|
MESİRİŞ MACUNİŞİ FEST'İVALİ
Turketişi mskva noğapeşen artneri na ren Manisa, “mesirişi macuni” muşiten kianas dido çinoberi ren. Manisas t’radi3iuri ar fest’ivaliti uğun “mesirişi macunişi” coxoten. Am fest’ivalişi ma-466-ani muşiti an3’i i3’opxu. An3’i şakis lok’aluri na ren am fest’ivalis açkva int’erna3ionaluri k’ualifik’a3ia uğun. Na mek’ilu 3’anapes na rt’u steri an3’ineri fest’ivalişi çodinasti, “Sult’anişi Camişi” kubbe do minare mutepeşişen xalk’is “mesirişi macuni” istolinu. Edo t’radi3iuri am rit’ueliten an3’ineri fest’ivaliti diçodu. Turketişi Meclisişi Reisiti, Sult’anişi Camişi” kubbe do minarepeşen na istolinu macunepe oncubalu şeni xalk’i k’ala rt’u. Reisis dido şansi uğut’u do 37 3’ali mesirişi macuni incubalu. Reisik,” Andğa dido berek’etoni ren” yado noz’i3inu. Muk na incubalu mesirişi macunepeşen namtinepe çkva terepeşi ofi3ialuri k'oçepesti meçu.
Xalk’isi nenaşen mesiriş macunişi ist’oria şeni dido ç’eşidoni informa3iape vognapt mara, entepe mcveşi svarepes ç’areli na var renan şeni, 3’ori var maşinenan. Yavuz Sult’an Selimişi çili muşi do K’anonişi nana muşi na ren Hafza Sult’an Manisaşa ideen do ekonaşi golva muşis izabuneen. Zabunoba muşişa şvela oz’iramu şeni em orapeşi çinoperi mteli ekimepe mulunan mara mutu var axvenen. Hafza Sult’ani am perişani xalişen moşletinu şeni çodinurot Merkez Efendişa ulunan.
Merkez Efendik 41 ç’eşidi lilveşen ar p’rep’arat’i xazirops. Edo aya na imxors, Hafza Sult’anik, 15 3’aneri k’ulani steri, ik’ap’eteps. Am p’rep’arat’is ti mesirişi macuni itku. Am mesirişi macunişi ist’oria şeni çkva rivaetepeti ignapen. Entepeşen artişen ti bğarğalat.
Merkez Efendi, Hafza Sult’anik Manisas na oxvenapu k’omp’leksi z’irops. Coxo muşik umosi ginz’e skidas yado Hafza Sult’anis ar Daruşşifa ok’odapuşi ç'k’ua meçaps. Merkez Efendişi gagnapa Hafza Sult’anis k’ai mo3’ondun do astaxolo emri meçaps Daruşşifaşi ok’odu şeni. Daruşşifaşi ok’odu jur tutaşi doloxe, dido mk’ule p’eriodis içoden. Merkez Efendikti em orapes delepes na duxvenapu p’rep’arat’i zabunobaşi çodinas na ren zabunepes koçu. Am macunişi reak3ia muşi ek’o k’ai do astaxolo iqvaşi, zabuni na var ren xalk’is ti eya meçamuşi k’arari ignapen.
|
TÜRKÇE
