|
ŞAXSOBAŞİ OK'OXVOBA: PSİKOPATİ
Psikopati mcveşi orapes nosişi k’arta zabunobaş formi na moloşinapaps ar t’erminot ixmarinet’u. Andğaneri ndğas psikopati, psikiatris empati do vicdanişi dvark’inoba k’ala k’arakt’erize na ren ar şaxsobaşi ok’oxvoba oqopinot itarifinen. Psikopatiş tkvala, Grek’uri psych yani “ç’k’ua, şuri” do pathos yani “derdi, o3’k’unu” şen omraleri ren. Psikopati itkvaşi, şaxsobaşi anomali varna p’at’ologia guişinen.
Şaxsobaşi ok’oxvoba na omç’unanpe, “şaxsoba na i3’opxen ağanmordalobaşi 3’anapeşen doni, so3ialuri gomorgvaşa adapte na var axvenenan k’oçepe ren.” Psikopati na omç’un k’oçişati, gomorgva muşis na uqonun k’oçepeşati meç’iroba na meçaps şaxsobaşi ok’oxvoba ren. Şaxsobaşi ok’oxvobape oçinu şeni sum temeluri nişani iqven: K’arakt’erişi ok’oxvobapeş mtelot oqopinu, skidalas umeç’k’vidu onaqonu do m3ika oktiru, so3ialuri adapta3iaş oktiru.
Şaxsobaşi ok’oxvobapeş dinamik’as so3ialuri fak’t’orepe do ocağuri k’ont’akt’obapes (ofisi oktiru, xapisoba, askerişa oxtimu, oçilu/okimocu, ok’ui3’k’u ç.m.) didi becitoba uğun. Namtini somatiuri zabunobapes, fiziologiuri ok’oxvobapes, alk’olizmas do nark’omanipeşi becitoba do psikojeni fak’t’orepeşi becitobati ugonç’k’ondu uk’ors. Normaluri şaxisepes çkar p’at’ologiuri xalişa sebebi na var iqven do mk’ule oraş doloxe k’ont’roli na ixvenen şuroni t’ravmape, şaxsobaşi ok’oxvobapeş manz’inuşa, normaluri skidalas ginz’e oraloni ak’t’iviteş ok’oxvobaşa sebebi iqven.
Psikopatiuri şaxsoba temelurot, etik’aşi normepeşen met’i do ant’i-so3ialuri tema na uğun xususobapeten içinen. Am xususobaşi namtinepe aşo ren:
Ekst’remi notesiruşi menceli do k’ai ar ç’k’uaşi format’i
Uğnose osimaduşi nişanepeşen na ren deluzioni do mengaperi nişanepeşi varenoba
Oceroni uoqopinu, perpot m3udi otku, ugurone ak’sionepe, çkvaneri gomorgvas çkvaneri coxope oxmaruten ti-muşi oçinapu
Mesulobaşi umancoba (nizamuri ar dulya do finansuri şart’epe uo3’opxinu)
P’at’ologiuri k’onari na ren egoist’oba do ti-muşi oxo3’onuşi dvark’inoba)
K’oçepeşi oşkendas na uğun k’ont’akt’obas uonç’eloba, empat’i uoxvenu, hisepe muşis tutuloba, so3ialuri k’ont’akt’epes p’ragmat’ist’iş onç’elu
Vicdani do oncğoreşi dvark’inoba
Doloxeni ak’sioni, sap’ara menceli do tkvalapeşen oguruşi ugecginoba
Perpu gonç’k’irinoba do amuşa mek’ireli na yeçkindun manank’apoba
Ti-muşişi do majura k’oçepeşi emniet’i na var inç’els ak’sionepe oxvenu
Adiluri sicilis monz’inoba (oç’opinu, moloxunu steri adiluri ç’arapeşi renoba)
Umusait’oni mot’iva3iapek na nunğizups ant’i-so3ialuri ak’sionepe
Alk’oli şvaşi fant’astik’uri do ink’raxoni ak’sionepe oxvenu
Dido ç’it’apeten na gicginen ti-niqviluşi guri gedvinupe
Ti-muşi şeni xususi na var iqven, m3ika na ak’aten seksualuri skidala
Mtelar skidalaş p’laniş noqonus, moxtasneriş molaşinus ugecginoba
Şaxsobaşi ok’oxvobapeş seiris, oraş doloxe artikarti k’ala sva na iktirups k’ompenzasioni do dek’ompenzasionişi p’eriodepe iz’iren. Skidalaşi şart’epe do k’ai ar dulya na uğun psikopatiyape, ginz’e 3’anapes k’ompenzasioniş p’eriodis iqvernan. Aşo iqvaşi, em k’oçepeşi ak’sionis gok’un3xoni ar nişani ixosarinen. Entepes normalurot axandenan do ocaği gya3’ipxenan. Mara xoloti dido na iz’iren dek’ompenzasionişi p’eriodişa niginen. K’linik’urot dek’ompenzasionişi p’eriodi, sp’ont’ani fazepe do p’at’ologiuri reak’siape steri iqven. Sp’ont’ani fazepes yaçkindinen, gok’un3xoni çkar stena va rt’aşi. Şaxsobaşi ok’oxvoba na omç’un dido k’oçik, aşo fazepeşa nunç’işu şeni amagi meçaps. Am fazepeşi do reak’siapeşi monk’anoba do naqonuşi ora çkvadoçkva iqven, namtini oras dolonepeşi do tutapeşi gomorgvas naqonops.
Andğaneri ndğaşakis şaxsobaş ok’oxvobapes, mteli eksp’ert’epeşk’elen k’abuli xveneri ar t’asnifi var uğun. Mara generalurot psikopatiape; Sik’loidepe, Astenik’epe, Şizoidepe, Paranoidepe, Epilept’oidepe, Histerik’epe, Unaqone psikopatiape, Ant’i-so3ialuri psikopatiape do K’onst’it’usionuri axmak’epe yado itarifinen.
|
TÜRKÇE
