DUDBUT'K'A

SARPULİ.ORGİK OÇ'ANDİNUS KOGYOÇ'K'U

Ar xalk’i na 3’opxups irişen beciti 3’opxak nena ren, uk’açxe ist’oria, k’ult’ura steri k’rit’erepek mulun. Mara nenaşi oqopinoba çkvaneri ren, nena meğureri xalk’ik, muç’o eşo mtelixolo maxaroba muşi meğureri xalk’i steri iqven, kianaşen kaezdimeri xalk’i steri iqven, emuşeniki k’ult’uraşi do dixaneburi oxandupepes nanaşnenaşi çkvarebas dido mç’ipaşaşi becitoba uğun. Am dulyaşi mxuci meçamalepek, nanaşnena mutepeşişi do k’ult’ura mutepeşişi maqoropalepek, ar xalk’i na 3’opxups k’rit’erepe; arxvala ar jur birapaşi otkvalu va na obirute, ar jur oç’k’omaleş oçinapute, p’op’ulizmate va na rek’lamaşi xra3kobate, megalomaniaşi dudiş-mo3’ondobate, k’ap’et’işi bedixaman3obate steri ondepete na va i3’opxenşi mtini dido k’ai mç’ipaşaşi uçkinan.

Çxonapili, Lazişi gamantaneri p’iconi k’oçi, irixolo Noğediş Sarpulepeş maqoropale, çxonapili K’araliş İlyaşişi k’ap’et’işi manebra Çakirişi Xeyriş coxo, xolo muşiş motaşk’elen oput’e, xalk’i, nanaşnena do k’ult’ura muşişk’elen dido k’ap’et’işi iskedinen. “www.sarpuli.org.tr.tc” coxoni sait’iş mancek Çakirişi Hayrik oput’e muşiş, nanaşnena do k’ult’ura muşiş maqoropale ar ağanmordale na ren sait’i muşişi oqopinobate dido mç’ipaşaşi inagnen. Sait’i muşiş doloxe Lazuri nenas şuri do guri muşite mxuci meçaps do k’ult’ura muşisti eşo. Sait’i muşiş coxo Sarpuli uğun mara na qveren oxondupepete, gagna do dodgimoba muşite kianaburot ar misia uğun.

Xopa, Noğedi do Sarpis Lazuri k’ult’uraş doloxe dido mç’ipaşaşi p’ozi3ia na uğunşi mtini dido k’aişa uçkins Xayri cuma çkinis. Sait’i muşiş doloxe Sarpişi oput’e şeni k’arta svas na va iz’iren oçinapuşi, gamantanuşi, k’ult’uruli nenaşi t’ek’st’epe uğun. Muşi k’elen do meleni Sarpuli Laşa Vanilişk’elen eşamaleri suretepe çkar sotiskanis va gaz’irenan Sarpiş suretepe renan do k’oçik am suretepes menda3’k’omilute Lazonas va na Sarpis va rt’asnati muç’o eşo Xelimişi Xasanişi “Xopurepes” coxoni leksi muşis na golulun gagnaburot doptkvat na “Sarpis z’inşa guri çkimiş gverdi” ya atkven. Radio Sarpuli coxoten radioşi oç’andinuti ikips Xayri Cuma çkinik, Lazepeşi ist’oria, vidoepe, mtelixolo Lazuri, biografepe, Çernobili, musafiriş oç’aruşi sup’ara, Lazepe, Xelimişi Xasani, Kazim Koyunci, link’epe steri burmepeş o3’opxinute dido xampa ar sait’i do3’opxeren.

Çakirişi Xayrik, nanaşnena do k’ult’ura muşi dido k’aişa uçkins. Xarit’aş incinerobas na ik’itxups Xayri cuma çkinik, na moxtasunon 3’anapes branşi muşis dido çkinaperi k’oçi na iqvasunon do xolo maqoropaloba na uğun Sarpi, nanaşnena muşi do k’ult’ura muşi şeni umeç’k’vidurot dido mutxanepe na qvasunonşi mtini dido mç’ipaşaşi kaiz’iren. Am gagnapas Xayri cumak, k’arta ç’eşidoni asimila3ia, degenera3ia, uk’arakteroba do monotipoba ixvenutina, nanaşnena do k’ult’ura muşi oskedinu şeni na ixandeps ağanmordale Lazi nesilişi guroni ar mamxvace oqopinot meç’ireli xanda ikips.

K’uçxe bedineri moxti Çakirişi cuma çkini, skani steri ağanmordale Lazepe na ren şeni dido xeleba miğunan, gza skani gon3’k’imeri gaqvas, Ğormotik megişvelas do megixvamas. (Amin)



                                                                                                                                                              TÜRKÇE