|
TK'F-Şİ MAGEDGALE AR LAZİ: TOPÇUOĞLU OSMANİ
Çarobaşi oras, Osmanuri dobadonaşi Uçazoğaşi p’icis na skidut’u do am dobadonaşi dobadonamşine na rt’u Lazepe, Ç’erk’ezepe, Kortupe do Turkepeşi xandaş do bazarişsva rt’u em dğaşi Rusia. Am sebebiten; Batumi, Poti, Zugdidi, Oçamçire, Gagra, Soxumi, Soçi, Sarat’ov, S’tavrap’oli, K’azansk’i, Mosk’ova, Tbilisişati ulu do mulut’es. Lazepe, Çarobaşi Rusiaş k’arta svas skidut’u. Em svapes na skidut’u Lazepek ixandept’u çkvadoçkva zenaatepes. Ust’a mitxanepe rt’es. Magektale, k’ap’et’i do gurami rt’es. Lazepek numxvacupt’es magektale Bolşevik’epes, Rusias çarişi mezalimişa medgineri. Am sebebitenti 1917 Gimuaşi gektalasti ak’ates. 1917-şi gektalak 3’oxle idu k’ap’ineri do ik’ap’et’inu mtel Rusias. Lenini do muşi gzamşinepek 3’opxes Mosk’ova p’olit’ik’uri nananoğa. Xalk’işi k’omiserepek kodibarges Mosk’ovaşa. Rusiaşi çveri do ç’opinerepeti komuçites. Aşotenti çveri do ç’opineri Osmanuri dobadonaşi Muslimanepeti komuçitu. K’onferansepe i3’opxinet’u Rusiaşi k’arta ğocis.
Topçuoğlu Osmani rt’u, oxandu şeni Otenaşi oput’e K’uzik’aşen çarobaşi Rusiaşa na ideret’u kovaliş furnişi ust’a makimine do ma3omepeşen Ali ust’aşi, sum bereşen maartani. Dibadu St’avrop’olis. İk’itxu oncironi n3’opulas. İqu p’ioneri do k’omsomoli. Topçuoğlu Osmani rt’u Bolşevik’i k’adropeşen, namuk na ixandept’u ç’opineri mcveşi Osmanuri dobadonaşi Muslimani malimepeş doloxe. 14 X3ala 1919-s, (TK’F) Turkiaşi K’ominust’uri Firk’aşi magedgale k’omisia i3’opxinu. Am k’omisiaşi mak’aturepe aşo rt’u: Mustafa Suphi, Maksut Ekşi, Ali Riza Keskin, Topçuoğlu Osmani, Mustafa Borkluce, Murat Sari, Kadir Erzurumlu. Topçuoğlu Osmanik goxtu Anatolia do Mp’olişi k’arta sva namtini gzamşinepe k’ala artot. Mp’oli do Anatolias na ixandept’u çkvadoçkva sosialist’uri grup’epe, sendik’ape do go3’oncğoneri madulyepe k’ala artikartisoba qu. Oteşkiluşi odulyobas kogeç’k’u. Nucoxu entepes TK’F-şi gedguşa. Emutenti 10 St’aroşina 1920-s, 75 delegat’işi ok’atu do sosialist’uri grup’epek ar ç’eriş tude na ok’oibğes Maartani K’ongrete geidginu TK’F.
Murenki Topçuoğlu Osmanik meçu muşi şuri Ğormotis, 1921-s, St’avrop’olişi oxen3aluri oxzabunes. Ok’uleni p’eriodis baba Topçuoğlu Alik moxtu Sovieturi dobadonaşen majura biç’i muşi İbrahimi do k’ulani muşi Safiye k’ala artot do dibargu İzmirişa. Topçuoğluşi ocağik amagişi ok’vak’iduş k’ele dodgitu.
|
TÜRKÇE
