DUDBUT'K'A

"KURDİ OXEN3ALE İK'İDU ÇKVA"

7. P’rezident’i do 12 St’aroşinaş askeruli maktaleşi go3’oncğoneri na ren Kenan Evrenik, Jilentuna İrak'işi T’erit’orialuri Kurdi Maktaleşi Dudmaxvenci na ren Mesud Barzanik na zop’u “Turkias, timoşletineri Kurdi oxen3aleşi simadaşa oxvamç’k’inu dvaç’irs” yado nenape şeni “Na minonan k’onari var bzop’ont’at, Kurdi oxen3ale ik’idu çkva” yado k’oment’ari qu. Turkias moxtasneris federaluri sist’ema aqopinen na zop’u Evrenik, “Amuşen oşkurinu var unon. Turkialuri Kurdepe timoşletineri iqvasunon ya zop’onan. Var axvenenan! Artneri hak’k’epe niçinasna muşeni Turkiaşen ok’ui3’k’an? Kurdepe çkini cumalepe yado oşinu domaç’irnan” yado ğarğalu.

Kenan Evrenik, Barzanik na meçu Kurdi oxen3ale, Kerkuki, PKKşi temapeşi oxo3’onapape ok’oment’aru. Barzanişi, “Kurdepes timoşletineri oqopinuşi hak’k’i uğunan edo xolo Turkepe, Farsepe do Arabepes am simadaşa omxvamç’k’inu dvaç’irnan” yado ognapa muşi şeni Evrenik antepe zop’u: “Barzanik na zop’ons İrak’işi Kurdi oxen3ale ren. K’oçepes p’arlament’i uğunan-i?, uğunan. Go3’oncğoneri mutepeşi p’rezident’i i3xunu-i? Talabani, i3xunu. Barzanikti Kurdepeşi dudmaxvenci iqu-i?, iqu. Çkin na minonan k’onari ‘var’ bzop’ont’atnati, ekonaşis ar Kurdi oxen3ale ik’idu. K’abaxat’i çkin miğunan, ora muşis na dvaç’irs var p’it. Am ora şk’ule oxvenuşi mutu var miğunan. ‘Akonaşi İrak’işi let’a, Kurdi oxen3ale’ yado izop’inen mara, İrak’iş doloxe ar federa3ia iqvasunon albet. 3’oxlenoras antepeşa mç’ita p’asap’ort’i mepçit. K’arta oras k’ai i3’k’edinu. Ma antepeşa aşo oğodinu var minont’u. Em orapes reak3ia meçamu unt’u. Barzanişa a3’i muç’o reak3ia meçamu unon var miçkin. Mt’eri k’ala var gağarğalenna ok’vak’idaginon. Emuşeni oğarğalu unon. Galendulyaş Naziri na ren Abdullah Gulişi, ‘Mt’eri çkini k’alati oğarğalu domaç’irnan’ yado nenape muşis vak’ater.”

Evrenik, Turkias Kerkukişa uamaxtimuti ç’irs ya zop’u. Evrenik, “Kerkukis hak’k’epe miğunan, entepes vumxvacaten mara xe gedvuşa razi var vore. Turkiak Kerkukişa amaxtasna kianaşi iri terepek memodgiturnan” yado simada muşis umxvacu. 7. P’rezident’i Kenan Evrenik, Demok’rat’ik’uri So3iaş P’art’iaşi (DSP) p’arlament’işa amaxtimuşen uraxat’oba var bzdaminon yado simada muşiti tekrari qu. DSPşi p’arlament’is oqopinuk Turkiaşa ginz’e oras feide mogapasunon yado na isimadups do “DSPk p’arlament’işa amaxtasna mutu var iqven” na zop’u Evrenik, nenape muşis aşo noqonu: “İptineri orapes ok’obupe iqven mara tamo tamo diçoden. Turkias p’olit’ik’uri gomorgva içiçkanen, p’arlament’işa k’omunist’i na renti, mamarz’gvane na renti, meislame na renti amulun. Entepeti moxtan do amaxtan. P’artia p’arlament’işa var amaxtasunonna muşeni ik’iden. Cumaluri oskedinu oguru mç’irnan. 'K’ota oşis şkvitişa iginç’inen' ya bzop’i.” Andğaşakis Leyla Zana k’ala var bğarğali na zop’u Evrenik, “Zanak randevu var mak’vandu. Mara mak’vandasna bğarğalap” ya zop’u.

Turkia moxtasneris federaluri sist’ematen maktalinen na zop’u Kenan Evrenik, dido 3’ana 3’oxle t’erit’orialuri valoba şeni k’anonişi menceli na uğun k’ararname gamaviğit mara Ozalişi hukumetik emus tasdik’i var meçu ya zop’u. Evrenik, “Am t’erit’orialuri valobape federa3ia iqvasunon yado visimaderet’it. Amuşen oşkurinu var unon. Turkialuri Kurdepe timoşletineri iqvasunon ya zop’onan. Var axvenenan! Artneri hak’k’epe niçinasna muşeni Turkiaşen ok’ui3’k’an? Kurdepe çkini cumalepe yado oşinu domaç’irnan. Muk’onari 3’ana şk’ule var miçkin mara Turkiak moxtasneris federaluri sist’emaşa gvaktinen” yado ğarğalu. Turkepe do Kurdepe ar 3omişen yeçkindineri renan na zop’u Kenan Evrenik, am tema şeniti antepe zop’u: “Çkin k’oçepeşi ok’ortu var miçkinan. Askerepeşi doloxe Kurdepe orgeneralobaşakis yextimeri renan. Edo xolo Generalurik’urmaişi Dudmaxvenci na rt’u Cemal Gurseli şeniti 'Kurdi' zop’ont’es. Mtini ren-i var miçkin mara çkin eşo ar ok’ortinu var miğunan. ”

DSPşi Diyarbakiriş Dudmaxvenci Hilmi Aydoğduş oç’opinuşa sebebi na iqu “Turkiak Kerkukişa amaxtuna çkin mevodgitut!” yado nenape muşişa reak3ia na meçu 7. P’rezident’i Kenan Evrenik, “Am nenape k’abaxat’i ren. Am nena muşi raxat’i ok’omixu” ya zop’u. Evrenik aşo noqonu: “Aşo oğarğaluşa naqonasna k’anonis mu ç’arsna eya ixvenen. P’art’ia, dudk’anonişi hukmepeşa ant’i ak’sionepe qvaşi nink’ilen. Emuşeni sep’erat’istoba uoxvenu ç’irnan. Varna p’arlament’işa amaxtimuşi şansi gondinupan. Ekonaşis çkvaneri ar Kurdi oxen3ale ik’idu. Mara amuşi k’abaxat’i çkin miğunan. İrak'işa na ixvenu çodinuri harekat’is Amerik’as usepe çkini oxmaru unont’u. Hukumetik nena meçu mara na meçu nena var qu. Aya dido p’at’i iqu. Amerik’ak a3’i çkinden amuşi intik’ami eç’opups.”

Evrenik, 12 St’aroşinaşi askeruli darbe şk’ule “P’rezident’i” na rt’u p’eriodis am simadapes omxvaceret’u: “Kurdi yado mutu var ren. Entepe germaluri Turkepe renan. Tkvala Kurdi, 3’alentunayulvas na skidunan çkini adamepek, germapes gulut’esşi k’uçxe mutepeşiş “kart kurt” yado xonarişen gamaxtimeri ren. Emuşeni aşo ar coxoten molişinerenan.”