|
YULVA UÇAZOĞAŞİ RAİONİS DİDO UDULYELİ REN
Turketişi İst’at’ist’ik’işi İnst’it’ut’işk’elen na ixvenu Oxoriş K’oçepeşi Dulyaşmencelişi Goşogoruk, Yulva Uçazoğaş Raionişi ek’onomiuri p’anorama o3’irapu. Goşogoruşi toliten Yulva Uçazoğaş Raioni, Jilentuna Yulva Anatoliaşk’ule %8,3 k’ala indust’rias doloxe udulyeli k’oçepe dido na renan ar raioni ren yado iz’irinen.
Na dvaç’iren dulyaş meçamuşi fabrik’ape na var ren şeni k’oçepek am raionişen manişa yibargenan do ulunan. Na ixvenu goşogorus irişen dido muxaciri na mendoçkumers noğa %63,56 k’ala Artvini ren. Emuşk’ule %44,66 k’ala Ordu, %23.47 k’ala Gumuşxane, %21,89 k’ala Rizini, %12,07 k’ala Giresuni do %11,11 k’ala T’rabizoni renan. Xvala T’rabizonis 12 şilya udulyeli k’oçi kart’alepes ç’areli ren.
Yulva Uçazoğaş Raionişi, dulya na axvenen k’oçepeşi dulya na ikipan k’oçepeşa nisp’et’i %68,3 ren do aya Turketiş doloxe maartani ren. Mara ziraat’is na ixandepan k’oçepe gamiğaşi mtini t’ablo izi’iren. Yulva Uçazoğaş Raioni, ist’at’ist’ik’epes o3’k’edaşi Egeşi Raioniş galendo dork’ineri xandoba dido na iz’irinen ar raioni ren yado oxui3’onen. Dork’ineri xandobas jur oxo3’onapa uğun: “Dulya na var ren şeni t’ek’niuri varna ek’onomiuri sebebepeten ç’it’a oras dulya tamo-tamo oxvenu varna dodgitinu, mteli ndğas doloxe dulya var az’iramu, dulyaşi çodinaş doloniş doloxe geç’k’apu do/varna doçodinu steri ek’onomiuri sebebepeten na iz’iren dork’ineri xandobaş gale doskideri na ren, dulya muşis na mogaps paraşi ç’it’anoba varnati muşi p’rofe3ias var axandinu steri sebebepeten dulya muşi goktiru na unon varna majurani ar dulya na gorups k’oçepe.”
Sek’t’orepeşi toliten raioniş xandobaşi nisp’et’epe aşo golisvaren:
İndust’ria: %8,3. Yulva Uçazoğaş Raioni, mteli Turketis Jilentuna Yulva Anatoliaşi galendo dork’ineri xandoba irişen dido na ren raioni ren.
Ziraat’i: %63.3. Ziraat’işi xandobaşi mağali oqopinu, raionis mtini udulyalobaşi dido na iz’irenşi nişani ren. Majurani raioni %65,8 k’ala Jilentuna Yulva Anatoliaşi raioni ren.
Xizmet’epe: %28,4. Xizmet’işi sek’t’oris xandobaşi nisp’et’i majura raionişen dork’ineri ren. Mesela, Jilentuna Yulva Anatolias am nisp’et’i %28,4 ren.
|
TÜRKÇE
