DUDBUT'K'A

XOPASP'ORİ MOVOŞLETİNAT!

Xopas na iskedinen varonç’eluşi gagnapa Xopasp’oris guri meçameri k’oçepes dido noç’irapu. Dido 3’anapeşen doni p'rofe3ionaluri ligapes Xopaşi coxo, dude3’azderi do na isteru gentilmenuri fut’boli k’ala na ognapinu Xopasp’orik bedi muşi k’ala kodoskidu. Artvinişi Valişen Xopaşi Belediyeş Reisişakis mtelişk’elen bedi muşişa na nişkvinu Xopasp’oris k’lubaşi genk’iluşi ora komoxtu. Na moxtasunon ndğalepeş doloxe am k’riza var içoduna Xopasp’ori 3. ligaşen amat’euri ligaşa geiçkvasunon varnati k’lubaşi nek’nas franguli gelik’idasunon.

Xopasp’ori dido meç’ireli xalepeten amat’euri ligaşen p’rofe3ionaluri ligaşa na yoçkvinu do go3’oneri sezonis didi ar mucize k’ala xolo 3. ligas na naşkvinu k’oçepeşen ar teri na ren Casim Cihanikti, na p’it iri k’ont’aktişen xe upşu uk’unuviktit ya tku do, "Xopasp’oris dido p’at’i o3’k’ernan. Miepe k’ala bğarğalit na mtelik nek’na domink’iles. Çkin mu oxvenu domaç’irenan na dop’it. A3’i oşkendas ar maktali var ren. Mis muç’o unon na moxtan do eşo qvan. Xopasp’orişa mancoba qvan dubağun. Çkin voreti, var voreti beciti var ren. Xopasp’ori beciti ren. Çkinden mik mxuci meçamu maqvan na çkin kovoret ya bzop’ont. Çkini renobaşen raxat’i na ok’axven mitxanepe renan na, ti-çkini na varunonpe k’ala var dobdgitut. Xopasp’ori umanceli var doskidas domibağunan. Aya bandaraşi oçumalu ren. Bandara çkini xes doskidu do çkin am bandara andğaşa dido k’ai komoiqonit yado vicert. Am bandara mis e3’azdu unon na e3’azdas. Çkin meçamuşa xaziri voret. Xopasp’orişi nek’nas franguli mo gelik’idas domibağunon." yado ğarğalu.

Artvinis noğaşi maktalepeşen çkar xonari var gamulun do Xopaşi lok’aluri maktalepeşen andğaşakis Xopasp’orişa mancoba oxvenu şeni p’ozit’iuri ar ambari var moxtu. Xopasp’orişa ek’onomiurot k’ai p’eriodepes dudmaxvencoba oxvenu şeni k’oçepek artikarti k’ala rek’abet’i ikipt’es yado na ğarğales mak’elenerepek, "Xopas andğa milyon dolarepe na uğunanpek am geç’areli çkar sotis var moges. A3’i so renan ğirsoni dulyaşk’oçepe çkini? Ogurapas mxuci meçamus var renan, ğaribi ocaxepes var menda3’k’ernan, k’ult’uruli ak’t’ivit’epes var renan, sp’oristi var renan. Xampoba aya ren-i? “Ma para mooga do çkar mitik mo elamças” na tkumernan dulyaşk’oçepek Xopasp’orişa mancoba var axvenenan do muç’oşi “Xopuri do Xopasp’ouri voret” ya atkvenan. Çkin moxtimeri na voret am oras mteli k’oçi osimaduşa vucoxopt. Mitik am saatişk’ule Xopaşi sokağepes arçkva Xopuri voret ya var tkvas. Ar k’luba mutepeşişa mancoba na var axvenen dulyaşk’oçepek berepe muşişa aya muç’oşi oxo3’onapasunonan yado dido monç’elnan. Am mskva k’luba ink’ilu na amuşi xesap’i miepek meçasunon mtelixolo bz’iratminonan." yado ğarğales.