|
K'OLXOBA.ORG AR 3'ANERİ İQU…
K’olxuri k’ult’ura do am k’ult’uraşi jur emaneti nena na ren Lazuri do Margalurişa mxuci meçamu şeni 1 İgrik’a 2006 tariğis oç’andunişa na gyoç’k’u “kolkhoba.org” ar 3’aneri iqu. Mutepeşi p’ap’ulepeşen na duskides xvameri anderi, skirepe mutepeşişa nunç’işinuşi narği na zdips k’ult’uraşi gurami maamagepek ar 3’anaşen doni şurdoguriten, çkar mutu umeşvenuten seri do ndğaleri ixandepan. Antik’uri K’olxuri nenape na var uçkinanpes oguruşa meşvelinu, andğaneri ndğaşakis nanaşnenaşi originis xanda na var axvenenanpeşa gza o3’iru, na ixvenen xandapeten entepes guri dolodvinu, çkvaneri namtini nenapeten na oç’andinaps mara nena çkini oz’iru na var unon ofi3ialuri inst’it’ut’epeşa Lazuri muç’o iç’andinen o3’iramuşi noğiraten maamagepek didi ar azmi, cera do k’ararobaten amagi meçapan.
K’olxobaşi şuri na doluz’in do K’olxi oqopinu mu tkvala ren dido k’ai na uçkin k’oçepeşk’elen na i3’opxinen sait’ik, Lazuri modernuri skidalas na ixmarinen ç’andaşi nenaş seviyeşa nunç’işinuşi misia gejidumers. Ar 3’aneri 3adaş çodinas inç’elinas do ixandinasna Lazuri nenati na imordinen do ambarişi nena oqopinot na ixmarinen isp’at’i ikips. Ç’areli lit’erat’ura 3’opxineri na var uğun ubedineri Lazuri, folk’loruli nenaşen skidaluri nenaşa gyoktaps. Originaluri, goktireli, goşogoraluri, dok’ument’aruli xususoba na uğun ambari do t’ekst’epe mak’itxepeşi nç’elaşa no3’iraps. Modernuri nenapeten na ixvenen k’arta xandaşa nanaşnenaşi originiten misalepe meçaps. İdeologiuri ok’ok’idinu do p’olemik’ape uoxvenuten k’ult’uruli ç’andina ikips. Oşkendari ç’k’ua do k’olekt’ivi xandaten meç’ireli na renpes muç’oşi geicginen k’aixeşa oxo3’onapaps.
K’olxoba.org, ofi3ialuri nenapeşa do albonepeşa var arxvala nanaşnenapeşa becitoba na meçaps, Turkuli ç’andina formalit’e şeni na ikips, Turkuli nena k’ala oç’anduniten K’olxuri k’ult’ura var iskedinen yado na icers ar sait’i ren. Dido adamepeşa nunç’işinu, dido moik’itxinu, oçinu, oçkinu, çinoberi iqopinu steri p’op’ulist’uri narğepe na var uğun ar gagnaşi çodina ren. P’olit’ik’uri do kianuri simadape ar k’ele naşkvinuten nanaşnenape çkini moxtasneri nesilepeşa omordinuten naşkvinuşi noğiraşa na numxvacups misioneri ar grup’i ren. Aşo gagna do oxo3’onoba na uğun adami do inst’it’ut’epe k’ala k’arta ç’eşidi k’olekt’iuri oxanduşa xaziri na ren dek’lara3ia na ikips ar 3’opxa ren.
Xanda çkinden, gecginoba Allahişen ren.
|
TÜRKÇE
