|
AR FİLMİ: VELOSİP'EDİŞİ MAXİRCEPE
“Velosip’edişi Maxircepe” ren 1948-s yeşiğeri neorealist’uri ar filmi. Kianuri majurani lima şk’ule umutelepek na z’iru ç’vinepe oxo3’onapaps. Amerik’aşi Ok’ont’aleri Oxen3alepek, İt’alias meşveluten k’ideri, em oraşi Romaş varoşepes bz’iropt “Ağani Roma”şi binape. Çkva gza, 3’k’ari, elekt’roba var uğunan. Antonio Riccik, çili muşi Maria do vit 3’aneri biç’i muşi Bruno k’ala artot skidun. Antonioşi ç’it’a do umuteli oxori muşis voret. Çili muşi jurşuroni na ren oxovo3’onapt. Didi lima z’ireri Antonio do çili muşi, ç’it’a ondepeten xelineri oqopinu şeni, fursat’i gorupan. Murenki didi ar derdi uğunan: Antonio udulyeli ren. K’arta ndğas ç’umanişen limcişakis dulya gorups mara m3udişi. Lima şk’ule İt’alia perişani xalis ren. Moxva ar dulya var, xvalot ar dulya gorups. Xeşpasi muşi mağali ar dulya var, xvalot oç’k’omale eç’opinus na dubağasunon geç’areli mogapu şeni ar dulya. Şansi var uğun. Muşendo Romas, ti-muşi steri, majura noğapeşen na moxtupe k’ala artot oşi şilyapeten udulyeli, emuşenti met’i oç’k’omuş kovali, onciruş sva na var uğun k’oçepe koren.
Ok’ule şansi muşi gvan3’k’en. Ar firmaş rek’lamaşi afişepe k’idapes non3axuşi dulya koz’irops. Roma, Ağani Roma goxtasunon do k’arta k’idas afişi non3axasunon. Am dulya dido perpu ren. Murenki ar p’roblema koren. Antonios dvaç’irs ar velosip’edi. Ar k’eleşen majura k’eleşa manişa oxtimu-moxtimu şeni, ar velosip’edi dvaç’irs. Firmaşi şart’i ren velosip’edi. Ginz’e oraşen doni udulyeli na ren do majurani fara baba na iqvasunon Antoniok ar velosip’edişi mance oqopinu şeni, mtini ptkvatna, velosip’edi eç’opuşi geç’areli oz’iru şeni, k’arta çare 3adups, k’arta nek’na nuk’ank’ups. İmendi var ren. Muşendo k’arta k’oçi muşi steri ren. İmendi muşi diçoden. Mariak ç’anda muşis na niçinu namtini ondepe do hediyepe kogamaçaps. Na aqu geç’areli, komeçaps Antonios. Antonioti, Mariati dido gemzuleri renan. Antoniok eç’opups ar velosip’edi.
Romas, ar keleşen majura k’eleşa gulun. K’idapes non3axaps, na ixandeps firmaşi afişepe. Namtini orapes, Brunoti muşi k’ala niqonops. Dulyaşen na mogaps geç’areli iqvasunon derdi mutepeşiş dermani. Murenki, bedigoç’veri ar ndğas, nuxirnan velosip’edi. Arçkva Antonios ar derdi uğun: Velosip’edi muşi oz’iru. Biç’i muşi Bruno do megabre muşişi şvelatenti mexireli velosip’edi muşi oz’irus geç’k’aps. Çodinas, koz’irops maxirce. Mara velosip’edi muşi gamaçameri ren. Maxirceşi manz’agerepekti maxirces mxuci meçapan. Nok’uçxoni na var uğun Antoniok naşkumers maxirce. Antonio kodilibğen. Dulya muşi ugondinu şeni, emukti konixirs ar velosip’edi.
Rejisori: Vittorio De Sica; P’roduseri: Giuseppe Amato; Senario: Vittorio De Sica,
Cesare Zavattini, Suso Cecchi Damico, Gerardo Guerrieri, Oreste Biancoli, Adolfo Franci, Luigi Bartolini (P’aşura); Masağalepe: Lamberto Maggiorani, Enzo Staiola; Musik’a: Alessandro Cicognini; Sinemat’ografia: Carlo Montuori; Edit’ori: Eraldo Da Roma; İptineri ç’andinaşi tariğepe: 24 3’ilva 1948 do 12 Xrist’ana 1949; Gamoçkvaşi firma: İt’alia- Ente Nazionale İndustrie Cinematografiche, A.O.O: Arthur Mayer, Joseph Burstyn; Ginz’enoba: 93 3’uti; Dobadona muşi: İt’alia; Nena muşi: İt’alianuri.
|
TÜRKÇE
