DUDBUT'K'A

HİSURİ DOLOXVOBA: MELANK'OLİA

Melank’olia, na var ixveninu noğirapeş k’ule k’oçis na ağoden şuroni xali ren. Şurişi nondaru, gurişi meç’vinu, xvala dodginu ononuten na naqonops skidalaşen omendranuşi xali tkvala ren. Melank’olia, k’ut’ali ar kederiş doloxe huzunoni, narği na zdips, xvala, uimendoni ar k’oçis na omç’un xali ren. Melank’oliuri k’arakt’eroni k’oçepek xeleberi var iqvernan. Xvalanoba, so3iaşen omendranu do k’oçepeşen omt’inu 3xunupan. Majura k’oçepe k’ala xolosoni k’ont’akt’i oqopinuşen imt’ernan. Skidala upşu do uğirsoni a3’onenan. Kederi, uxeloba do uğirsoba n3’irupan. Melank’olia depresiaşa nikten do monk’a depresiape ti-niqviluşa sebebi iqven.

Hisuri doloxvoba na omç’unanpes huzunoni ar nunk’uş sureti aqvernan. Tolepe do p’ici tudeşk’ele go3’akideri iqven. O3’k’omilu muşi upşu do mxucepe muşi naşkvineri ren. Kederoni varna utkvaloni z’irapa uğunan. Am k’oçepes gemzuloba do udobağinobaşi hisi aqvernan. Çkar mutu uonç’elu, raxat’i uonciru, uxuzuroba, uk’araroba, uimendoba do iştağişi gondunu, doloxeni st’resoba steri nişanepe iqopinen. Am xususobapeşi mtelixolo ar k’oçis var iz’iren. İrişen gebaz’goni xususoba ren k’oçis ti-muşi uğirsoni do udobağineri a3’onu. Majura xususobapeşen dido na iz’irenpe skidaluri xela gondinu, k’artoras doç’k’indineri oqopinu, irmutxaşa p’at’inobaten o3’k’omilu ren.

Melank’oliaşi galendo na iz’iren nişanepe, dobadu k’ala moxtas nati so3ialuri sebebepeten iqvas nati k’oçişi renoba do majura k’oçepe k’ala na uğun k’ont’akt’epe na goşogoraps ar o3’k’omilu ren. Melank’olik kianaşa moxtimuşa, kianas met’k’oçinuşa çkar valori na var naçen, kiana do majura k’oçepe k’ala k’ont’akt’epe na ik’itxvaps do antepeşen ç’vini na aqven, na aşkurinen renobaşi st’at’uşen mteloras uoceroba na omç’un, çkaroras ti-muşi steri na var oqopinen yado na isimadeps do izmons k’oçişi xali ren. Melank’olik xuzuroni oqopinu, sakini ar skidala oskedinu şeni xvalanoba unon. Mara xvala iqvaşiti skidala do k’oçepe k’ala na ren k’ont’akt’epe muşi k’itxvapu do mteloras osimadu, ti-muşis ok’abaxat’inu, renobaşi sebebi oguru steri odudepeşen çkaroras sakinobaşa var nanç’işinen. Narğepe do st’resepe muşi var içoden.

Oğodape, skidala do k’oçepeşi doloxe oqopinuşen galendole umenfaat’oni do unoğironi ar ma3’k’omile do maz’ire oqopinu itercixups. Na var içoden eziet’i muşi, upşulobaş omç’inu do huzni muşi eya na var açodinen kederepeşa dologvak’irs. Melank’olik’i hisoni ar k’arakt’erişi mance ren. Adamepe k’ala k’ai k’ont’akt’epe oxvenu unon. Mara unat’uraluri k’ont’akt’epe, uoriginali minobape, mask’epe, nazik’obaşen dvark’ineri uosimadoni ak’sionepes nagaşi k’ont’akt’i oxvenuşen xe dozdaps do ti-muşi k’ala doskidun. Arndğas nat’urali, samimi, şuri muşis na iqucaps do eya gale na meğalups adamepe k’ala onagu imendups mara uimendoni ren muşenido na skidun so3iaş nizamis aşo ar mutxanis oxvamç’k’eri var ren. Artikartis na icers adamepeşen na i3’opxups so3iapes mask’epe var gidginaşi raxat’i var ixvenen.

Melank’oliuri k’arakt’eri na uğun k’oçepes skidalaşa uonç’eloba, nokaçoba do meç’irdoba aqvernan. Doloxveri ar şurişi xaliş doloxe iz’irenan. Moxtasnerişa uimendoba k’ala uçareloni do zevaloni na renanşi hisi aqvernan. Skidaşi mance uoqopinoba, renobaşi noğira uoz’iramu do ti-muşi uo3’opxinuşi şkurna melank’oliaşa sebebi iqven. Ti-muşi var a3’opxinaşi, aya oxvenu xe muşis var t’aşi uçareloba gvak’iren. Ğuraşen uomt’inu, renobaşi ant’i na ren varenoba varna çkaroba k’aixeşa uçkin. Ğurak çkarobaşi hisi yoçkindaps. Ğuraşi osimadu melank’oliuri k’arakt’eroni k’oçepe çkar na var naşkumers şeni, kiana irişen k’ai na ik’oment’arups k’oçepe melank’olik’epe renan.