|
Ç'OROXİK MOTANASENAN
Artvini k’ala na işinen Ç’oroxis, ar 3’anas 6,3 milyar m3 dobuş k’ap’asit’e do 431 km ginz’enoba uğun. Ç’oroxişi 410 km Turketişi doloxe, 21 km Okorturaşi doloxe ren. Bayburt coxoni noğaşi Mescit coxoni golapeşen dibaden do Batumis Uçazoğaşa na nunç’işun Ç’oroxik, ar 3’anas 5,8 milyon m3 let’a tirups. Turketis irişen dido erozioni na iqven havzapeşen ar teri ren. Energia omralu şeni na dvaç’iren mağaloba 1.420 m. ren do Turketişi irişen manişa na diben ğali ren.
Turketişi na moxtasunon ndğalepe şeni dido beciti p’roekt’epe na uğun “Ç’oroxiş Lexeras” dudk’iles jin, E.İ.E. k’eleşen 1962 3’anas na geiç’k’inu et’iuduri xandapeten, 10 xurgi, motk’ilepes jin 17 xurgi do ğaliş st’ili HES (Hidro Elek’t’rik’uli Sant’rali) p’lani xveneri ren do mteli 27 tesisi ar 3’anas 10,3 milyar Kwh energia omralasunon. Aya Turketis na imralen mtel energiaşi (151 milyar Kwh) % 7, hidroelek’t’rik’aş energiaşi (2004 3’anaşi omralu 47 milyar Kwh) % 22 ren.
Artvinişi doloxe, Ç’oroxişi dudk’iles jin 5 xurgişi p’roekt’i ren do 3’aleşen jile Muratli, Borçka, Deriner, Artvin, Yusufeli coxoni xurgi do HES tesisepe renan. Bertaşi k’ileş jin Bayram do Bağlik coxoni xurgepe ixvenasunon.
Am p’roekt’epeşen Muratlişi xurgi do HES tesisepe 01.06.2005 tariğis içodinu, Borçka do Deriner coxoni xurgepeşi ok’iduşa niqoninen. Yusufeli, Bayram do Bağlik coxoni xurgepe 2006 3’anaşi ok’iduş p’rogrami do oxvenuş p’laniş doloxe ren.
|
TÜRKÇE
