|
LEVAN 3AGURİA: "SUMO"Şİ MARGALİ MURU3Xİ
“Sumo” dido mcveşi do t’radi3ialuri ar Jap’onuri sp’ort’i ren do Margalurot “rk’ineba” na itkven osteruşi ar ç’eşidi ren. Am sp’ort’iten na iboders sp’ort’smeni “sumoist’i” varna “sumo”şi mark’ine coxo muşiten içkinen. Mendrani Yulva Aziuri ar sp’ort’i na ren tina, Amerik’a do Evrop’asti, “sumo”s k’arta ndğa na irden auden3ia uğun.
“Sumo” Jap’onuri sp’ort’i ren mara, k’arta sumoist’i Jap’onepeşi doloxendo var gamulun. Çinoberi sumoist’epeşen ar teriti Levan 3aguria ren. A3’i 22 3’aneri na ren 3aguria, Soxumi coxoni mskva noğas dibadu. Sovet’ari p’eriodis, baba muşiti çinoberi do çemp’ioni mark’inepeşen ar teri rt’u. Apxazetis na iskedinu imp’erialist’iuri k’onflikt’işi sebebiten, Levan 3aguriaşi ocaxi majura çkineburi xalk’epe steri Soxumişen imt’u do dudari noğa Tbilisişa idu. Ekonaşis dibarges. Em oras Levan 12 3’aneri rt’u. Tbilisişi Sp’ort’uli Ak’ademias amaxtu do doguroniş rk’inebaşi burmes ik’itxu. Olimp’iaduri çemp’ioni oqopimu izmont’u. 18 3’aneri rt’uşi, Evrop’aşi t’urnuvaşi ti-moşletineri st’ilis 130 k’g-şi divizias çemp’ioni iqu. Murenki, avt’orit’et’epek emus, ”si dido monk’a re,”-ya u3’ves. Entepes emuşi k’ategoria goktiru unt’es. Levan 135 k’g rt’u do emus “astaxolo 120 k’g-şa meli”- ya tkves, varna şansi var aqvasunt’u. Monk’a rt’u, emuşeniti muşi rk’inebaşi skidala m3k’upi rt’u. Ar ndğas, t’elevizias o3’k’ert’u do ekolen iguru “sumo” coxoni rk’ineba. Edo int’eresi dvaqu Levanis.
Sumoist’epe dido monk’a iqvert’es, monk’oba p’roblema varen rk’inebaş am ç’eşidis. Em p’eriodis Jap’oniaşen na moxtu mitxanik “sumo” şeni ağnemordale mark’inepe gorupt’u. Am k’oçik Levanisti t’ek’lifi oğodu do aşopeten Levanik Jap’oniaşa oxtimuşi k’arari meçu. “Sumo”s zust’i ierarkiuli sist’ema ren. İrişen 3’oxle mark’ine ar “Heya”şi mamgure ren. “Heya” ren doguroni steri bina. “Am “Heya”şi mance na ren “Oyak’at’a”ti hem p’at’roni hemti mamgurepale ren. Ağani mark’inepek oç’k’omale xazirupan do ekonaşis mcveşi na ren mark’inepes uxezmet’apan. “Heya”şi skidalaşa gegaperi var rt’u Levani do mututi var uçkit’u.
Levanişi maartani ndğalepe dido meç’ireli mek’ilu. Jap’onuri oç’k’omale çkvaneri rt’u. Jap’onuri nena var uçkit’u. Mara manceşi oxorcak daluri gagnapaten arm3ika Jap’onuri nena oguru Levanis.
Levan 3aguria a3’i “K’ok’k’ai” (Uça Mzoğa) z’egneten dido çinoberi ar “sumo”şi mark’ine ren Jap’oniasti, Okorturasti.
|
TÜRKÇE
