|
UÇAZOĞAŞİ ĞALEPE URGAPERİ DİBENAN
Uçazoğaşi T’eknik’uri Universit’et’işi Rizinişi P’rope3iaşi Mağalidoguronişi Direk’t’orobaşk’elen, Yulva Uçazoğaş Raionis 13 milyon m3 3’k’ari urgaperi diben mara am 3’k’arepeşi menceli elek’t’rik’aş energiaşa goiktiras na upşu na diben ğalepeşen geç’areli moiginen ya itkvinu.
Samsuni do Xopaş oşkendas, zoğap’icişi noğapes na ixvenu goşogorus 13 milyon m3 3’k’ari upşu na diben oxoi3’onu do am tema şeni: “Am 3’k’ariş menceli xvala % 2 elek’t’rik’aş energiaşa goiktirinen. Am mencelis energiaşa goktiru dvaç’iren. 2003 3’anaşi X3alaş tutas na gamiçkvinu ağani k’anonepeten, xususi firmapes am ğalepeşi menceli axmarasunonan. Çkar xurgi var ok’iduten, gamargvas zarari var meçamuten, na ik’idasunon regulat’orepeten xvala 3’k’arişi dobuş menceliten Rizinis eşo şilya k’onari sant’rali gidginen. Am sant’ralepeşen 1 k’ilowat’ saat’i elek’t’rik’aş energia 14 lira ğirsiten gamaxtasunon. Çkin a3’i 1 k’ilowat’ saat’i elek’t’rik’a 160 liraşa ep’ç’opupt. Edo urgaperi na diben ğalepe k’ai oxmaru maçkinan na, elek’t’rik’a vit fara epi maxmarenan. ” ya itkvinu.
Mağalidoguronişi Direk’t’orobaşk’elen; “Çkin KTU oqopinurot xususi ar k’ida şeni fizibilit’e p’it do İkizdereşi jin ar sant’rali gebdgit. Am sant’rali na moxtasunon ndğalepes oxanduşa geç’k’asunon. Ar-jur 3’anaş doloxe amort’i na iqvasunon am sant’rali, ok’ule geç’areli mogasunon. Na itken mteli mutxanişen elek’t’rik’a ixvenen. Andğa na var ixmarinen m3kibupeti eşo ç’it’a sant’ralepeşa guiktinen do energia omraluş ixmarinen.” ya do oxo3’onapa niçinu.
|
TÜRKÇE
