|
MÇ'İTA ARMİAŞİ K'ORO
Mç’ita armiaşi k’oro ren Sovetyari oxen3aleş armiaşi ofi3ialuri k’oro. K’oros uqonun kimoli k’oro p’ersoneli, ork’est’ra do dansuri k’erk’eli. Xalk’uri birapapeşen, oxvamuri musik’apeşa, op’eraşi ariapeşen p’op’ularuli musik’apeşa mçire ar rep’ert’uari uğun. K’orok meçeret’u k’on3ert’epe çkvadoçkva oxen3alepes, Sovetyari oxen3aleş gektinuş k’ule. Mç’ita armiaşi k’oro ik’idu 1928-s, Mosk’vaşi 3ent’raluri armiaşi k’lubis. Vitojur malime, ar vok’ali, ar ak’ordeoni, jur madanse do ar matkvale uqonun. Oxor3elinu muşi iptineri ofi3ialuri p’rogramape 12 Gimua 1928-s, Frunze K’lubis. Ork’est’raşi dudmaxvance rt’u Alek’sandr Alek’sanrov. Eya rt’u ağanmordale musik’aşi p’rofesori, Mosk’vaşi k’onservat’orias.
K’orok moik’itxu malimepe, namuk na k’idupt’es rk’inaşgza Sovetyari oxen3aleşi mendra yulvaşi t’erit’orias, 1929-s. Meçu k’on3ert’epe entepeşa. K’oro, ork’est’ra do madansepe renan çkvadoçkva diviziapeşi malimepe. Rutbeşi hierarkia var uğunan. Amat’oruli xeşnoxveneş 3’oxle oxtimu, malimepeşa morali meçamu do entepeşa k’alit’oni musik’a osiminapuş noğiraten 1933-şakis, ge3’opxu nanç’inerot 300 k’on3ert’i. K’orok gelaçu Sovetyari xalk’epeşi xalk’uri birapape k’ala Vasily Solovyov-Sedoy, Anatoli Novikov, Matvey Blanterdo Boris Mokrousov steri mabestepeşi xvenapeti.
1936 3’anas niçinu mç’ita armiaşi k’oroşa, mç’ita muru3xişi nişani. Sovetyari oxen3aleşi olande p’olusişen Tacikist’anişi çolepeşakis, moik’itxu dido t’erit’oria. 1937-s, P’arisis, Modernuri skidalas xeşnoxvene do t’eknologiaşi oirkianuri merçapasti saxneşa yextu. Jurişk’elen niçinu p’rizi emus. Majurani kianuri limaşi oras, Sovetyari front’i, aerop’ort’i, oxzabunepes malimepe do xalk’epeşa morali meçamuşi noğiraten nanç’inerot 1500 p’rograma me3’opxu. Alek’sandrovik meçu şuri Ğormotis 1946 3’anas. Emuşk’ule, muşi skiri Boris Alek’sandrov iqu k’oraşi maest’ro. Andğaneri ndğas, k’oroşi maest’ro ren Vyaçeslav K’orobk’o.
K’oros uğun t’enori, barit’oni do bassi burmepe. Ork’est’rak ixmareret’u k’lasik’uri malimuri k’oro, ork’est’ruli xvenapeşen met’a, balalaik’a, domra, ak’ordeoni, juroni bassi, çkvadoçkva pi3ari obaruşi inst’rument’epe, brassi, git’ara steri Sovetyari do Gulvaluri t’radi3iuri musik’uri inst’rument’epeti ixmarinu. Zap’arozhtsişi dansepek, K’azaxuri 3xenoni dansepe, Mirk’anişi Baiami, malimuri dansepe mazoğari dansepe temeli oqopinuten, namtini orapes entepe i3’irinu artikarti k’ala k’ombina3ia xvenerot.
|
TÜRKÇE
