DUDBUT'K'A

ANT'İ-İMP'ERİALİST'URİ AR T'RADİ3İA: DENİZ GEZMİŞ

1968-oni ağanmordaluri go3’oncğonerepeşen ar teri na ren Deniz Gezmişi, 24 K’undura 1947-s Ayaşis dibadu. Mamgurapale ar ocağişi bere rt’u. Am sebebiten geç’k’apuroni doguroni çkvaneri noğapes, liseti Mp’olis ik’itxu. 1965-s Turkiaş Madulyeşi P’art’iaşa mak’ature iqu. 1966-s Mp’olişi Universit’et’işi Huk’uk’uri Fak’ult’et’is ok’itxuşa kogyoç’k’u. 31 Mariaşina 1966-s Ank’araşen Mp’olişa na igzalu Çorumiş Beledieşi makosalepek Taksimiş monument’işa çelengi naşkves. Deniz Gezmişi, madulyepeşi oşkendas rt’u. Entepes mxuci meçu. “Turk-iş”işi maktalepe na ip’rot’est’inu mit’ingis p’oli3iakşk’elen iç’opinu.

19 3’anağani 1967-s, Turkiaşi Na3ionaluri Mamgureluri Federa3iaşi bina hukumetişk’elen yedieminişa meçaminu ip’rot’est’inu. Am p’rot’est’işi sebebiten iç’op’inu do mk’ule p’erioditen moloxunes eya p’oli3iaş 3ent’ris. 22 3’ilva 1967-s na i3’opxinu K’ibrisiş mit’ingişi moment’is Amerik’aşi Ok’ont’aleri Oxen3aleşi bandara na ç’vuşi idiaten Aşik İhsani k’ala arto iç’op’ines do mk’ule p’erioditen moloxunes entepe. Huk’uk’uri Fak’ult’et’işen megabrepe muşi k’ala artot, 30 3’anağani 1968-s Magektale Mahuk’uk’epeşi K’erk’eli k’idu. 7 Mirk’ani 1968-s, Mp’olişi Universit’et’işi Fenişi Fak’ult’et’işi k’onferansuli salonis na i3’opxinu ar ok’oxtalas na ğarğalu Oxen3aluri Naziri Seyfi Ozturki na op’rot’est’u şeni iç’opinu. 2 Pukrik’aşakis xap’isxanas molaxuneri skidu. 30 Pukrik’a 1968-s Amerik’aşi Ok’ont’aleri Oxen3aleşi 6. filo na p’rot’est’u şeni, na guin3’k’u davaşen muçitu. 12 Mbuloba 1968-s Mp’olişi Universit’et’is xe gidvinu mamgurepeşk’elen. Mamgureluri go3’oncğoneri oqopinot mamgurepe k’ala arto rt’u. Xe gedvaluri k’omisiaşi doloxe rt’u. Mp’olişi Universit’et’işi Senat’i k’ala, Baltalimanis na ixvenu ğarğalapeşati ak’atu.

Mp’olişa na moxtu Amerik’aşi Ok’ont’aleri Oxen3aleşi 6. filo op’rot’est’uşi ak3iapeşa ak’atu. 30 X3alas iç’opinu. 20 St’aroşinas nişkvinu. Turkiaş Madulyeşi P’art’ias na iskedinu k’elenobas “Na3ionaluri Demok’rat’iuli Gektala”şi fik’ri inebu. Ak3iapes arto na rt’u megabrepe muşi k’ala Magektale Mamgureluri K’erk’eli k’idu. Samsonişen Ank’araşa Mustafa Kemal coxoni gzalaşa ak’atu. 28 3’ilva 1968-s Amerik’aşi Ok’ont’aleri Oxen3aleşi didelçi Kommerişi moxtimuşi oras, Yeşilkoyiş haerop’ort’is na i3’opxinu p’rot’est’opeşi sebebiten iç’opinu. 31 Pukrik’a 1969-s, ağani universit’et’iluri reformuri k’anonişa nodgitinu şeni Mp’olişi Universit’et’işi Huk’uk’uri Fak’ult’et’işi mamgurepeşk’elen na i3’opxinu xe gedvus go3’oncğonu. K’abğapes iyaralu. Ozabunaleşen imt’u.

Sinan Cemgili do Huseyin İnani k’ala arto (TXMA) “Turkiaşi Xalk’uri Moşletinobaşi Armia” k’idu. 11 3’anağani 1971-s “TMXA”ş coxoten “İş Bank’a”şi Ankara-Emekişi piliali na go3’uğu mitxanepeş doloxe rt’u. 4 Mirk’ani 1971-s, Balgatis “Tuslog”işi inst’it’ut’işen otxo Yank’uri malimeşi omt’inuşi dulyas ak’atu. Gemerekis, megabre muşi Yusuf Aslani k’ala iç’opinu. 16 X3ala 1971-s na geiç’k’u TXMA-1şi davas, Turkuli Cezaşi K’anonişi 146. maddeşa na medgitinuş idiaten, 9 Guma 1971-s go3’ok’iduşi ceza niçinu. Megabrepe muşi Yusuf Aslani do Huseyin İnani k’ala arto 6 Pukrik’a 1972 tariğis, Ankara 3ent’ruli Xap’isxanas go3’ok’idinuten iğurinu.

Na momixtepan k’arta 6 Pukrik’ak, ağanmordalobaşi ant’i-imp’erialust’uri t’radi3ia ar fara çkva gomoşinapan.



                                                                                                                                                              TÜRKÇE