DUDBUT'K'A

"ÇODİNURİ NOĞİRA, TİMOŞLETİNERİ DEMOK'RAT'İK'URİ OXEN3ALE"

Abxaziaş P’rezident’i Sergey Bagapşik, 6 Xrist’anas Soxumis Abxaziaş timoşletinobaşi oçinapu şeni xalk’işi ok’atuten na i3’opxinu mitingis, t’rade3ialuri tkvalaten xalk’uri k’ongres timoşletinoba do Rusia k’ala xolosobaşi p’eriodi şeni Abxazi maktaleşi o3’k’edinu na oxo3’onapaps ar ğarğala qu. Ajans K’avk’asiak, am ğarğalaşi t’ekst’i gedvu. T’ekst’i aşo ren:

Ğirsoni dobadonamşinepe!

Skidaluri becitoba na uğun temapes mteli xalk’işi ok’oibğinu Abxazepeşi t’radi3iapeşen ren. Çkinti andğaneri ndğas seriozuli 3adape k’ala voret. Xususurot amuşeni resp’ublik’aşi maktale, siviluri so3iaşi organiza3iape do p’olit’ik’uri p’artiapeşi Abxaziaş nananoğas xalk’uri mitingi oxvenuşi ini3iat’ivas vumxvacupt. Na içkinen steri, resp’ublik’aşi maktale do xalk’işk’elen dido fara Rusiaşi Federa3iaş, p’rezident’epeş do kianaş 3’alonapeşi p’arlament’epeş, int’erna3ionaluri p’olit’ik’uri inst’it’ut’epeş Abxaziaş Resp’ublik’aşi timeşletinobaş oçinu şeni nek’na ik’ank’inu. Aya, Abxazi xalk’iş oxen3aleşi timoşletinoba do oxoşkvineri omordinu şeni na meçaps israroni k’abğaşi mant’ik’uri ar çodina iqvasunt’u.

Dido 3’anapeşen doni, Stalini do Beriaş çilataşi sebebiten na gombdinit oxen3ala çkini komovogit. Jur 3’alonaşi oşkendas uoxo3’onaloba ağani var ren. Sovietyari Lik’adeşi p’eriodis Abxazia do Okorturaş oşkendas na ren k’ont’akt’obape noğaluri met’odepeten oçodinuşa vixandit. Mariaşina 1992 tariğis Abxaziaşi P’arlament’ik, Okortura k’ala federaluri k’ont’akt’obapeşi temas ar p’roje şeni oğarğaluşa ixazirt’u. Mara coğabi oqopinot lima, genosisi do uk’oro3xoni nç’vinepe momçes. Limaşk’uleni 3’anapeti mtelot manz’ageri resp’ublik’a k’ala artikarturi k’ont’akt’obapeşi formi omordinuşa ikadinu. Çkin golaxtimeri 3’anapes Korturi maktaleşk’elen oxo3’onoba var bz’irit, na imordu mtinobaşa dobağineri oxo3’onoba a3’iti var bz’iropt. Edo xolo Tbilisik imp’erialist’uri arzupeşen xe na var moizdu do ak’t’ivit’e mutepeşiten uoxo3’onalobaşa noğaluri ar oçodinuş 3’oxle muç’o nodgitun onagnu domaç’irnan.

Okortura, nizamuri oqopinot Abxazi xalk’işa gentxalu şeni ixaziren. 1998 3’anas Galişi t’erit’orias, 2001 do 2006 3’anapes Kodorişi vadis na qu askeruli manevrape, xususurot am noğira şeni p’laneri meğinz’ibupe rt’u. Okorturaşi obiek’t’uri oqopinot umant’ik’oni ar xalis dido silaxi muik’idu, uitimatobaşa do endişeşa sebebi iqven. Muzak’ereşi p’eriodis k’eleneri oqopinuşa na ixandeps 3’alonapeti Okorturaş silaxi muik’iduşa nuşvelnan. Uoxo3’onalobaşi k’elenerepeşen ar teris direk’t’i askeruli omxvacinu, muzak’ereş p’eriodişi namtini mak’ature 3’alonapeşa itimati udoskiduşa sebebi iqven. Xususurot am xalepes p’roblema obiek’t’uri do adiluri içodasunon yado var vicert. Am temas, Tbilisik int’erna3ionaluri garantiluri ugentxalobaşi ak’t’is imza geçamuşa na var nanç’en şeni aşo visimadept.

Xalk’i çkinik Okortura, Abxaziaş Oxen3ale mteloras tehdidi na ikips ar 3’alona na ren ç’vineri şinapeten oxo3’onu. Çkinti obiek’t’uri ar mtinobaten, Abxazia do Okorturas oşkendari ar 3’alona oqopinot artot na var axvenenan koxovo3’onit. 13 3’aneri timoşletinobas resp’ublik’ak, ağanmordali demok’rasia na uğun ar oxen3ale oqopinot işekilu. Çkin, mteloras na imorden ek’onomia, na muirden doloxeni p’iasaşi hacmi, na dvaç’irs mteli demok’rat’ik’uri inst’it’ut’epe, nizamuri cari, ak’t’ivuri na imorden siviluri so3ia muşiten mus na dibağun ar 3’alona na ren isp’at’i ikips. Amuşen met’i, Abxazias k’oçinobaşi hak’k’epeş omxvacinus int’erna3iaonaluri standart’epeş op’rat’ik’u, xalk’işi emniet’i o3’ipxinu, ek’onomik’uri do so3ialuri reformepe oxvenu dido beciti na ren miçkinan.

