DUDBUT'K'A

"ANK'ARAS NA T'K'VA3ERET'U AR BOMBİ"

24 K’undura 1942 tariğis, saat’i nanç’inerot 10:00-s Ataturkişi Bulvaris ar bombi t’k’va3eren. Dido mitxanepe steri, em oras bulvaris na gulut’u Franz Joseph Hermann Michael Maria von Papeni do çili muşi, tude ingrimoneren. Mtel xalk’i steri, entepesti mu na iqu 3’oxle var oxva3’onerenan. Ar oxorca iyaraleren, k’ap’ula mutepeşis. Dido mk’ule ar oraş k’ule, bombişi noğira Von Papeni na rt’u oxui3’oneren. Von Papeni rt’u, menceloni Hitleruli Germaniaşi Didelçi Ankaras.

P’olisepek astaxolo gyoç’k’erenan goşogorus şurdoguriten. İptinerot, na t’k’va3u bombik ar mitxani na stiku, z’irerenan. Meqonerotti sum nok’uçxeni z’irerenan. Ar teri rt’eren tude na z’in ar p’ist’oli. Astaxolo eya ezderenan. P’olisepek dulyaş noqonu var naşkverenan. Hafie şuroni namtini dobadonamşinepeti nuşveleren p’olisepes. Jur çkvaneri nok’uçxeni çkva z’irerenan. Ari rt’eren ar ncaşi jin eşo na go3’obun ar teri k’uçxeşmodvalu. Eti ezderenan. Masumani nok’uçxeni rt’eren ar qole, ar çkva ncaşi jin na go3’obun do namtini orapesti ixik na ok’an3’uraps. Eti ezderenan. Na t’k’va3u ar bombi, ar p’ist’oli, ar teri k’uçxeşmodvalu, ar qole. 3’oxle ak’onari içkineren. Qole do k’uçxeşmodvalu artneri mitxanişi rt’u-i? Eşo rt’u na, p’ist’oliti artneri mitxanişi rt’u-i? P’ist’oli, qole do k’uçxeşmodvalu artneri mitxanişi rt’u na, am k’oçi bombi na ot’k’va3inu k’oçi rt’u-i? P’olisepek o3’k’ederenan delilepes mç’ipaşişa, saat’epeş morgvalis. P’ist’oli, k’uçxeşmodvalu do qole ren artneri mitxanişi yado rap’ort’i ç’arerenan. P’olisepes ar çkva beciti çkinati aqverenan. Qole rt’eren sunnetoni ar mitxanişi. Em oras, am k’oçi Muslimani rt’u-i? Ebraeli-i? Muslimani rt’u na, svaloni Muslimani varna xark’işi Muslimani rt’u-i? Svaloni Muslimani rt’u na, (………i?) steri k’itxvapeten saat’epe mek’ileren. Em oras dvaç’ireren am k’oçişi minobaş oguru.

P’olisepe udobağine doskideren. Malimuri do 3iviluri muxbirobaluri k’erk’elepekti gyoç’k’eren goşogorus. Mtini nenaten, irişen beciti nok’uçxeni qole var, k’uçxeşmodvalu rt’eren. K’uçxeşmodvaluş mark’aten mak’uçxeşmodvaleşi coxo do adresi igurinasunt’u. Mak’uçxeşmodvalekti qoleşi mance şeni çkina meçasunt’u. Eşoti iqu. Mqvilobaşi dulyaşen jur ndğaş k’ule, p’olisik ognapu qoleş manceşi coxo. Masuik’aste rt’u Omer Tokati, Mp’olişi Universit’et’iş Huk’uk’işi Fakult’et’işi mamgure. 25 3’aneri na rt’u am ağanmordalek Turkiaşi dobadonamşine iqveret’u jur 3’anaş 3’oxle. Mak’edoniaş Uskupişi Turkepeşen rt’u. P’olisik ar çkina çkvati ognapu: “Omer Tokati, Turkiaşi dobadonamşine oqopinuşen 3’oxle, Yugoslaviaşi K’omunist’uri P’art’iaşi mak’ature rt’eren.”

