DUDBUT'K'A

OP'ERET'İ LUKUSİ SKİDALA

Mp’olişi Didinoğaş Belediyeşi Noğaluri Teat’repek 20 3’anaşen met’a ar oraşen doni na osahnups Op’eret’i Lukusi Skidala ren Turkuli teat’riş ist’oriaşi beciti ar k’ilomet’rişi kva. 1930-epes, t’ekst’i muşi Ekrem Reşit Reyik na ç’aru do musik’ape muşiti Cemal Reşit Reyik na obestu Op’eret’i Lukusi Skidalak oxo3’onapaps, resp’ublik’a şk’ule u3’ori na oxoi3’onu ogulvalonu do ağani p’eriodis xamperi mara un3’operi şurepeşi oz’i3inoni xalepe. Op’eret’i Lukusi Skidalak o3’k’en Turkiaşi ogulvalonu avant’iuras k’omik’uri do ironiuri ar pencereşen. Op’eret’ik oxo3’onapaps, Bosforişi zoğap’icis na geladgin yalepeşen Beyoğlus na geladgin ap’art’ment’epeşakis, ugeç’areloba zdips tina, diaraşi skidalaş doloxe gondineri ar lavoni do muşi gomorgvas na skidun xalk’ik muç’oşi artikarti moğerdinuşi gza na gorupanpeşi ambarape. Riza do Fistik’iti renan jur k’afadari, namuk na skidunan ç’it’a maxiralobapeten. Ar seris, amulunan ar xampaşi oxorişa. Murenki, dolokunuşbalo koren oxoris. Çkar mitik var nişit’ilen entepeşen. Var oxo3’onapan, entepe maxirale na renan. Ofi3ialurot var ispat’inen mara, am op’eret’işi mteloba varna namtini k’ortape, malekse Nazim Hikmetik geç’areli mogapu şeni na ç’aruti itkven.

1933-s Hazim Kormukçu, Bedia Muvahhititi ak’ateri na rt’u ar k’adroşk’elen isahninu op’eret’i, 1946-şakis didi ar qoropaten naqonu. 1950-s rejisori Lutfi Akadik yeşiğu ar filmi, namus Rizaşi roli Settar Kormukçuk na nosağu. 1963 3’anas Muammer Karacaşk’elenti isahninu. Haldun Dormen do Gencay Gurunik 1984-şakis na osahnu op’eret’i isağinen 20 3’anaşen met’a ar p’eriodişen doni Mp’olişi Noğaluri Teat’repes genk’ileri gişot. TRT-k yeşiğu Op’eret’i Lukusi Skidala do şinaxu arkivi muşis. Op’eret’i gamiçkvinu am t’elevizias otxo k’ortaten. P’anelepeşi temati na iqu am op’eret’i isahninu Grek’ia, Yugoslavia, Oçildre K’ip’rosişi Turkuli Resp’ublik’a, Azerbaican, Germaniasti. Op’eret’i idu İzmiri, Ank’ara, Denizli, Bursa, Eskişehir, Antalya, K’ocaeli, Adana, T’amt’ra, Malatya, Diyarbakir do Konyaşa t’urneten.

Mp’olişi Noğaluri Teat’rişi Op’eret’i Lukusi Skidalaşi k’unye muşi aşo ren: Maç’arale: Ekrem Reşit Rey; Mabeste: Cemal Reşit Rey; Rejisori: Haldun Dormen; Dek’orişi mazmonale: Nilgun Gurkan; K’ost’umişi mazmonale: Canan Goknil; Ork’est’raşi man3’oranale: Esin Engin; Musik’a: Onder Bali; K’oreografia: Selçuk Borak; Masağalepe: Zihni Goktay, Funda Postaci, Ali Berge, Şenay Saçbuker, Sezai Aydin, Asli Seçkin, Ali Karagoz, Oya Palay, Bilge Zobu, Sibel Topaloğlu, Savaş Barutçu, Vildan Turkbaş, Yavuz Şeker, Betul Kizilok, Guneş Han, Selçuk Yuksel, Emrah Ozertem, Kutay Kirşehirlioğlu, Caner Çandarli, K’ost’a K’ort’idis, Melahat Abbasova, Defne Gurmen.



                                                                                                                                                              TÜRKÇE