|
ÇEÇENİAK, RUSİAŞİ ZULMİ N3'İRUPS!
Manodgite Çeçenuri cepxek, K’osovaşi timoşletinerobaş ognapus xe ot’k’va3inaps. K’osovaşi xalk’is, ti muşişa t’erorist’oba na oğodaps oxen3aleşen omendranuşa hak’k’i na uğunşi temas çkar şuphe var miğunan ya na tku Çeçeni-İçkeriaş Resp’ublik’aşi Galendulyaş Nazirobak, int’erna3ionaluri so3iak juroni st’andart’oba ikips yado nok’un3xinu do am ognapa meçu: “Çeçeni-İçkeriaşi Resp’ublik’aşi xalk’ik çodinuri 14 3’anaşen doni kianaşi irişen manat’ale do silaxoni didi tereşa silaxiten nodgitun do ok’vak’idaps. Rusiaşi k’arta ç’eşidi askeruli grup’işk’elen sist’emat’ik’urot genosisi na ixvenen xalk’i çkini mek’arbinuşi sinoris ren. 14 3’anaş doloxe xalk’i çkinis na var izmonen k’onari meç’iroba ağodu. Rusiaşi maişgale mencelepek, 42 şilya bere oqopinot xalk’i çkinişi %25 k’onari (nanç’inerot 250 şilya şuri) keç’k’vides.
300 şilyaşen dido dobadonamşine çkinis, moçitinu do emniet’işi noğiraten xark’iş dobadonapeşa oxtimu dvaç’ires. Dobadona çkini xoloti adamepeşi ğura varna sakat’i doskidinuşa na nusebebups milionepeten mainiten gesvareli ren. Dobadona çkinis hepat’iti do tuberk’ulozişi goşogzoba ren, berepe sakat’i dibadenan, çkar oras askeruli do p’olit’ik’uri oğodapeşa uk’ateri k’oçepe gondununan, Çeçeni-İçkerias na ren Rusuli k’omut’anobak na 3’opxups şant’aji, goçvu do xaraci naqonops. Kianaşi iri xalk’ik, Rusiak xalk’i çkinis na oğodaps zalimobaşi maz’irale ren. Akonaşis xalk’işi irixolo 't’erorist’epe' yado işinen. Rusiaşi t’k’va3inoni do mtelot mek’arbinuşi silaxepe oxmarinuten Çeçenepe do k’elenari mutepeşa na oğodaps t’erori, dobadonaş gale na gamaxtuti kobz’irit. Çeçeni-İçkeriaşi Resp’ublik’aş mcveşi P’rezident’i Zelimhan Yandarbiyevis na iğodinu t’erori, Aleksandr Litvinenkoş Londraşi ok’rebules ağu meçamuten na iğurinu komşunan. P’rezident’i Aslan Mashadovi Rusi istixbarat’işk’elen iğurinu do andğaşakis xura muşi na uk’ors steri doxvinu şeni ocaği muşişa var niçinu. Çeçeni-İçkeriaşi Resp’ublik’aş p’olit’ik’uri oktalas limaşi k’aidepe oğirsuten timoşletineroba do oxoşkvineroba şeni ok’vak’idinuş noğira uğut’u do xoloti kuğun. Çkin k’arta oras mo3’qvaşi k’elenari vort’it do xoloti voret, çkar oras dialogişa mendra var dopskidit. Kianaşk’elen K’remlinişi menceli do meç’irdinuşi p’olit’ik’aşa ruşvet’i yado meçameri xalk’i çkinik, xoloti mtinuri skidala do int’erna3ionaluri oçvaşi imendi var gondinaps. Çkin k’arta radik’ali artoba do organiza3iaşen mendra na voret do k’arta ekst’remist’uri o3’k’omilaşenti mendra na dopskidit komevo3’irit.
Çkin moxtasneris, dobadona çkini oxoşkvineri do gotaneri bz’iropt. Çeçeni-İçkeriaşi Resp’ublik’aşi Galendulyaş Nazirobak, onç’eloni iri k’elepeşa, xalk’i çkinişi Rusiaş imp’erialist’obaşa nodgitinu uoktiru na ren goşinapaps. Rusiaşk’elen ist’oriuli t’eroriş mtinobape, muk’o fara xalk’i çkini na uçvu, k’ult’ura çkini, ananepe çkini, adetepe çkini, na3ionaluri artneroba çkini asimilasionişi gzaten mek’arbinuşi xandape do çodinuri 3’anapes askeruli limaşi çodinape govişinatna, Rusiaşi Federasioniaşa p’olit’ik’uri int’egrasionişi simada muk’onari uexlak’oni do k’abaxat’oni na iqvasunon visimadept. Muşenido, kianuri adamur hak’k’epe p’olit’ik’uri noğirapeşa k’urbani oğodinuşa izni var niçinen.”
|
TÜRKÇE
