|
MP'OLİŞİ NOST'ALGİURİ T'RAMVAEPE
Maartani t’ramvaepe 1842-s Nevyork’is, 1854-s P’arisis do 1860-sti Londras iz’irinu. Mp’olişi t’ramvaik kogeç’k’u oxandus, 3 St’aroşina 1869-s, Tophane-Ortakoyişi xatis. 30 Mariaşina 1869 tariğoni “Mp’olişi T’ramvai do K’idalaş Ok’idobaşi Ok’otkvaloba”ten Mp’olişi kuçapes magzale do oğmala otiru şeni rk’inagza ixvenu. 3xovarepek 3’in3’upt’es t’ramvaepe. Oxandapobati niçinu “Mp’olişi T’ramvaişi K’omp’ania”s 40 3’anaş morgvalis. Am k’omp’aniaşi mak’idale ren K’onst’ant’ini K’repano Efendi.
3xenoni t’ramvaik geç’k’u oxanduşa otxo xatis, 1871-s, Azapkapi-Galata, Aksaray-Yedikule, Aksaray-Topkapi do Eminonu-Aksaray oqopinot. İptineri oxandapobaşi 3’anas ixmarinu 430 3xeni. 4,5 milioni magzale itirinu. 53.000 Lira moiginu. Ok’ule, Voyvodaşen Kabrist’an Sokaği-Tepebaşi-Taksim-Pangalti-Şişli, Bayezid-Şehzadebaşi, Fatih-Edirnekapi-Galatasaray-Tunel do Eminonu-Bahçekapi steri xatepeti guin3’k’eret’u.
Mp’oli şk’ule, 3xenoni t’ramvaepek geç’k’es oxanduşa Osmanuri dobadonaşi majura noğape Selanik’i, Şami, Bağdat’i, İzmiri do K’oniasti. Dudoçvaluşi Nazirobak eç’opu t’ramvaepeşi 3xenepe, 1912-s Balk’aniaşi limaş oras. Am sebebiten, Mp’olik doskidu ut’ramvaoni ar 3’anaşen met’i. 12 Mbulora 1939 tariği do 3642 k’ore3xaloni k’anoniten xe3alaşa na niçinu T’ramvaişi Oxandapoba, ok’uleti Mp’olişi Beledieşa ok’uk’irinu do 16 Mbulora 1939 tariği do 3645 k’ore3xaloni k’anonitenti (İETT) Mp’olişi Elekt’roba T’ramvai do T’unelişi Oxandapobaşa ok’uk’irinu. 12 Mariaşina 1961 tariğis Mp’oli, 14 3’ilva 1966 tariğisti Anatoliaş k’eles na ixandept’u t’ramvaepe eizdinu. Aşopetenti diçodu t’ramvaişi oxandapoba.
1990 3’anas xolo, Taksim-Tuneli do 2003 Kadikoy-Modaşi şkas oxandus na geç’k’u nost’algiuri t’ramvaepe, Mp’olişi simbolepeşen ar teri ren. Taksim-Tuneliş şkaşi nost’algiuri t’ramvaik ixandeps 1.640 met’roni xatis. Ar ndğaş doloxe, 2 şilya 500 adami otiruten nanç’inerot 14 şilya seferi ikips ar 3’anaşi doloxe. Kadikoy-Modaş şkaşi nost’algiuri t’ramvaikti ixandeps 2.600 met’roni xatis. 10 dginaleşen na 3’opxun do ar ndğaş doloxe, 2 şilya adami na tirups xatis ar 3’anaş doloxe nanç’inerot 30 şilya seferi ixvenen.
|
TÜRKÇE
