|
AR FİLMİ: "CENNETİŞİ MAPANOBA"
Xalk’işa Cvaronepeşi ogzalapeşen ambari meçamu şeni xveneri ar filmi na ren Cennetişi Maponobak oxo3’onapaps, Cvaronepek na k’ides Yaruşalemişi noğa Selahaddin Eyyubik muç’o go3’uğu Yaruşalemiş Mapanobaşi xeşen. Filmik oxo3’onapaps 12. oş3’anuraşi Cvaronepeşi ogzalape, Cvaroni ogzalapeş k’ule Yaruşalemişi xali do jur k’elek muç’o menda3’k’ert’es am limapes. Sumi religia şeniti Ğormotoni na işinen t’erit’orias Krist’ianepe renan xemoşletineri, filmik na oxo3’onapaps p’eriodis. Artneri p’eriodis, Brit’anias mark’inoba na ikips Baliani muik’itxups şovalie na ren muşi baba Godfreyik do Yaruşalemis mo3’qvinoba oçvu şeni, muşi k’ala artot moxtas yado uç’andeps eya. 3’oxle nodgiteri na rt’u Baliani ok’ule gzas gedgitun muşi baba k’ala artot mara oxokteri na ren p’olit’ik’uri k’erk’elepe do kaosişi sebebiten na gamulun k’abğas iyaralinen muşi baba do ğurun Yaruşalemişa nunç’işanşi. Artneri p’eriodis Balianik do Yaruşalemişi mapa 4. Baldvinik ok’içinopan artikarti. Mo3’qvinoba oçvuşi çare xe mutepeşis ren ya na tkumers mapak şvela ak’vandeps ti-muşişen. Murenki mapaşi da k’ala çileri na ren Guy de Lusignani ren noğas şineri ar şovalie do limaşa mxuci meçameri.
Balianik baba muşişi dixapes oxaçkuten ağani ar skidalaşa ixazirinet’aşi, Guy de Lusignani do muşi megabrepek nank’apes Muslimanepes do kaosişa gza meçes. Muslimani go3’oncğoneri Selahaddin Eyyubik kok’obğu muşi armiape do igzalu Yaruşalemişa. 4. Baldvinik ğarğalaps Selahaddini k’ala do mo3’qvinobas naqonu şeni, yedgitinuşa na ak’at’espeşa ceza meçamu şeni nena meçaps. Am nenas na icers Selahaddinik uk’unikten. Lepraşi zabunoba na uğun do mask’eten na gulun 4. Baldvinik oxo3’onaşi ğura muşi na naxolen, t’axt’işa Guy de Lusignanik var gexedas yado da muşişen emu k’ala ok’o3’k’inu ak’vandeps mara Baliani k’ala okimocuten mapa oqopinuşa gza o3’iraps. Balianik k’abuli var ikips aya. Mk’ule ar oraş k’ule ğurun mapa.
Ağani mapa Guy de Lusignanik var iyanen limaşi ognapinus. Baliani k’ala niza ikips do oqvilu unon eya mara var aqvilen. Selahaddin Eyyubişa nank’ap’en mara t’akt’ik’uri çilataşi sebebiten dido p’at’i geicginen. Yaruşalemişi oçvu duskidun Balianis arçkva. Dido ginz’e na naqonups blok’ade, t’akt’ik’uri limape şk’ule Baliani do Eyyubik ar gza z’iropan kok’oitkumernan do noğa niçinaşi Muslimanepes, Baliani do Krist’ianepek mutepeşi dobadonaşa oxtimu şeni gzas gedgitunan. Xolo mark’inobaşa goktimuşi p’icis na ren Balianik filmişi çodinas z’irops, ağani ar cvaronepeşi ogzalak gzas na gedgiterenan Yaruşalemi go3’oğinu şeni.
Originaluri coxo: Kingdom of Heaven (“Cennetişi Mapanoba”); Rejisori: Ridley Scott; P’roduseri: Ridley Scott; Senarioşi avt’ori: Villiam Monahan; Masağalepe: Orlando Bloom, Eva Green, Ghassan Massoud, Liam Neeson, Jeremy İrons, Edvard Norton; O3’iramuşi rejisori: John Mathieson; Mont’aji: Dody Dorn; Musik’a: Harry Gregson-Villiams; Xvenaşi 3’ana: 2005; Muşi dobadona: Ok’ont’aleri Mapanoba, Esp’ania, Amerik’aşi Ok’ont’aleri Oxen3ale, Germania; Ora: 145 3’uti; Nena: İnglisuri, Arabuli, Germanuri; Sort’i: Ak3ia, drama, avant’iura, lima, ist’oria; Biuçet’i: 135 milioni Amerik’anuri dolari.
|
TÜRKÇE
