DUDBUT'K'A

ABDULCANBAZİ 50 3'ANERİ İQU

Turhan Selçukişi ğaraluri romaniş dudgurami na ren Abdulcanbazi, 1957 3’anaşen doni çkini k’ala ren. Em p’eriodis, gazeta Milliyetis galeni ğaraluri ar romani gamiçkvinet’u. Gverdi but’k’aloni rt’u. Gazetaşi coğabinameçaps direkt’ori na rt’u raxmetoni Abdi İpekçik, Turhan Selçukişen ğaraluri ar romani ak’vanderen. Turhan Selçukik şvela ak’vanderen iumorist’i Aziz Nesinişen. Aziz Nesinikti, dubarace na rt’u ar t’urist’işi go3’oncğoneriş t’ip’i yoçkinderen. Am dubarace k’oçis “Abdulcanbazi” yado coxo gedveren. Maartani burme içoduşi, Aziz Nesinis va unt’eren noqonu am seriuli dulyaşa. Turhan Selçukik Rifat İlgazişen şvela ak’vanderen. Ç’it’a p’eriodi şk’ule Rifat İlgazik na ç’arupt’u senariopek ora muşis na var mulut’u şeni, senariopeti Turhan Selçukik muşebura ç’areren. Murenki dubarace Abdulcanbazişi t’ip’i iktireren do ağneburot yiçkindineren.

Ağani Abdulcanbazi, mcveşi muşişen çkvaneri ren. Dubarace vardo namusoni ren. Uadalet’oni sist’emaşa nodgitun. Am sist’emak na omralaps z’ubuk’i, unamusoni, oncğore na var uçkin mitxanepeşa na nodgitun ar simboli ren. Abdulcanbazi ren çkva p’eriodepeşi Osmanuri teres, Turkias varna mcveşi Egvipt’ias. Em p’eriodepeşi porçape dolokunerot. Ğaraluri romanişi gurami Abdulcanbazi, eya na viçinit iptineri ndğas na rt’u steri; ağanmordale, zirmiç’i do k’ap’et’i ren. 50 3’anaşen doni, xalk’i k’ala ren. Xalk’işi megabre ren, xalk’is mt’eroba na ikipanşi mt’eri ren. Megabre mutepeşi şvelaten, dubarace otoloni Sami do k’udeli Surmegoz İhsanişi leboni dulyape iris ognapaps Abdulcanbazik. Abducanbazişi irişen didi sap’aroba ren hafifmeşrep’i Zaruxi do işveloni Ramona. Entepe k’ala erot’ik’uli fant’eziape ipaups. Karanfil Xoca, Tarzani, Fettaxi do Fayrabi renan majura t’ip’epe Abdulcanbazişi. Abdulcanbazi çinoberi ren “Osmanuri şamari”ten.

Abdulcanbazi, dido ginz’e 3’anapeşi morgvalis “Milliyet” (“Xalk’uroba”), “Cumhuriyet” (“Resp’ublik’a”), “Akşam” (“Limci”) do “Yeni İstanbul” (“Ağani Mp’oli”) coxoni gazetapes gamiçkvinu. 1970 do 1980-oni 3’anapes, albumi oqopinotti gamiçkvinu Abdulcanbazi. Turhan Selçukik Abdulcanbazi p’ensioneri qu 1987-s. Mara xalk’ik dido onç’eloni rt’u do, Turhan Selçukik xolo kogeç’k’u oğaruşa Abdulcanbazi 1994-s. Abdulcanbazi isaxninu Megabrepeşi Teat’rişk’elen (“Dostlar Tiyatrosu”), 1972-s. 1994-sti Oxen3alaşi Teat’repeşk’elen (“Devlet Tiyatrolari”) isaxninu. PTT-kti Abdulcanbazişi puli gamoçkvu 1990-epes. Yilmaz Guneyisti Abdulcanbazişi filmi yeşiğu unt’u mara p’olit’ik’uri sebebiten gale na gamaxtu şeni, p’roekt’i var açodinu do gverdi koduskidu.

Hemi p’olit’ik’uri, hemi so3ialuri, hemiti iumoruli ğaraluri ar romani na ren Abdulcanbazişi meğarale Turhan Selçuk, Muğla- Milasis dibadu 1922-s. Maartani k’arik’at’urepe muşi gamiçkvinu “Turk Sozu”s, (“Turkuli Otkvalu”) 1941-s, Adana-s. Mp’olisti “Kirmizi Beyaz” (“Mç’ita Xçe”) do “Şut”is (“Şut’i”) gamiçkvinu k’arik’at’urepe muşi. 1948-s “Şaka” (“Xumroba”), “Akbaba” (“Svavi”), “Tasvir” (“Surati”) do “Aydede” (“Tutap’ap’uli”) coxoni jurnalepeşi k’adropes ak’atu. Ok’uleti “Yeni İstanbul”is (“Ağani Mp’oli”) ak’atu. 1952-s, cuma muşi İlhan Selçuki k’ala “41 Buçuk” (“Jurneçidoargverdi”) coxoni iumoruli jurnali gamoçkvu. 1953-sti “Karikatur” (“K’arik’at’uri”) gamoçkvu emuk. 1954-s “Milliyet”is ak’atu, dudk’arik’at’urist’i oqopinot. İumoruli jurnali na rt’u “Dolmuş” (“Dolmuşi”) gamoçkvu. 1957-s, geç’k’u oç’aruşa “Abdulcanbazi” 1960-epes İt’alias na gamiçkvenet’u, iumoruli jurnali “İl Travaso” (“Dobu”)şi k’adroşa ak’atu. Andğaneri ndğas gazeta “Cumhuriyet”is ixandeps.



                                                                                                                                                              TÜRKÇE