|
OXOKTERİ AR ZABUNOBA: NEVROZİ
Nevrozi, so3ialuri xali do ak’sionepes na numğizaps do k’oçis şuri muşişen zabuni vore yado na oçkinapaps şuroni ar zabunoba ren. Ok’ok’idinupek gza na naçinen şuroni zabuni oqopinu ren. Aşo zabuni oqopinus şuroni na iqven steri xuraloni nişanepeti aqven: Tiş o3’k’unu, guriş parpalu, ontxoru, nuzuli, obarbalu, seksualuri qinoba k’ala uxe3aloba steri. Zabunik didopeten, çodineri na var ren skidaluri k’abğişen gonç’k’ireli var iqven. Şvela şeni xuras na yeçkindun arazepe oçodinu şeni şuroni şvelati oxvenu dvaç’irs.
Nevrozi; psikanalizis, berobaşi p’eriodis seksualuri skidalaşi guri meç’voni oğodapeşa mek’ireli şuroni zabunoba oqopinot itarifinen. Unonoba na o3’iraps temaulepe k’ala entepe ç’k’uaştude na şinaxups temaulepeşi şuroni ok’ok’idinuşen yeçkindun. Psikologias, o3aduri nevrozi maartanot Pavlovi do manuşvalepe muşişk’elen 3xovarepes na i3adinu oşart’onuş xalepeşa na mengaps do adamepeş nevrozi na moloşinaps xalot işinen. Andğaneri ndğas, oşkvidoni histeri, fobiş nevrozi, dolo3’inoş nevrozi do histeri nevroziş ç’eşidepe yado işinen. Ak’t’ueli nevrozi, t’ravmaş nevrozi do k’arakt’eriş nevrozişi otarifupe xoloti doloçkineri var ren.
Nevroziş t’ermini maartani fara Culleni şk’elen ixmarinu. Nevrozepe ginz’e orapes namtini lezionepeşa na var nik’irinen fonk’sionuri şumaşi zabunobape ren yado işinu. Nevrozepe, nosişi zabunoba na itkven do originali muşi ok’oxvapapeşi şuroni nişanepeşen na mulun do nevrozepeşi xususi ar sinifi na oteşkilaps psikozepeşen meç’irobaten ok’uirtinet’u. Cullenişi simadapeşen dido tesiri na ağodu Pinelişi xeten nevrozepeşa organiuri ar sebebi mek’iruşa geiç’k’inu. 19. oş3’anuraşi majurani gverdis meorgane simadapek gecginoba moges. Am gecginobak, zabunoba organiuri ar sebebi uoz’iruşen nevrozişi t’ermini ojiluşi tek’amuli o3’iruşakis naqonu. Emuşk’ule psikiat’ri, mcveşi anat’omiuri şemapeşi toliten işekilu do genet’iuri fak’t’orepe do xuraluri temaulepe na nim3xvinu meorgane k’oment’arepe noqonapu. Andğaneri ndğas, şuroni zabunobape so3ialuri cinconi ren na zop’ons simadaşi grup’apeti koren.
Nevrozişi ok’rebules na ren şuroni ok’ok’idinu mek’ireli na ren jileni şurişçkinaşi ebat’epek lok’aluri vasat’i, ek’onomiuri fak’t’orepe do genet’iuri xususobapes xe mudumers. Freudişi toliten şumaş zabunobapeşi cincepe berobaşi p’eriodiş k’ut’alobapes ren. Ok’ule, morderi ar k’oçis na yeçkindun ar şumaş zabunoba, em k’oçis aşo ar illet’işa temauloni na ren o3’iraps. Mara xoloti şumaş zabunobapeşi sebebepe arxvala ferduri var do so3ialuri na renti no3’iraps: So3iaşi nizamepe k’ala ok’vak’idu, renobaşi k’abği steri. Şumerot reak’sia o3’iru, ferdis mus na unonpe k’ala gomorgvaşi nodgitinupeş oşkendas na iqven ar ok’vak’idinuş çodina ren. Seksualuri sebebepeşen na yeçkindun şumaş zabunobape (omraluş organepeşi ar zabunobaşa na niç’opuşi gya3’onoba, odorinuşi şkurnaş xalepe, ok’iskanu do k’iskanobaş deloba, uxe3aloba, seksualuri qinoba, muşi xuras dido oqoropinu -narsist’oba-, sadist’oba, mazoşist’oba, şumaşi zabunobaşa mek’ireli macera maqoropaloba) seksualuri ak’vandupes gyobaz’ginu do otxozinuş sebebiten na yeçkindun seksualuri st’resobapeşen gamulurnan.
|
TÜRKÇE
