|
"OKORTURA XOLO KOK'ONÇ'İT"
Okorturaşi P’rezident’i Mixeil Saak’aşvilik, purçinaşi ofi3ialuri 3eremoniaşa p’aralelot Okorturaşi P’at’rik’i Majurani İliaş 3’oxle şurieriti dopurçu. P’at’rik’ik, Abxazia do Omjore Osetia ağneburot Okorturaşa ok’onç’inu geçinadvu do “Maok’ortaloba mek’limoni zabunoba ren” yado noqonu.
Baba muşi Kortu, nana muşi Abxazi do Abxazi-Kortu oşkendari oxen3aleşi maartani mapa na rt’u edo xolo ist’orias ‘Abxazepeşi Mapa’ yado na işinen 3. Bagratişi coxo gedveri Kutaisis na dgin ek’lesias na i3’opxinu 3eromonias P’at’rik’ik, Saak’aşvilis Abxazia do Omjore Osetia xolo Okorturaşa ok’atit yado geçinadvu. P’at’rik’i Majurani İliak, “Bolaki xalk’is na meçi nenape dogaxvenen. Okortura ağneburot ok’onç’aginon yado mepşvent. Okortura xolo mo3’qvinerot ok’uinç’asunon yado vicert.” yado guri gundvu.
Abxazia do Omjore Osetiaşa mesaji meçamuş noğira na uğut’u majura simboliuri dulyati, Saak’aşviliş Gelatişi k’atedralişa oxtimu do Mapa Davidişi mezare mok’itxu rt’u. Saak’aşvilik, 2004 3’anas maartani purçina muşiti ‘12. oş3’anuras Okortura na ok’onç’u go3’oncğoneri’ yado na işinen Mapa Davitişi mezares qveret’u.
Okorturaşi P’at’rik’i Majurani İliak, Saak’aşvilişi purçinaş 3eromonişa ak’atu şeni Tbilisişa moxtimeri Rusiaşi Galendulyapeşi Naziri Sergey Lavrovi k’ala ok’iz’iru şk’ule na i3’opxinu p’resaşi oşkendari ok’oxtalas magazetepeşa; “Maok’ortaloba mek’limoni zabunoba ren. Am zabunoba irişen mk’ule oraş doloxe oçodinu mçitunan. Vladimir Putinişi xe3alaş oras am p’roblema içodinasunon yado mepşven” ya tku.
P’at’rik’ik, Lavrovişi mok’itxuşa becitoba na meçaps “K’ont’akt’i omordinu dido beciti ren. Gza çkinis na memodgitunan p’roblemape oçodinu şeni aya mçitunan yado vicer. Rusias moxtasneris ağani k’ont’akt’epe şeni akt’ivi roli ezdamu dvaç’irs.” ya otkuten o3’iru do “Vizaşi zdimeri regimik k’ont’akt’oba çkinis negat’ivurot notesiraps. Am formalit’epe içodinasunon yado mepşven.” yado imendi muşişen molaşinu.
|
TÜRKÇE
