DUDBUT'K'A

K'ARSİ-TBİLİSİ-BAK'UŞİ K'İNAŞŞARAŞ P'ROGET'İ

“K’inaşi Met’aksişşara” oqopinotti na icoxinen K’arsi-Tbilisi-Bak’uşi k’inaşşaraşi p’roget’i, Avrop’a Turkiaşen K’avk’asia do Oşkenda Aziaş Resp’ublik’apeşa mek’iruşi noğiraten p’laneri ren. Turkia-Okortura-Azerbaycaniş oşkendas p’etroli do gazi şk’ule t’erit’orialuri meşvela omordinuşi becitoba na uğun p’roget’is, yulva do gyulvaş oşkendas na ren irişen ek’onomiuri, irişen mk’ule, irişen uoşkurnoni gza oqopinuşi xususoba uğun. K’arsi-Tbilisi-Bak’uşi k’inaşşaras p’roget’i Turkia, Azerbaycani do Okorturaşi k’inaşşaraş şebek’epe ok’um3xvinuten sum dobadonaş oşkendas na ren meşvelaş omordinuşa mxuci meçasunon. Xususurot ek’onomiuri speros beciti na ren am p’roget’i, Okorturaşi ek’onomiaş omordinuşa nuşvelasunon do xoloti Rusiak, mcveşi Soviet’uri dobadonapeşa na ip’rat’ik’ups t’erit’orialuri mek’irobaşi p’olit’ik’aşen moşletinu şeni Azerbaycani do Okorturas nargasunon.

K’arsi-Tbilisi-Bak’uşi k’inaşşaraş p’roget’işi çodinas dido na va doskidu şeni do Tbilisis, Azia k’ala Avrop’aşi şkas umek’vaturot xtimaş oqopinu na kaisimadinen K’arsi-Tbilisi-Bak’uşi k’inaşşaraş p’roget’iş 3’oxleni akit’is imza na gedvesşi ambari şeni, usakvaroba muç’o eşo 3aş yextimeri steri na uğunan K’arsiş k’oçepes dido xeleba aqves. Beledieşi Dudmaxvencik, Turkia k’ala Okorturaşi doloxe direk’t’i k’inaşşaraşi xat’t’i na ixvenasunon do am xat’t’iti Azerbaycanis na uqonun xat’t’is ok’um3xvinu na kaisimadinen do Mbulobaşi tutas geç’k’apurot jur 3’anaşi doloxe oçodinu na kaisimadinen am p’roget’ik K’arsi mordasunon ya tku. Beledieşi Dudmaxvencik xolo, “K’arsurepeş mtelixoloşi medi am p’roget’is mek’ireburot kogui3’opxu.” ya tku do oğarğalu muşis aşo naqonu; “A3’i şk’ule K’arsuri oqopinot, vit 3’anaşen doni na pçumet’it do mtinişiti muç’o eşo çkini şeni t’raji k’omediuri ar xalişa na niktu am oçvaluk, gecginoba do xelebate içodasunon yado medi do xeleba miğunan. Emuşeniki çkin mtelixolo K’arsurepes dido xeleba miğunan, hukumeti çkinis didi mardi vu3’umert.”

”Am oğodobate am p’azaris dido seriozulot mendap3’k’edurt to gebdgiturt” na tku Beledieşi Dudmaxvencik oğarğalu muşis xolo aşo naqonu; “Çkini şeni, K’arsi şeni dido dvaç’ironi ar p’roget’i ren. Muşeniki, am p’roget’ik K’arsişi oşletinu iqvasunon. Muşeniki, ticaret’i muzma va iqvas na k’oçepe çkinis ek’onari narği aqvenan. K’oçepe çkini dido p’at’işi fuk’ara renan. Emuşeniti çkin Beledie oqopinot baji va yemazdenan do tudelonxvenaş xizmet’epeti na visimadit steri naqonurot va maxvenenan. Dido p’at’işi xalis voret, usakvaroba 3as yextimeri miğunan. Am p’azari na koguin3’k’uşi oras, am p’azarişi doloxe na rt’u do odidani şeni hukumetişk’elen 3’oxlenurot noğapeşen na kogui3’opxineret’u K’arsis, fabrik’aşi gon3’k’imu şeni mitiskanik va mulut’u. Muşeniki, p’azarişi p’roblema rt’u do p’roduk3iaş geç’areloba dido mordineri rt’u. Tucarikti am oğodoburot Duzce va naşkumet’u do K’arsişa va mulut’u, mara am ağani p’azari guin3’k’aşi am p’azari şeni na ixandasunon ağani fabrik’ape koguin3’k’asunon do xolo emuşi xolosoni sek’t’orepeti iqvasunon. K’arsiş k’oçepeşi usakvaroba koguimk’ulunasunon. Am p’roget’işi irişen beciti oğodoba muşiti aya ren. Amuşeniki dido xelabas voret, guri elamaparpalenan. Vumendupt do minonan ki dido ordoşen ixvenas. Çkinti 100 3’anaşen doni na m3’irit narğepeşen mevuçitat. Qini limaşi p’eriodis Sabçoeti k’ala manz’ageri na vort’it do uk’açxeti Armenia k’ala manz’ageri na viqvit şeni irişen p’at’işi dezavant’aji maqves. İrişen çodinaşi noğa viqvit. Dido k’oçepe çkinik çkva sotxanepeşa mendatxtes, dido p’at’işi zararepe maqves. Dido 3’anapeşen doni geç’areliş ç’iç’it’a oxmaru şeni ek’onomiaş xezdimoba p’it mara 100 3’anaşen doni na miğut’es izmoce çkini iqvasunon bolaki. A3’i şk’ule Turkiaşa amaxtimu K’arsişk’elen iqvasunon. K’arsikti, Turkiaşi irişen beciti xtimaş 3ent’ri iqvasunon yado visimadupt. Amuşeniki dido xelebas voret”.