DUDBUT'K'A

TRT-K OVRO ÇKVANERİ NENATEN OÇ'ANDİNASUNON

Turkiaşi Radio T’elevizionişi K’idalak (TRT), fezaşi sist’ematen çkvaneri nenape k’ala oç’andinuşa ixaziren. Edo Kurduri k’ala Somexuri nenatenti oç’andinu isimadeps. CNN Turkişa na ğarğalu Oxen3aluri Naziri Mehmet Aydinik, ağani tudenst’rukt’ura o3’opxinuten ç’andinape ixor3elinasunon ya tku. Ç’andinapes didobaten ambarepe geidvinasunon.

Ç’andinape 8 çkvaneri nenaten oxer3elinu ip’laninen. Am nenape 3’oxlenurot Kurduri, Arabuli do Farsuli ren. Oxen3aluri Naziri Aydinik, 8 nenaşi oşkendas Somexurişi sup’rizi şeni “Muşeni var iqvas?” ya otkuten oxo3’onapu. Turkiak, Somexuri ç’andina k’ala xususurot Somexepeşi diasp’oras muşi tezepe oxo3’onapasunon do çilaturi oçkinapinus nodgitasunon. Somexepeşi genosişiş idiapeşa, ist’oriuli çkinape fezaşi sist’ematen na ixvenasunon Somexuri nenaten oxo3’onapinasunon.

Kurduri ç’andinati t’erori k’ala ok’vak’idinuşi xandapes nargas yado oxor3elinu ip’laninen. Ç’andinapes didobaten ambarepe iqvasunon. Mara ambarepe k’ala birapa, filmi, seriuli flmi steri onç’eloni p’rogramapeti geidvinasunon. Na ixvenasunon t’eknik’uri on3’uranuten na iç’andinen p’rograma artneri oras, na unons Somexuri, na unons Kurduri, na unonsti Arabuli asiminasunon.

TRTşi K’idalaşk’elen Lazuri oç’andinu şeni, regionuri t’erorişi p’roblemaş oqopinu varna Lazepeşi diasp’oraşa ofi3ialuri ist’oriul tezepeşi oxo3’onapuşi umçitu unon-i? Oxen3aleşk’elen nananenapeten varna xark’uri ofi3ialuri nenapeten p’olit’ik’uri endişepe ozduten ç’andina uoqopinu çitun. Dudk’anoni muşis ti-muşişa “so3ialuri oxen3ale” yado coxo na geidumers Turkiaşi Resp’ublik’as, dobadonamşinepe muşiş oşkendas adiluri oqopinu do nananenaşi ç’andinaşa “adamiuri hak’k’i” yado o3’k’omilu çitun.



                                                                                                                                                              TÜRKÇE