|
K'OSOVA, SERBİAŞEN KOMUÇİTU!
Mcveşi Yugoslaviaş goşibğuşi p’eriodiş çodinuri et’abi na rt’u K’osovak, AOO do AAşi numxvacuten do ONşi k’arari uezdameri ark’eleni timoşletineroba ognapu. 1989 3’anas Serbi lideri Slobodan Miloşeviçiş faşizmak bumerangişi tesiri na oğodu K’osova, 1999 3’anas NATOşi op’erasioni şk’ule 1244 nomeroni ONşi k’arariten Serbiaşi avt’onomiuri regioni oqopinot ONşi mandaşa amaxteret’u. Mara AOO do AAşi K’osovaş timoşletinerobaşi p’lani, Serbiaşk’elen k’abuli na var ixvenu do Rusiaşi muxalefet’i na var icginu şeni ONşi k’arari var goink’vatinu. Mosk’va k’ala Belgrat’işk’elen 'uexlak’oba, illegalit’e, juroni st’andart’i' itirazepeten na ignapinu timoşletineroba, Albanurepeşa ç’anda oxvenapu mara Serbepeşa tie3’azdimu k’ala uçandğa o3’iru. 1998-1999 limaşa ak’ateri mcveşi uniformaloni şilya k’onari Serbi askerik 'K’osova var mepçatminonan', 'K’osova Serbiaşi guri ren' sloganepeten K’osovaşi sinorişen mek’axtimu 3ades. Serbiaşi Dudnaziri Voyislav Koştunitsak, “Am şiddet’işi mesuli na ren AOOşi P’rezident’i do Avrop’aluri manaqonepek arxvala Serbuli ist’oriaşa vardo kianaş nizamişi temeli na ren int’erna3ionaluri huk’uk’iş ist’oriaşati uça boncapeten iç’arinasunon” yado reak3ia o3’iru.
K’osovaluri Albanurepeş timoşletinerobaşi izmoceş oxor3elinu, 1990oni 3’anapes Belgrat’i k’ala lima xveneri K’osovaşi Moçitinuşi Armiaş '3’i3’ila' z’egnoni go3’oncğoneri rt’uşi 3’ilvaş tutas Dudnaziri na i3xunu Haşim Taçis nesibi aqu. Taçişk’elen ekst’remurot na icoxinu p’arlament’oşi ok’oxtalaşa Serbepek var ak’ates do Albanurepeş vekilepeşi reyiş artobaten k’abuli na ixvenu timoşletinerobaşi ognapa na ik’itxu Taçik, “K’osova, timoşletineri do oxoşkveri oxen3ale yado vognapapt. K’osova, arçkva p’ot’e Belgrat’işk’elen var iktalinasunon” ya tku. Ognapas: “K’osova mo3’qva do istik’rarişa mek’ireli iqvasunon. K’osova, ONşi matemsile Martti Ahtisaarişi 'int’erna3ionaluri oçvoni timoşletineroba' p’lanişi jin ik’idinu. Demok’rat’ik’uri, laik’i, dido etnik’oni ar so3ia ren. K’ult’uruli do religiuri anderi garant’i ikips. AOşi sivili do NATOşi askeruli renoba oxeluten mek’abulups. Timoşletineroba k’ala int’erna3ionaluri mesuloba tis geidvasunon, manz’agerepe muşi k’ala cgiri k’ont’akt’epe qvasunon, manz’agerepe muşiş sinorepe garant’i şinasunon do p’roblemapeş olagus şiddet’işen mendra doskidasunon.” ya itkvinu.
K’osovaşi na3ionaluri bandaras, cğat’a zeminişi jin skit’a meçisteri K’osovaşi xarit’a do dobadonas na skidun Albanuri, Serbi, Boşnak’i, Mak’edoni, Bulgari do Turkepeşi simbolurot anşi xçe muru3xi gez’in. K’osovaşi timoşletineroba andğaneri ndğaşakis; AOO, Afganist’ani, Germania, Albania, Avust’uria, Avust’ralia, Belçik’a, Danimark’a, Finlandia, Fransia, Englandia, İt’alia, İrlandaşi Resp’ublik’a, İsveçi, Hungaria, P’olonia, Turkia, Est’onia, Let’onia, Lit’vania, Luksemburgi, Slovenia, Senegali, Malezia, P’eru, K’ost’a Rik’ak içinu. 3’oxlenurot Serbia do Rusia oqopinot; Okortura, Moldova, Azerbaicani, Romania, Grek’ia, K’ip’risişi Resp’ublik’a, Esp’ania, Slovak’ia, Viet’namikti var viçinatminonan yado ognapes.
|
TÜRKÇE
