muşi k'ala na uğut'es k’ont’akt’i mutepeti kamuik'vatet'u aşopeten.
Jur sum 3anaşen doni na iğarğalen gagnapeşi ambarapeten 3’alentuna Turketişi vamapeşen illegaluri çaişi moxtimapa kamuik'vatinu, Turketişi doloxeni xomula çaişi p’rodi3iaşi gamaçamutu aşopeten dirdu. Xususuri sek't'orişi çaişi fabrikapek şara va meçamuten eşo ordoşen ordoşen çai yeçopupan do devletişi didi fabrika na ren Çaykurişi am didi oğmaloni çaişi ğarbiti digverdanu.
Edo emuşeni ki Turketişi K'olxepeşi didopekti çai mutepeşi ya mutepek 3'ilupan ya ti madulyepe okoçapan do entepes o3'ilapapan.
Aşopeten ek’onomiuri mogapa mutepeşiti umosi kai iqven do hemti magverdalepe k'ala va ibodernan do va işişolenan. K'olxuri çaiş mancepe şeni çai dido beciti ar sakvari ren. K'olxuri çaişi mancepek, çaişi o3'iluşi orapeş 3'oxle aşo dixapes dololurnan, mç'ipaşaşi dopağupan muç'o eşo mteli xolo daz'i, tipi mu na opağuşi uğunan na. Ğoberepe muşi mç'ipaşaşi doğobupan, çaiti mç'ipaşaşi eşo drepti drepti 3'ilupan. K'olxuri çaişi mancepek, çaişi magverdalepe k'ala aşo mç'ipaşaşi sakvarepe şeni mtel oras p’roblemi uğunan.
|
TÜRKÇE
