|
MEFERET'İK'ELOBA ART'AŞENİS İSAĞEN-İ?
Art’aşeniş Xalk’uri Gamantanuşi Ok’rebulek feret’ik’oşi k’ursi gon3’k’u. Furt’unaşi maxales na guin3’k’u k’ursik, t’erit’oriaşi t’radi3ialuri ar xeşnoxvene na ren feret’ik’o oskedinaps. K’ursişi oxeşnoxvenales na ixandeps k’ursieri oxorcalepek oxorişi ek’onomik’aşa mxuci meçapan. Cumhuriyetişi Geç’k’ap’uroni Doguronis na guin3’k’u k’ursis, jur ust’aluri mamgurapaleşi go3’oncğonerobaten eçi oxorca k’ursieri am xeşnoxvene igurapan. Furt’unaşi maxales na xenan k’ursierepek ar ndğas ovro saat’iş morgvalis igurapan do ixandepan.
K’ursişi oxeşnoxvenales oxorcaluri do k’oçuri zipk’a do roza steri çkvadoçkvaneri dolokunepe imralinen. K’arta ndğas feret’ik’oşi dolokunepeşa int’eresi muinz’inen. Art’aşeniş Xalk’uri Gamantanuşi Ok’rebuleş timçxupeşen Hasan Mahmutoğluk, qinora na ren şeni nandvape m3ika ren mara pukrinora k’ala nandvape manz’inasunon ya tku. Xalk’uri Gamantanuş Ok’rebuleşi feret’ik’oş k’ursi k’ala vitepeten çileri varna uçilu oxorcas ar p’rofe3ia aqves yadoti iris ognapu.
Rizinişi mbela coxotenti na içkinen feret’ik’o, Hindiş k’eprişi nok’epe oxmarinuten xeşt’ezgiyaxis na iberinen mbela ren. T’erit’oriaşi cinconi k’ult’uras mcveşi p’eriodepeşen doni dido beciti rt’u. Am t’erit’orias çaiş agronomiaş 3’oxle, eşo-aşo k’arta oxoris feret’ik’o iberinet’u. Andğaneri ndğas çai dorgeri na ren dixapes Hindişi k’epri ixaçket’u. Feret’ik’o, ketenişen mç’ipe ren mara emuşen otxo fara ginz’e skidala uğun. P’ambuğoni mbelaşi skidalaşenti ginz’e skidala uğun feret’ik’os.
Art’aşeniş Xalk’uri Gamantanuşi Ok’rebulek, feret’ik’oşi k’ursi iptinerot 2003-2004 gurapaşi 3’anas gon3’k’eret’u. Am k’ursepe, xalk’işk’elen na nişvenenşen dido inç’elinu. K’ursişi ginz’enoba 750 dersişi saat’i ren. K’ursişi oxeşnoxvenalepes, 50 k’onari xeşt’ezgiyaxi na uğun ok’rebulek, t’radi3ialuri Rizinişi mbela omraluten, raionişi xalk’işa ek’onomik’uri faide meçamu noğiraps. K’ursierepes unonan na, So3ialuri Şvela do Solidarobaşi Pondi do Kianuri Bank’aşenti k’redi yaç’openan.
|
TÜRKÇE
