DUDBUT'K'A

OKORTURAS SOROSİŞİ MEĞİNZ'İBU!

Amerik’anuri sp’ek’ulat’ori George Sorosik, Okorturas 2003-s na ixvenu “vardişi gektala”s akt’iuri roli na aqu oxo3’onapu. George Sorosişi pondiş dudmaxvencobati na ikips Sorosik, Rusiaşi radio Svaboda-“Ti-moşletinoba”şa na meçu int’ervius, Okorturak “vardişi gektala” şk’ule ek’onomiuri p’roblemape n3’iru nati a3’i k’arta speros imordinen ya tku.

Rusiak Okorturaşa ambargo na gedvu, muşi energiaşi ğarapeşa sabot’ajepe na qu, nat’uraluri gazi umeçamuten na oşkurinu na oxo3’onapu Sorosik, murenki Okorturaşi xe3alak mteli meç’irobapes gyocginu ya tku. Amerik’anuri mafinansek Okorturaşi mcveşi P’rezident’i Eduard Şevardnaz’ek ti-muşişa k’abaxat’epe na gedvu, oxo3’onapu. Sorosik “gektalaşen 3’oxle, uk’anonobapeşa nodgitinu şeni Şevardnaz’e k’ala artot vixandi. Mara Şevardnaz’eşi xe3alas var mek’arbinu ruşvet’i do uk’anonoba. Am dulyas gecgineri var iqu” ya tku.

Sorosik gektalaşen 3’oxle do ok’ule Okorturas akt’iuri roli na aqu do finansurot mxuci na meçu otkuten, murenki entepe dido muinz’inu ya tku. George Sorosik Okorturas ginz’e p’eriodi şeni i3’k’edinaşiti, dobadonaşi 3’oxlextimu do gecgineri oqopinu şeni, muk na meçu mxucepes mitik na var o3’k’ens, ognapu.

Okorturaşi a3’ineri xe3alak 2003-s na ixvenu do udi3xironi na içodu şeni “vardi” coxo na geidvinu gektalaşi p’eriodis George Sorosişi coxo, na meçu ek’onomiuri mxuciş sebebiten, gamaxteret’u do Sorosi işineret’u gektalaşi maxvancepeşen ar teri oqopinot.



                                                                                                                                                              TÜRKÇE