|
PURPUŞİ İNFEK'SİONİ ZATURRE
Zaturre (Pnomoni), qinoras na manz’inen, purpuşi ar varna arjur lobiş oiltihabuten na yeçkindun, ç’it’a berepes, didi 3’anerepes do k’ronik’uri zabunoba na uğunanpes umosi p’at’i na iseyrups do namtini orasti ğuras sebebi na meçaps mçxapaloni purpuşi zabunoba ren. Am zabunobas, purpepes na iqven havaş kesepe iltihaboni 3’k’ariten yipşen. Purpepes vazife na uğunan oksijeni şvanu do meçamuşi fonk’sioni ok’uixven do am sebebiten di3xiris oksijeniş nispet’i dvark’inen.
Oiltihabuşa virusi, bakt’eri varna mantari steri mik’roorganizmapek sebebi iqven. Zaturreşa gza na meçaps eçdovitşen met’i mik’roorganizmak k’oçişen k’oçişa ar jur met’roni xolosoni mesafeşen nak’limen. Zabunobaş k’ap’et’i k’oçepeşa nak’limu, oxvalu, oçindinu varna zabuni k’oçepeşi oğarğaluş oras havaşa na goşibğen 3’ap’ape direkt’ot oşvanuten iqven. Edo xolo alk’oli, nark’ot’ik’aş maddepe, z’igara do skidalaşi p’at’i xalepe, p’at’işi grip’iş zabunobak zaturreşa gza na meçaps fakt’orepe renan. Generalurot elemit’a, k’ok’i3’a, grip’i, difteri, varisella, tifo do çkvadoçkva bakt’erişi infek’sionepe varna xura dido na osap’arapaps zabunobapeşi oras yeçkindun.
Zaturreşi oçinu; fizik’uri k’ont’roli, zaturreşi k’lasik’uri nişanepeş oz’iru, purpuş filmi, xvalişi t’est’i, di3xirişi analizi dç. k’ala ixvenen. Zaturreşi nişanepeş oşkendas; mağali t’u3anoba, otirtinu, skit’a varna jvari peroni xvali, pasiş peris mç’italoni xvali, ubaş 3’k’uni, xomula do oxrialoni oxvalu, şvanaşi cinikis k’arfi na ni3iginen steri ç’vini, dido p’at’i tişi 3’k’uni, k’ap’et’i otirtinuş k’ule mçvapaş manz’inu, ç’k’uaş gondinu, doç’k’indinoba, 3’oxleşk’elen ubas do k’ap’ulaşk’elenti xop’eş qvilis 3’k’uni, oşvanu do oxvaluten na manz’inen ubaş 3’k’uni, adaleşi ç’vini, iştağişi dvark’inu, gemzuloba, gagnapaş ok’oxvoba, çarbis na yeçkindun p’up’uzepe, uxaloba, p’at’işi oğaminu, manişa oşvanu, na ik’onağurinasunon steri oqopinu, tiş oktu, p’iciş obaru, xurxiş 3’k’uni, t’arafişi 3’k’uni, xomula do xçe nena, çarbiş cğat’a noktinu, om3ikaneri do içvinaşi gon3’k’imeri peroni dorti na meçaps mseli, k’oma isvarinen.
Zaturreşi şvelas; ant’ibiot’ik’epe, oncires moşvacinu, mçvapaş om3ikanonepe, oxvalu mek’vatoni ç’amepe, oksijeni oşvanu, na dvark’inu k’onari 3’k’ari oşumu, dido vitaminoni do mağali k’aloroni diet’i, zabuniş k’aixeşa oç’k’omu steri ç’ami do met’odepe ixmarinen. Zaturreşen oçvu şeni; pağobas ok’un3xinu, lemşi oxvenapu, z’igara uoşumu, alk’olişen omendranu, vitamini do mineralepeş nizamurot ezdimu, zararoni gegapape naşkvinuten nizamoni ar skidala oskedinu dvaç’irs.
|
TÜRKÇE
