|
BİZANT'İURİ T'EKST'EPE K'ALA "ABASGİA"
İst’oria, xeşnoba, ç’araloba, arkeologia, etnografiaşi temapes doxmeli do goktineri noç’arepe gamaçkvinu na noğiraps Asyayinik, 2000 3’anas Mp’olis ist’oriuli seriaşi majurani svarot Abasgia coxoni svara kogamoçkvu. “Abxaziaşi İst’oriaş Bizant’iaşi P’eriodiş T’ekst’epe” tudeni coxo na uğun do A. Kollautzişk’elen na iç’arinu svaraşi Turkulişa goktirinu, Bahriye Çelebişk’elen ixvenu.
Svaraşi k’ap’ulas: “6. oş3’anura; Abasgia, Apsilia, Sanigia do Misimianias na skidut’u Abxazi cinconi xalk’epe şeni di3xironi 3’anape iqu. Oş3’anapeşi morgvalis Bizant’ia do Persuli imp’arat’orobapek ok’vak’idet’es. 3’oxleniasias gecgineri mi iqvasunon yado k’arta kianas inç’elinet’u. Abasgia, jur imp’arat’orobaşi limaş dixa koniktu, muşenido omjore muşişk’ele Lazik’aşi Mapanoba rt’u. Jur imp’arat’orobasti akonaşis xe gedvu unont’u. Am p’eriodis jile na molapşinit antik’uri Abxazuri t’omepeşen ar teri na rt’u Abazgia, Bizant’iaşa mek’ireli rt’u. İmp’arat’ori Justinyani (525-565), Abazgias xe gedvuşa religiaşen geç’k’u. 3’oxle Pi3undas do Anak’op’ias ek’lesiape ok’idapu. Ar k’eleti namtini arist’okrat’epe k’ala ok’oitku do Abasgiaşi Mapanoba mek’arbu şeni ixandu. Abasgepek aya oxo3’onesşi, Justinyanişi k’elenarepes atxozes. Justinyanikti, am xali şk’ule Abazgiaşa nat’k’va3u. Abazgiaşi Mapa Vapsitik, oçildre K’avk’asiaşa imt’u. Mara golaxtoras emuşeni, Romaşi irişen k’ai armia tkvala na ren ‘A la prima Abasgorum’ itkvinet’u. Abazgia şk’ule Apsilia do Misimianiaşi Mapanobapekti Bizant’iaşa yedgites. Çodina mengaperi iqu do entepeti geicgines. Aya di3xironi 3’anapek etnik’uri Abxazuri t’omepe kok’onç’inu. Çodinurot k’onsolidasioni qves do Abxazuri Mapanoba gedgines” ya itkvinen.
Grek’iaşi mcveşi odudepes Abasgia yado na molişinen Abazgia, Abazgepe na skidut’es ist’oriuli k’ortaşi coxo ren. K.O. 1-2. oş3’anuras Abazgiaşi Mapanoba na gedges, 6. oş3’anuraşi gverdisti Bizant’iaşi xe3alas na amaxtes Abazgepe, 550 3’anas yedgites do Bizant’ia k’ala ok’vak’idus naqones. 8. oş3’anuras Abazgia do Apsilia ar mapanoba koniktu. Omjore k’eleni t’omepe muşi Apsili yado na icoxinen do Abaski yadoti na içkinen Abxazepek, ti mutepeşen Absua yado molaşinapan.
Ok’vanduş t’ilifonişi nomera: 0216 345 36 96
|
TÜRKÇE
