|
ZUGDİDİŞ DADİANEPEŞ DOXORE
Samargaloş nananoğas, Zugdidis na ren ist’oriul-etnograpiuli muzeumi, mtel kianas irişen xampa do irişen k’ap’et’i 100 muzeumişen ar teği ren. Ak na işinaxen mcveşobape: Mariamiş dolokunu, Azizi İoane Mamnataleş qvili, Azizi Marineş do K’virik’eş ux3apu xepe, Napoleon Bonap’artiş nunk’uşen ğuramuşiş oras ezdimeri niğabi, Dadianepeş noğarepe do çkvadoçkva ondepe do çkvadoçkva uk’oro3xu mcveşobape arxvala Zugdidi do Samargaloşi, var nati Okorturaşi var do mtel kianaş, k’oçişobaş xampoba ren.
Na giçkinan steri muzeumi Ak’ak’i Ç’ant’uriaş xeşen i3’opxinu. Em oraşen andğaşakis dido eksp’onat’ep’ek dik’orobu do muzeumiş doloxe komolidvinu. Mara, 3’oxle k’omunist’uri orapes, k’omunist’epeşi xeten dido mcveşobape (evuli: Napoleoniş do Dadianepeş xususi şeepe) oxorişa mendiğes; Ok’ule, Okorturas 3iviluri limaş orasti am3ika zararik nadgitu am muzeumis, mara tamo-tamo, meç’irelobaten do p’at’riot’i, gurixonaroni k’oçepeş meşveluten muzeumik andğaşakis komoxtu.
A3’i muzeumis arçkva k’ai o3’k’ernan - aşoti itkven. Golaxtimeri 3’anas muzeumiş 3’oxle na go3’az’in baği domskvanes - ağani gzape kodupines, pukirepe kodorges, eşexvarçala kododges oşk’endas, notepe kagoşadges. Edo xolo-ti muzeumi şeni narği na zdips noseri k’oçepeşi ar grup’ik isimadeps-ki, Zugdidiş doxores oirkiane st’at’usi dovu3’opxat ia do. Oirkiane st’at’usi na uğun doxorepes dido beciti ok’onargupe ixvenen, çkvadoçkva t’erepeş p’rezident’epe do minist’repe iz’irenan, ok’oxedunan do çkvadoçkva p’roblemepeşa k’arari meçamu şeni, var na artik’arti k’ala cumaloba oxvenu şeni iğarğalnan. Asteri ok’onargupeş Zugdidis oxvenu arçkva noğaşen do ek na skidun xalk’işen dido k’ai ren, emuşeni-ki, noğati dimskvanen do coxo muşiti kianaş jin arçkva xoloti dimçiranen.
Mara aşo ondepeş oxvenus dido oxandu unon. Doxoreşi oirkiane st’andart’epeşa mo3’opxu diç’irs. Çkin na pşignit k'onari, amk’eleti k’oçepe ixazirenan - Kartis, ar Somexiş oxoris iz’iru Zugdidiş doxoreş 3’oxle na go3’obudu 12 met’roni ist’oriuli Beşik't'aşiş didnek’na do manişa eya svamuşis kogo3’ik’iden. Mp’olişi Beşik’t’aşis noxvene na ren am didnek’na, Osmanepeş sult’anişen Samargaloş begi Levan II Dadianişa hedie meçameri ren.
Aşo ki, şurimşine mak’itxalepe, mis na var giz’irunan am ar mskva do mcveşi noğa, idit, z’irit do ixelit...
|
TÜRKÇE