Xolo eşo uoxo3’onalobpeşi oçodinus int’erna3ionaluri p’rat’ik’epes voxosart do çodunuri 3’anapes na ren mengaperi p’roblemape oçodinu şeni uoxo3’onalobaşi k’eleneri 3’alonape artneri oxen3’ales artot oqopinu na var dvaç’irs bz’iropt. Misali oqopinot, Bosnia-Hersek’ia, Serbia-Uçagerma do K’ibrisi memaçenan. K’osovaşi xaliti aşo ren. Çkinda dido fara, Kortu-Abxaziş p’roblemaşi k’arak’t’eri do K’osovaşi p’roblemaşi oşkendas çkar mengapoba na var ren mi3’umernan. Mara Abxaziak çkar oras muşi timoşletinobaşi unonoba şeni K’osovaşi p’roblema oçodinuşi mek’anizma var meşvelu. Am xalik uoxo3’onalobaşi oçodinus na ip’rat’ik’en juronuri standart’i do p’olit’ik’uri stat’ik’oşa dido k’ai ar misali oqopinen. Abxazias, timoşletineri oqopinu şeni ist’oriuli do huk’uk’uri mteli dobağineri mexvacinonepe uğun. Am çkvanerobakti, namtini uoxo3’onalobaşi t’erit’oriapeşen çkvaneri m3’ipxupan.

Xe3alobaşi noğiraşa nunç’işinu şeni na vixandept oras xvala var voret. Abxazia k’ala, Omjore Osetia, Transdinyesteri do Dağlik K’arabağikti timoşletinoba şeni kabği ikips. Mencelepe çkini ok’ovonç’it. Abxaziak cuma resp’ublik’ape k’ala dido k’ont’akt’i na ikips giçkinan. Oxandupe çkini k’oordine p’atminonan do mtini noğira çkinişa mevunç’işatminonan! Muzak’ereş p’eriodişi mak’aturepeşen didopes, Abxazia do Rusiaşi xolosoba ak’iskanenan. Dido mk’itxupan: “Muşeni p’ot’e Rusiaşi nek’naşa ulurt” yado. Çkin dido fara, iri k’ala k’ont’akt’i oxvenuşa xaziri na voret vognapit.

Mara Rusiaş Federa3iaşen met’i çkar mitik, meç’ireli orape çkinis t’erit’orias mo3’qvaşi op’erasioni oxvenuşa var nanç’u. K’oçinobaş yeç’k’vidinuşi tehdidi miğut’esşi çkar mitik Abxazi xalk’işa var nuşvelu. Entepek, limas xarabi na iqveren, mşkironoba do monk’a zabunobapeşi sebebiten na ğurun xalk’i nik’arbasen do sep’erat’isturi oxen3alaşa yedgitasen do Okorturaşa ok’oniktu şeni burgilişi jin gexuneri oxve3’asen yado çves. Dido 3’alonapek mutepeşi timoşletinoba muç’o moges kogoç’k’ondes elbet. Aya entepek guri mutepeşiten isimadan. Çkin t’erit’oriaşa hakimi viqvat yado var ok’ovak’idit, p’etroli do gazi şeniti var ok’ovak’idit. Çkin oskedinu şeni, oxoşkveri omordinu şeni, çkini dobadonas oskedinuşi hak’k’i omancinu şeni ok’ovak’idit. Am hak’k’i movogitşk’uleti, mi k’ala do muç’o k’ont’akt’i p’atminonan yado çkin k’arari meçamu minonan.

Amuşeni, dido fara do 3’oxlenurot çkini hak’k’epe do timoşletinoba oçinuşi temas xalk’i çkinişa omxvacu şeni Rusiaş Federa3iaşa meptit. Noğira çkini, oş3’anurapeş k’ai manz’agerobaşi tecrubeşa, ist’oriuli do k’ult’uruli mirasi do modernuli k’ont’akt’epeşa mexvacinuten Rusia k’ala oşkendari k’ont’akt’i oxvenu ren. Pozi3ia çkini var iktiru; demok’rat’ik’uri timoşletineri ar oxen3ale p3’opxupt. Abxazias, mcveşi orapes na rt’u steri timoşletinoba muşi na içinops, xalk’i muşiş tercihişa hurmeti na ikips do artneri hak’k’epe na aqven iri k’ala k’ont’akt’oba axvenen. Xolo bzop’ont: Abxazi xalk’i timoşletinobaşi gzaşen çkar mitik var gvaktinasunon. Am gza mu k’onari meç’ireli rt’asnati gecginoba maqvanşakis vunk’apaten! Am xalk’uri mitingi noğiras na ok’ovibğitşi ispat’i ren. Mcveş orapes na rt’u steri Abxaziaş Oxen3alek beciti ar p’roblema oçodinapt’aşi artoba oxvenu şeni, skidala çkinişi meç’irobaşa uo3’k’eduten mteli derdepe naşkvinuten çkini şeni xvameri na ren timoşletinobaşi meidanişa na moxtit şeni didi mardi gi3’umert.