|
OKORTURAŞİ İST'ORİA
Okorturaşi İst’oria (Geç’k’apaşen 19. oş3’anuraşakis) coxoni svara, 1997 3’anaşi X3alas Gamamçkumala Sorunişi, seria İst’oria K’ult’uraşi maartani svarot Mp’olis gamiçkvinu. P’rof. Nik’oloz Berz’enişvili do P’rof. Simon Canaşiaş k’elen na iç’aru svara, Hayri Hayrioğluş k’elen Turkulişa goiktirinu. SSRA-şi p’eriodis na ixazirinu do mtelxolo 12 cildoni xandaşi xulasa na ren svara, doguronepes ok’itxuşi svara yado igurinu.
Svaraşi motxas Vaxt’ang Gorgasalişi heykeli, dolotkvalepeş 3’oxle Kortonaşi nanaş heykeli do 18. oş3’anuraş geç’k’apaşi Okorturaş xarit’a na gez’in svara 20 no3’ileşen 3’opxun. Maç’arepeşi biografiape mç’ipaşaşi meç’areli ren. Svaraşi k’ap’ulani motvasti; “Turkiasti ist’oriaş oç’aru ilmiurobaşen mendra met’odepete do ofi3ialuri ist’oriaşi gagnapaten ixvenen. Mara andğaneri dğas, kianaşi xalk’epeş ist’oria do k’ult’urapeşi ilmiuri met’odepeten, ağneburot goşoguru, adamobaşi moxtanoraş mogu şeni dido beciti ren. Emuşeni Kortupeşi ist’oriaş svaraşi gamaçkvinu dork’inoba oçodinasunon. Kortupeşi ist’oria do k’ult’ura şeni mç’ipaşaşi goşogorapete çineri Hayri Hayrioğluk, Kortulişen Turkulişa na oktiru “Okorturaşi İst’oria” coxoni svara am temaşi xandapeş doloxe irişen ilmiuri do irişen şumuluri ren.” yado meç’areli ren.
Edo xolo 20 Xrist’ana 1945 tariğoni gazeta Pravdas na gamiçkvinu “Turkiaşen Çkini Hak’oni Ok’vandupe” dudoni mak’aleşi maç’are do Okorturaşi K’omunist’uri P’art’iaşi mak’ature jur Sovieturi matarixeş k’elen ç’arineri svarak, Marksist’i t’eorepeşi otanuten Okorturaşi ist’oria goşogorups. Na3ia mektinuşi p’eriodis Kartvelişi minobaş o3’opxinu do Kartveli nesliş omordinuşi noğirate dersişi svaraş format’is, Okorturaşi dixapes iptineri cemiet’epeş oraşen, timoşletineri feodaluri Kortuli Mapanobaşi çodinuri 3’anapeşi oraşakis ist’oriuli p’eriodi oxo3’onapaps.
Kartvelizmaşi p’rop’agandate ç’areli, objekt’ivobaşen uambaroni, ist’oriuli mtinobape na ok’oxups do ist’oriuli minobape na moivars, xalk’epeşi oşkendas garazi do mt’erobaşi ç’k’emepe na orgaps ideologiuri ar gamaçkvala gurişmeç’voni ar xaliten, “dobadona do regioni çkinişi xalk’epeş cumalobaşi aktivit’epeşa numxvacasunon” do “ilmiuri çkina do ist’oriaşi gagna mogapasunon” yado idia xveneri gamiçkvineren!
Ok’vanduş t’ilifonişi nomera: 0212 638 81 82
|
TÜRKÇE
