|
P'ROFESORİ İLİA VEK'UA
Çinoberi mamatematik’e do mamek’anik’e İlia Vek’ua dibadu 23 İgrik’a 1907-s, raioni Galişi oput’e Şeşeletis. Oçodinu oşkenduri n3’opula Zugdidis, 1925-s. Ok’ule idu Tbilisişa, amaxtu Tbilisişi Oxen3aluri Universit’eşi Fizik’a do Matematik’aşi Fak’ult’eşa. Doçodinu universit’e didi gecginaten 1930-s. Edo maak’ademik’e Nik’oloz Musxelişvilişi xe meçamuten idu Leningradişa ak’ademiuri k’arieri oxvenu şeni universit’es. Kogeç’k’u muşi iptineri goşogoras, çinoberi mamatematik’e A. N. Krylovişi gza o3’iramuten. İlia Vek’uak gamoçku ç’arape Leningradis. Ak’ademiuri k’arieri şeni xandape doçodinuş k’ule 1933-s, İlia Vek’ua goiktu Tbilisişa, na ik’itxu n3’opulaşa. Edo muşi orape mek’ilu mtelot çkinobaluri, gamantanuri odulyobape o3’opxuten. İlia Vek’ua iqu akt’iuri mak’ature Nik’oloz Musxelişvilişk’elen go3’oncğoneri çinoberi seminarepeşa. Meçu dersepe, matematik’uri fizik’a, diferan3aluri oktoba, diferan3aluri do int’egraluri t’k’ubobaşi jin. A3'ineri coxo muşi A. Razmaz’e Matematik’aşi İnst’ut’i na ren Sovyeturi Çkinobapeş Ak’ademiaşi, Okorturaşi Filialişi mak’idalepeşen ar teri rt’u.
1951-s, İlia Vek’ua dibargu Mosk’vaşa, na rt’u ofi3ialurot coxineri uvadoni oskidu do oxandu şeni. Çinoberi k’olega do megabrepe muşi M. A. Lavrent’ev, İ. G. P’et’rovski, do S. L. Sobolevi k’ala artot oktalu goşogoruli seminarepes, V. A. St’ek’lovi Matematik’aşi İnst’ut’is do M. V. Lomonosovi Mosk’vaşi Universit’es. İlia Vek’ua rt’u mak’idaluri rekt’ori Novosibirsk’i Universit’eşi (1959-1964). Sibirias skidurt’uşi, İlia Vek’ua aroranurot qu çkvadoçkva dulyape: noktalapt’u Sovyeturi Çkinobapeşi Ak’ademiaş, Sibiriaşi Filialiş Hidrodinamik’aşi İnst’ut’işi teoriuli burme, Novosibirsk’i Universit’eşi matematik’uri fizik’aşi k’atedra. Go3’oncğonu çkvadoçkva çkinobaluri seminarepeşi odulyobapesti.
Sovyeturi Teoriuli do 3aderi Mekanik’aşi Na3ionaluri K’omit’e ik’iduşi, 1956-s, İlia Vek’ua iqu muşi uvadoni mak’ature. 1963 3’anaşen Sovyeturi Mamatematik’epeşi Na3ionaluri K’omit’eşi mak’ature rt’u. 1964 3’anaşi çodinas goiktu Tbilisişa İlia Vek’ua, i3xunu manuşvaluri dudmaxvance Okorturaşi Çkinobapeşi Ak’ademiaşa (1964-1965). Noktalu Tbilisiş Universit’eşi Mağali Matematik’aşi k’atedra (1966- 1972). Muşi ini3iat’iva do go3’oncğonerobaten iteşkilinu mekanik’aşi burme A. Razmaz’e Matematik’aşi İnst’ut’i k’ala (1964). Edo 3aderi matematik’aşi p’roblemuri laborat’oria ik’idinu (1966) Tbilisişi Oxen3aluri Universit’es, namuk na iqu 3aderi Matemat’ik’aşi İnst’ut’i mk’ule oraş k’ule (1968). Ok’ule İlia Vek’uaşi coxo geidvinu am k’idalas, muşi mak’idale, direkt’ori do çkinapuri go3’oncğoneri (1968- 1977) na ğuru ndğaşakis. 1972- 1977 3’anapeşi şkas, İlia Vek’ua rt’u dudmaxvance Okorturaşi Oçkinobapeşi Ak’ademiaşa. İqu So3ialist’uri Odulyobaşi Gurami (1969). İlia Vek’uas niçinu Sovyeturi Oxen3aluri p’rizi (1950 do 1984), Leninuri p’rizi (1963) sumi Leninuri xçetomonoba do xçetomonobaşi nişanepe. İlia Vek’ua meçu şuri Ğormotis 2 Xrist’ana 1977-s, Tbilisis.
|
TÜRKÇE
