DUDBUT'K'A

AR FİLMİ: "COXİNA"

Suriyeşi cinconi Amerik’anuri filmişi rejisori Mustafa Akkadik 1976 3’anas na yeşiğu “Coxina” ren dido beciti ar filmi, Muslimanobaşi maartani p’eriodi na oxo3’onapaps do iri muslimani k’ala majura religiaşi k’oçepes oseyru na dvaç’irs. “Coxina” dido faras iseyrinas nati k’arta faras maseyrepes dido k’ai na a3’onenan sinemaş ist’oriaşi irişen k’ai noxvene filmepeşen ar teri ren. Muslimanobaşi dobadinu do omralinu na oxo3’onapaps filmik 31 3’anaşen doni sinemaşi maseyrepes guri duluç’vaps. K’aixeşa na içkinen steri, Muslimanobaşi ocerus, Hazreti Muhammedişi surati oxvenu yasaxi ren. Am sebebiten, Hazreti Muhammedişi surati var iz’iren filmis. Muşi xonariten dialogepeti var ignapen filmis. Murenki emus na unt’u mesajepe ignapen k’oçepes muşi çilepe, k’ulani skirepe do sicalepeşi p’iciten filmis. Anthony Quinnik osağaps didi ust’alobaten Hazreti Muhammedişi cumadi Hazreti Hamzaşi roli filmis.

Finansuri varenobaşi sebebiten, Mustafa Akkadik z’ireren meç’ireli ndğalepe. Mitişen var az’ireren şvela, am filmi oçodinu şeni. Murenki Libiaşi go3’oncğoneri Muammer El Kaddafişi şvelaten, içodineren filmi. Muşi originalis na nungaps p’lat’ope ixmarineren filmis. Mesela Hazreti Muhammediş p’eriodişi Mekkeşi p’lat’o ok’idu şeni nanç’inerot otxodogverdi tutaşi morgvalis ixandinineren. Libia do Fasis yeşiğineri ren filmi.

Muslimanobaşi cincepe na oxo3’onapaps aşo ar filmi oxvenu var iqveren perpu. Mustafa Akkadik z’ireren reak3iape Hollyvoodişen. Mustafa Akkadik quci meçeren İslamişi çkinerk’oçepeşi nenapes, filmişi k’arta p’ro3esis. Filmi şeni beciti ar xinci ren İslamuri kiana do Yulvaşi şkas yado na izmont’u Mustafa Akkadik aşo tkumert’u, 1976-s na meçeret’u ar int’ervius: “Dop’i am filmi, çkimi şeni ren ar muşeburobaşi ondi do emuşeni. Ar xvena oqopinot, filmis na uğun muşeburaluri ğirsepeşen met’i, ist’oria, ambari do dramati uğun emus. Mtel entepe k’ala artot, uğun ar muşeburaluri k’ele, çkimi toliten, Gyulvas na skidun ar Muslimani oqopinot, Muslimanobaşi m3xadelobape oxo3’onapapu, çkimi anank’eni rt’u yado viceri. 700 milioni (1976) macere na uqonut’u nati, m3ika çkineri ar religia rt’u do am xalik gomoşaşapt’u. Gyulvaşa xinci na iqvasunon am ambari oxo3’onaponi vort’i yado vizmoni.”

Rejisori: Mustafa Akkad; P’roduseri: Mustafa Akkad; Avt’ori: H.A.L. Craig; Masağalepe: Anthony Quinn, İrene Papas, Michael Ansara, Johnny Sekka, Michael Forest; Musik’a: Maurice Jarre; K’inemat’ografia: Said Baker, Jack Hildyard, İbrahim Salem; Edit’ori: John Bloom; Mak’ortale: Filmco İnternational Productions İnc., Tariği: 1976; Ginz’enoba: 177 3’uti; Nena: İnglisuri, Arabuli; Biuçet’i: 10,000,000 Amerik’anuli dolari.



                                                                                                                                                              TÜRKÇE