|
GAGAUZEPEŞİ TURKOBAŞ AVANT'AJİ!
Lima ğura tkvala ren, p’at’işi oragadu tkvala ren, mutus na va irgun urgapa tkvala ren, ipti limaşi uqoropa maqvasunonan, ant’ilimabaşi do mo3’qvaşi osimadu domaç’irenan. Doloxe çkinis mo3’qvaşi, cumalobaşi, oxeleşi osimadu maqvasunonan do çkinti am osimadepeşi mancoba domaç’irenan. Vana, limaşi qoropate, didi menceloni manz’agerepe çkini mt’eri çkiniş o3’opxinute, aşo ucgine didi dobadonapeş ant’iqoropaşi p’olit’ik’apete, mendrane imp’erialist’uri dobadonape manebra çkinişi o3’opxinute, arxvala legalurot di3xirma3’u3’onale imp’erialist’uri oxen3alepeşi xes na okaçun Ok’oxtaleri Xalk’epeşi P’arlament’os quci do toli menda3’k’omileri şvena na uğun do antepes na mengaps p’olit’ik’ape vana osimadupete mutu va iqven, va gomoç’k’ondan ki irişen p’at’işi manz’ageri çkinik irişen k’ai mendrane mzaxali çkinişen ucgişi k’ai iqven namtini orapes vana mtelixolo orapes. Mtinişi skidalas mu iqven, muepe p’eret, muşi oxvenuşi ondepe go3’omiz’inan, namu hak’k’epe miğunan, namu hak’k’epe va miğunan, namu gzaşi doloxe voret, muepe domaç’irenan do na sotxanis voret? Xalk’i çkini şeni, k’ult’ura çkini şeni, nananena çkini şeni dido mencelonişi k’rit’ik’a oxvenuşi miğunan.
Moldovak dido ç’it’a oxen3ale ren, maxaroba muşiti xolo eşo. Ek’onomiuri, p’olit’ik’uri, demok’rat’ik’uri xali muşiti dido morderi va uğun mara ak’o ç’it’a oxen3aleşi doloxe na skidun Gagauzişi xalk’is muç’oşi ek’o k’ult’uruli hak’k’epe aqu yaşi va visimadatşakis am mtini mç’ipaşaşi komiçkit’asunonan ki k’ult’uruli hak’k’epe k’oçineburi hak’k’epeşi oğodoba 3’opxups ar xalk’i şeni, kianaburi hak’k’epe ren Ğormotişen moxtimeri. Edo Gagauzişi xalk’işi xali şeni otkvaluşi didope miğunan mara namtini ist’oriuli mtinepeşi otkvalute am dulyaşi jin ar m3ika gebdgitat.
Sabçoeti na goşibğu orapeş k’ule Gagauziaşi p’roblemati kogamaxteret’u oşkendaşa, muç’o eşo namtini Sabçoetişen gamaxtimeri oxen3alepes doloxe na iqu steri. Mara Gagauzepes ar çkvaneroba aqves entepes na va mengaps? Gagauzepek miti k’ala kabğa va qves, k’arta oras 3ent’ruli hukumet’epe k’ala k’aişa iqves, p’olit’ik’uri dulyapeten k’ult’uruli hak’k’i mutepeşi yezdamu şeni dido meç’ireli orapeşen kogamaxtes. Ugagnoni sep’arat’ist’obaşi gzas va gedgites an3’ineri dğalepes xolo stena muşi na naqonups T’ransdinyest’erişi p’roblema steri uoçodinu ar gzaşi doloxe va amaxtes. Muşeniki, mutepek Rusi va rt’es do Moldovenepeşi didopekti et’nik’uri, nenaburi, lit’erat’uruli, ist’oriuli oqopinot Romaniaşi Romenepe k’ala dido k’ap’et’işi cumalepe t’es. Aşo mç’ipaşaşi balan3iapeş jin na elidgineret’u mutepeşi xvameri dava şeni dido nosoni ar met’odi okaçes.
Antepe so3iologuri mtinepe renan mara antepeş meti irişen muimi ar çkvaneroba ren ki, eti Gagauzepek iri turli mxuci kaezdes hem Rusiaş k’elen do hemti Turkiaş k’elen. Mara Rusiaşi mxuci meçamu mutepe şeni dido çkvaneri iqu. Gagauzepek, e’tnik’uri oqopinot Turkepe k’ala cuma na ren xalk’i ren. Turkişi na3iak kianaşi doloxe rak’ami muşi dido na uğun xalk’epeşen ren, Gagauzepek Rusepe k’ala ist’oriuli do xolo religiuri dido k’ap’et’işi ok’oxtimeri renan. Yaniki jur k’ele xolo dido menceloni mance uğunan, am kianas xvala va renan, umancene va renan. Dido ginz’eşi var mara Turkişi na3ia şeni arm3ika dovisimadat na bz’iratminonan am avant’aji mutepe şeni muç’oşi k’ai na ixmarupan. İrak’işi doloxeni ar mcixi Turkmeni k’oçi şeni, entepeşi k’ult’uruli hak’k’epeşi mogapu şeni xe mutepeşişen na mulun irixolo oxvenu şeni dudi do t’ani opaşups ofi3ialuri ideologiak, doloxeni çkvaneri xalk’epeş nena do k’ult’ura mutepeşişi oğuramu şeni xe muşişen na muxteps iri xolo ikips. Gagauzepek am kianas şansi na uğun na3iapeşen renan, Moldovak demok’rat’ik’uri ar oxen3ale va ren do eşo ant’idemok’rat’ik’uri oğodobaşi p’olit’ik’apeş oxvenuşi menceliti va uğunan. Mis uçkin bekim entepesti aqvasunonan ar dğas.
|
TÜRKÇE
