DUDBUT'K'A

CUMA NENA MARGALURİ

Lazuri k’ala cuma nena Margaluri (Margalur nina), Omjore K’avk’asiuri nenapeşen ar teri ren. Okorturaşi omjoregulva k’eleni K’olxidaşi antik’uri noğarobaşi magedginepeşen, cuma xalk’i Margalepeşk’elen iğarğalinen. Margaluri, Okorturaşi Omargale do Abxaziaşi raioni Galis na skidun nanç’inerot 1 milyoni Margalik, normaluri skidala mutepeşis ixmarnan. Margaluri, didopeten Kortuli alboni k’ala iç’aren mara lit’erat’uroni ar nena va ren do oç’aruşi st’andardi 3’opxineri var uğun. Margaluri mağarğalepe jur nenoni renan do xoloti Kortuli, Margalepeşi ç’araşi do gurapaşi nena ren.

Lazuri do Margaluri artneri cinconi nena na renan k’aixeşa oxo3’oneri ren. Lazuri do Margaluri, Zanurişi jur çkvaneri dialekt’i ren. K’olxi na3iaşi jur çkvaneri skirepe, mutepeşi ist’oriuli igbaliş sebebiten artikartişen mendra kodoskides do nenape muşi dvaktires. Lazuri do Margaluri nanç’inerot 500 3’anaş 3’oxle oktirus kogeç’k’es yado ik’abulinen. Artneri nena na ğarğalapt’es cumalepeşi, olandeşk’ele doskidinerepek Margaluri do Osmanurepek xe na gedves k’ortas doskidinerepek Lazuri na ğarğalapan xalk’ot ok’uirtes. Am jur nenaşi Kortuli k’ala ok’o3’k’inu, İ.3’. 1. oş3’anuras geç’k’u yado ik’abulinen. Svanuri mocgire na aqven am nenapeşa umosi ç’it’a mengaps do majura nenapeşen İ.3’. 2. oş3’anuras ok’oi3’k’u yado itahminen. Andğas, Kortulişi; Kartluri, Xevsuruli, K’axuri, Cavaxuri, Guruli, Raç’uli dç. dialekt’epes artikarti k’ala na uğunan mendranoba, Lazuri- Margaluris na uğun mendranobaşen umosi dido ren.

Margalepe do xark’epeşk’elen 19. oş3’anuraşen doni Margaluri nena goişogorineren. Alek’sandre 3agarelik (1880) Margalurişi fonetik’uri analizepe, İoseb Qipşiz’ek (1914) do Şalva Beriz’ek (1914) grameri muşis noxosares. İrişen mcveşi Margaluri t’ekst’epe 19. oş3’anuraş tariğoni ren. Am t’ekst’epes etnografiaşi tema uğun. Margaluri nenaşi maartani xandapeti 19. oş3’anuraş çodinas ixvenu. 1930- 1938 3’anapeşi şkas K’azaxişi Gazeti, K’omuna, Samargaloş Çai, Narazeniş Çai do Samargaloş Tutumi steri gazeta do jurnalepe gamiçkvinu. Margalurişi dialekt’epe ren, Zugdidi-Samurzaqano varna Olandegulva dialekt’i k’ala Senak’i varna Omjoreyulva dialekt’i.



                                                                                                                                                              TÜRKÇE