Masuikast’eşi minoba na iguru p’olisik, goşogorus gyoçk’eren am dulyaşi oşkendarepe. Omer Tokatişi jur xolosoni megabre Suleyman Sağoli do Abdurrahman Saymani oz’iru arçkva beciti rt’u. Entepeti rt’erenan artneri t’erit’oriaşi emigrant’i, Omer Tokati steri. Turkiaşi ağani dobadonamşinepe rt’erenan. Entepek informa3ia meçerenan. İstiklali kuçes na geladgin Sovietyari Dudk’onsuloba k’ala k’ont’akt’i miğunan ya tkverenan. Namtini coxopeti meçerenan. Sovietepeş Mp’olişi Dudk’onsulobas, arkivişi ofi3eri oqopinot na ixandeps Gerogiy Pavlovi do Sovietyari k’ommer3iaşi t’anima3’irale tirobaşi eksp’ert’i Leonid Kornilovi iç’opineren. Goşogoras igurineren ağani coxopeti. Entepeşen ar teri rt’eren Mp’olis na xen Sovietyari P’resaşi at’aşe İsmail Ahmedovi. Turki do Muslimani na rt’u İsmail Ahmedovik oxo3’onaperen mtel dulya. Omer Tokatişi dulya rt’eren 3’oxle, k’urşumi ostolu Von Papenis. Ok’uleti mpulaşi bombi oxmaruten imt’asunt’eren. Omer Tokatik am p’lani uktireren uçkinerot. 3’oxle mpula oxvenu, ok’uleti p’ist’oliten k’urşumi ostolu unt’eren. Na var uçkit’u ar mutxa rt’eren. Xes na uğut’u mpulaşi bombi var, menceloni ar bombi rt’eren. Am mqvilobaşi map’lanepes unt’erenan Omer Tokatişiti oğuru. Mara emus var uçkit’eren aya. Uçkinerotti ti-muşi iqvileren. Na qvilasunt’u mitxaniti, uçkinerot moşletineren. Na oxoi3’onupe aşo rt’u. 3’ori ren-i, çilata ren-i, var içkinen. Na içkinen ar mutxa rt’u. Delilepe do k’oçepe perpot iz’ireren. Delilepek, am dulyaş k’ap’ulas Sovietyari muxbirobaş k’erk’eli rt’u yado o3’irapt’eren. 3’ori rt’u-i? var içkinen.

Murenki Svitzerlandiş Amerik’aş Ok’ont’aleri Oxen3aleşi (AOO) dudelçobaşk’elen AOOşi Galendulyapeşi Nazirobaşa na incğoneret’u 12 Mirk’ani 1942 tariğoni ar t’elegramak, dulya eşo na va rt’u o3’iropt’u. A3’i na oxoi3’onapu am t’elegramişi toliten dulya, Adolf Hitlerişi mxuci meçamuten şefi Heinrich Himmlerişk’elen ip’laneren. Em p’eriodis, Yugoslavias xe gedvaleri rt’u Germanurepeşk’elen. SS-k ixmareren k’omunist’i na osağapt’u svaloni agent’epe. Am agent’epek k’ont’akt’i qverenan Yugoslavuri k’omunist’uri p’art’izanepe k’ala. K’omunist’i Serbiuri, Xirvat’uri do Yugoslavuri çkvadoçkva xalk’epeşi p’artizanepek imendi qverenan entepeşa. Entepeşi referansitenti ekonaşis na ixandept’u Sovietyari dip’lomat’epe do k’onsulobape k’ala k’ont’akt’epe qverenan. Omer Tokati, Suleyman Sağoli do Abdurrahman Saymani k’alati ik’ont’akt’erenan. Von Papenişi mqvilobaş k’ule agent’epek, Turkuli p’olisik perpot masuik’aste z’iras do k’ap’ula muşisti Sovietepek dginan ya oxo3’onas yado mtel nok’uçxenepe gon3’k’imerot naşkverenan. Mqviloba aşo det’alurot ip’laneren. Dulyaş k’ap’ulas Sovietepeşi xe ren yado, Turkuli p’olisis ocerapu şeni, mtel dvaç’irobape ixveneren.

Muşi dobadonaş didelçişa suik’asti ge3’opxuten, Heinrich Himmleris mu noğira uğut’u? Jur noğira uğut’u. Na içkinen noğira rt’u; Turkia, Amerik’anuri-Englizuri-Rusuli megabrobaşen omendranu do Germaniaşa nonç’inu. Na var içkinen noğirati rt’u, Adolf Hitleri seriozuli ar muxalifişen moşletinu. Ar kvaten, jur k’vinçi oğurinu yani! Eşo varna aşo. Z’iropt-i? Mu k’onari menceloni do ç'k’ualoni rt'at nati, k’arta dulya na ginonan steri var iqven!