|
ÇKİNİ NANANENA LAZURİ
Margaluri k’ala cuma nena na ren Lazuri nena, Omjore K’avk’asiuri nenapeşen ar teri ren. K’olxidaşi antik’uri noğarobaşi magedginepeşen do K’olxepeşi mota Lazepeşk’elen, Olandeyulva Anatoliaşi Uçazoğaş p’icis, Otena do Sarpiş oşkendas iğarğalen. Andğas Lazi xalk’i otokt’onurot na skidun ilçepe Xopa, Borçxa, Arkabi, Vi3’e, Art’aşeni, Çamlixemşini, Otena edo xolo 1877- 1878 Osmanuri-Rusuli limaş k’ule na dibarginu regioni Marmaraşi noğape Akçak’oca, Sapanca, Yalova, Karamursel, Golcuk, Bartin, Duzce, İzmitişi namtini oput’epesti iğarğalen. Xolo, Batumişi xut oput’es do ok’rebules, Sovieturi Artobaşi uçvaş p’olit’ik’aşi sebebiten Lazepe na içvinu; Rusia, K’azak’istani, K’irgizistani, Est’onia steri terepes saği doskideri do k’ult’ura mutepeşi şinaxeri Lazepeşk’elen iğarğalen.
Nenamçkinacepek, artikartişa dido xolosoni Margaluri do Lazuri şinapan, Zanuri nena varna K’olxidaşi nena yado. Lazepe do Margalepe nanç’inerot 500 3’anaş 3’oxle artikartişen imendraneren do jur nenati oktiruşi p’eriodişa kamaxteren. Lazuri masdaruli nena ren, K’avk’asiuri iri nenape steri dido uxonaroni bonca na uğun. Masdarepeşi moç’k’as na nim3xven nanç’inerot 75 mem3xva uğun. Lazuri nenas; aksioni, aksioni na qu k’oçi, aksioni mi varna miepe şeni na ixvenu, aksionişi ora, na geç’k’u sva do aksionişi t’arafi ar masdariş doloxe itkvinen. Masdarişi cinci çkar var iktiren. Aksioni nam k’eleşen ixvenu na masdari eşo işeklen.
Lazepek 20. oş3’anuraşakis K’iriluri, Kartuli do Arabuli albonepe ixmares. 5 xonaroni, 30 uxonaroni, mtelot 35 fonemi na uğun Lazuri, andğas Latinuri albonite iç’aren. İ.3’. 6.- 7. oş3’anura do em oraş k’ule Lazepek, Heleni k’olonizasioni k’ala na geç’k’u Lazi-Grek’i ticaruli do k’ult’uruli k’ont’akt’işi p’eriodis, Grek’uri na ç’arupt’es do oxvame mutepeşis Grek’uri boncapete na noç’areret’es içkinen. Edo xolo içkinen, Lazepes K’udusis ar ek’lesia na udginan do Lazuri nenate ç’areli İncili na uğunan. Nik’o Marr (1910) do Çikobavak (1936) Lazuri nenas; Xopuri, Vi3’uri do Otenuri şivepe uğun yado idia xveneri rentina Lazuri, Yulva (Xopa-Arkabi-Vi3’e) do Gulva (Otena-Art’aşeni) şivepete goşogoru umosi mtini ren. Lazurişi şivepe, artikartişen lehçe k’onari ktireli va ren.
|
TÜRKÇE
